Read lango Yakobo 1 Bible Online

Yakobo 1 - lango bible

Yakobo 1

¹Waraga man oya i baŋ Yakobo ame en amiro Obaŋa kede Rwotwa Yecu Kricito. Baŋ atekere apar wie aryo ame oket ata: Orem wunu ba.

²Omegona, bed wunu i lelo atek ka otemowu i yore apapat,

³pien iŋeo wunu ni, temo iyeewu mio idio wunu cunywu.

⁴Wek wunu diyo cunywu cob ticcere kakare, me ibed wunu jo oteggo, a roccoro mom i komwu, dok ame ginnoro daŋ mom orem i baŋwu.

⁵Ka tye ŋattoro i akinawu ame ryeko mere nok, ber en kwa Obaŋa ame mio baŋ jo luŋ i yomcuny, aboŋo abwote moro; bino miye.

⁶Cite myero en kwa kede iyee, kun daŋ mom kala akala; pien ŋat ame kala akala, rom i nam ame tagere, ame yamo kolo coro gire atata.

⁷Pien kodi danonono mom myero tam ni ebino nwoŋo ginnoro i baŋ Rwot,

⁸pien en dano a cunye aryo, mom cuŋ atek i kittere luŋ.

⁹Acan myero wakere ka otiŋe malo,

¹⁰alonyo daŋ myero wakere ka odwoke piny; pien alonyo bino rwenyo bala tur lum.

¹¹Pien ceŋ donnyo kede lyeto mere atek, eka te nero lum, ture te ony, berrere te rwenyo oko. Amannono daŋ, alonyo bino rwenyo ata i dyeceŋ.

¹²Ŋat ame otemo te cuŋ atek, tye kede winyo; pien ka doŋ oteme, en te loyo, en bino nwoŋo mot me kwo ame Rwot ociko miyo baŋ jo a mare.

¹³Ka obito ŋattoro, myero kur kob ni, “Obaŋa en obita”, pien Obaŋa gire mom obito i tiyo ginnoro arac, en daŋ mom bito ŋattoro.

¹⁴Dano acel acel mittere kene en abite, kun wae, omo cunye.

¹⁵Mit ka oyac nywalo bal. Bal ka doŋ oteggo, nywalo to.

¹⁶Kur imi bwolwu, omegona ame amaro.

¹⁷Pien ginnoro luŋ aber ame omiowa, kede mot ducu abeco, ya i malo, bino piny iya i baŋ Obaŋa Papo, ame won gin aryeny i polo, ame mom tye kede alokaloka moro, dok tipo moro a nyuto lokere mere daŋ mom tye.

¹⁸Pi mittere, en onywalowa kede koppere me ateni, me wan obed calo cam i poto ame ogeo cek i kin gin luŋ ame oketo.

¹⁹Omegona ame amaro, ŋe wunu man. Dano acel acel myero ru winyo kop, ento myero kur ruye woto dwone, dok myero kany akemo.

²⁰Pien akemo a dano mom cobo tic a tye atira i nyim Obaŋa.

²¹Cwa wunu teŋe ginnoro luŋ me lewic kede tim areco ame onya baŋwu, gam wunu i mwolo kop Obaŋa ame opito i yiwu, pien twero laro tipowu.

²²Ento bed wunu jo ame keto gin ame okobo i tic, mom jo a winyo awinya keken kun ibwolle wunu kenwu.

²³Pien ka ce ŋattoro obedo awiny kop keken kun mom tio, en cal i ŋat ame ŋio waŋe ame onywale kede iyi araŋ.

²⁴Cite ka oŋiye kene otum, woto oko, wie te wil oko oyotoyot i callere ame woki eneno.

²⁵Ento ŋat ame oneno cik aber ame kelo kuc, eka te perakino iye, kun mom bedo ŋat ame winyo eka wie te wil oko, ento ŋat ame keto i tic, obino miye winyo i gin etio luŋ.

²⁶Ce dano moro tamo ni en adini kun mom juko lebe, en nwoŋo obwolle kene, dini mere konyere mom.

²⁷Dini aber odoco, a cilo mom iye i nyim Obaŋa Papawa en ene: konyo otino kic kede mon a coggi oto i kom cangi, kede gwokere ken i ci lo a bal me Iobo.