Read lango Yakobo 2 Bible Online

Yakobo 2 - lango bible

Yakobo 2

¹Omegona, kite a doŋ iye wunu kede Rwotwa Yecu Kricito, Rwot me kwogo, kur dok inyut wunu apokapoka moro i akina a jo.

²Pien ka won atem me jabu oruko boŋŋi abeco obino i cokerewu, kede acan oruko boŋŋi ocido,

³ilunyo wunu paro ka pi won boŋŋi abeco kun ikobo wunu ni, “Yin bed kan, adwoŋ”, aco acan ikobbe wunu ni, “Yin cuŋ kaca”, onyo ni, “Bed piny i ŋet tyena kan”.

⁴Mano mom nwoŋo doŋ ikelo wunu apokapoka oko i akinawu kenwu, kun idoko wunu oŋolkop ame tamwu ogom oko?

⁵Winy wunu ba, omegona ame amaro, Obaŋa mom otyeko yero jo ocan i wi lobo me bedo olonyo i iyee, dok me miyogi loc a rik ociko ni ebino miyo baŋ jo a mare?

⁶Ento wun iketo wunu lewic i kom ocan. Jo ame burowu, mom gin olonyo? Gin mom en a waowu terowu tetek i nyim okiko?

⁷Mom gin oyet nyiŋ aber ame olwoŋowu kede?

⁸Ka imako wunu cik me loc Obaŋa i kite ocoo kede i coc a yam ocoo ni, “Mar dano wadwu acalo imarre keni,” nwoŋo itimo wunu ber;

⁹ento ka ipoko wunu kin dano, nwoŋo itimo wunu rac, nwoŋo cik ŋolliwu kop ni wun obalo.

¹⁰Pien ŋat a gwoko cik ducu, ka ce opoto i kom acel keken, nwoŋo oturo cik luŋ.

¹¹Pien ŋat okobo ni, “Kur icod cot,” dok okobo daŋ ni, “Kur inek.” Ka ce mom icod cot ento ineko dano, yin doŋ ituro cik.

¹²Kop ame ikobo wunu, kede gin ame itio wunu, myero bed acalo mea jo obino ŋolligi kop i te cik a kelo kuc.

¹³Pien ŋolo kop mom timo kica baŋ ŋat a rik mom onyuto kica; kadi amanno, kica ŋatte pien en ber kato ŋolo kop.

¹⁴Kara konyo ŋo omegona, ka ŋattoro kobo ni etye kede iyee kun mom keto i tic? Iyee-nono twero lare?

¹⁵Ka ce ominni onyo aminni boŋo mere pe, kun cam me nino i nino remo,

¹⁶ŋattoro acel i akinawu te kobbe ni, “Wot wunu i kuc, komwu mumura, yeŋ wunu,” kun mom omiogi ginnoro a mitte me kom, kara enno konyere ŋo?

¹⁷Kittono, iyee a mom oketo i tic, doŋ oto oko,

¹⁸ŋattoro bino kobo ni, “Yin itye kede iyee, ento an atye kede tic; nyutta iyeeni aboŋo ticcoro, eka an ticca bino nyuto iyeena.”

¹⁹Ityeko ye ni Obaŋa tye acel, itimo ber. Cen daŋ ye amanno, komgi daŋ myel.

²⁰Yin amiŋo, imito nyutti ni, iyee a mom i tic konnyere mom?

²¹Nen ba, kwarowa Iburaim rik mom okwano ni kite atira pi tic, i kare ame en doŋ ojalo wode Icaka me aŋola i wi keno me lam?

²²Doŋ ineno ni iyee mere rik otio karacel kede ticcere, dok iyee rik ocobere i tic,

²³eka coc a yam ocoo te cobere kakare ni, “Iburaim rik oye Obaŋa, eka ote kwane ni kite atir, dok daŋ ote lwoŋe ni dyere Obaŋa.”

²⁴Ineno ni dano okwano ni kite atir pi tic ento mom pi iyee keken.

²⁵Amannono daŋ, Rakab ame alaya, mom obin okwano ni kite atir pi ticcere, ka rik ojolo okwena eka te cwayogi i yo ocele?

²⁶Kite acalo ka weo doŋ mom i kom, nwoŋo kommono doŋ oto oko, amannono daŋ, iyee ka mom oketo i tic, nwoŋo doŋ oto oko.