Read lango Yakobo 3 Bible Online

Yakobo 3 - lango bible

Yakobo 3

¹Omegona, myero jo apol i akinawu kur bed opwony, pien iŋeo wunu ni wan opwony obino ŋolliwa kop apek akato jo ocele.

²Wan luŋ opoto i kop apol, cite ka ce ŋattoro mom opoto i gin ame en kobo, dano-nu dano aber meicel, twero loyo kome luŋ.

³Wan oketo nyonyo i dog aguragura me gin winywa; mano mio owiro komgi luŋ tuŋ a wan omito.

⁴Koŋ inen wunu mel, gin odoŋodoŋo, dok yamo en a kologi, cite akwaŋŋo twero wiro woto kan emito kede atin polloro atitidi moro keken.

⁵Kittono, leb en dul kom ame obedo iŋwet, ento wakere i jami adoŋodoŋo. Nen kite ame mac aduno moro waŋo kede twon buŋ!

⁶Leb daŋ amannono, calli mac. I dul komwa, leb rom i wi podo ame timmere mom atir balo komwa luŋ; cwinyo mac i komwa, i kite a kwo wirre kede luŋ; mac me Geena moko i kome.

⁷Dano twero loyo kit leyi luŋ kede winnyi, kede wic a twolegu, kede gin a bedo i nam, daŋ doŋ oloo oko yam con,

⁸ento mom tye dano moro a twero loyo leb. Leb obedo twon ginnoro a mom jukere, opoŋ i kwir a kelo to.

⁹Aco kono en leb, en ame wan opwoo kede Rwot kede Papo daŋ, en acellono a daŋ dok oceno kede jo ame oketo i cal Obaŋa.

¹⁰I dog acellono en a daŋ ya iye pwoc kede ceno jo. Omegona, mom myero bed amannono.

¹¹Waŋ akoŋ acel twero mollo iye pii amit kede akec?

¹²Omegona, oduro twero nyako yao? Onyo olok twero nyako oduro? Amannono daŋ, pii amit mom twero mollo i akoŋ ataŋ.

¹³Ŋa kara i akinawu ame ryek dok akitti? En myero nyut ticcere me ryeko i mwolo, pi kwo mere aber.

¹⁴Ento ka itye wunu kede nyeko arac i cunywu, kede laro dito, kur iwakere wunu, kun daŋ ikob kop me goba i kom kop ateni.

¹⁵Kodi ryeko man mom oya i polo ento me lobo, mom me woro Obaŋa ento mea Catan gire.

¹⁶Pien kan ame tye iye nyeko kede laro dito, kannono tye iye arubaruba kede tim ducu areco.

¹⁷Ento ryeko ame oya i malo, me agege bedo cil, eka dok me kuc, me mwolo, gamo tam luŋ abeco, opoŋ i kica, nyako nyig aber, mom poko i akina jo, dok cunye atir.

¹⁸Jo ame kelo kuc, coo kotigi i kuc me nyako kite atir.