Read lango Yakobo 4 Bible Online

Yakobo 4 - lango bible

Yakobo 4

¹Ŋo kara a kelliwu lweny? Ŋo a kelo romo i akinawu? Mom mitwu en a tye ka lweny i dul komwunono?

²Imito wunu, ento mom ite nwoŋo wunu, eka ite neko wunu dano. Iparo wunu jami a jo ocele, ento mom inwoŋo wunu, eka ite ero wunu romo kede lweny. Mom inwoŋo wunu, pien mom ikwao wunu.

³Ikwao wunu, eka mom ite nwoŋo wunu, pien ikwao wunu arac, ikwao wunu me tic kede pi cobo ka mitwu.

⁴Wun jo ame bolo dyerewu oko. Mom iŋeo wunu ni, mako dyere kede lobo mii idoko akwor Obaŋa?

⁵Onyo itamo wunu ni, coc a yam ocoo kobo nononono ni, “En tye i par adwoŋ meicel kede nyeko i kom cuny a yam en oketo ni bed i yiwa?”

⁶Ento en medde miyo winyo mere; pi mannono, coc a yam ocoo kobo ni, “Obaŋa pyem i jo a wakere, cite mio winyo baŋ jo amwol.”

⁷Pi mano, miye wunu i te loc Obaŋa. Dar wunu Catan, en bino riŋowu.

⁸Nok wunu baŋ Obaŋa, en daŋ bino nokowu. Lwok ciŋwu oko wun obalo, eka ite miyo cunywu bedo acil, wun jo ame tamwu opokere aryo.

⁹Yiwu myero waŋ, kum wunu, kok wunu. Nyerowu myero lokere dok kumo, lelowu lokere dok can.

¹⁰Mwolle kenwu i nyim Rwot, en bino tiŋowu malo.

¹¹Omegona, kur ikob wunu kopporo arac, ŋat man i kom awottere. Ŋat ame kobo kop arac i kom ominnere, onyo ŋolo ominnere kop, en nwoŋo okobo kop arac i kom cik, dok doŋ oŋolli cik kop. Ento ka yin iŋolli cik kop, yin doŋ mom acob cik ento idoko aŋolkop.

¹²Ami-cik kede aŋolkop tye acel, en ame twero larowu kede nekowu. Yin idoko ŋa ame iŋolli awotti kop?

¹³Koŋ itam wunu ba, wun jo ame kobo ni, “Tin onyo diki obino wot i boma onyoo, obino tyeko kuno mwaka acel kun ocato wil dok onwoŋo agoba.”

¹⁴Aco kono mom iŋeo wunu kop a diki. Kwowu kara cal i ŋo? Wun kom irom wunu ikuna ame nen pi kare anonokkoro keken, eka te ket oko.

¹⁵Akaka kobo amanno, kono ikobo wunu ni, “Ka Rwot oye obedo kwo, obino timo man onyo maca.”

¹⁶Ento wun ocac, iwakere wunu. Kodi wakerenono luŋ rac,

¹⁷ŋat ame ŋeo gin aber a myero etim, eka mom te timo, nwoŋo doŋ otimo bal.