Read lango Yakobo 5 Bible Online

Yakobo 5 - lango bible

Yakobo 5

¹Eno ba wun olonyo, ollakino wunu, redu, pi can ame abinniwu.

²Lonyowu doŋ otop oko, anaka rukwu nyenye doŋ onaŋo oko.

³Jabu kede ryalwu, nyalli doŋ omwodo oko; nyalli i komgi bino bedo caden i komwu, dok bino camo komwu bala mac. Wun doŋ ikano wunu lonyowu pi kare me agikki.

⁴Nen ocara otic a rik otio i pottiwu ame itwono wunugi oko, tye akoko, koko okac doŋ owinyere i yit Rwot me mony.

⁵Wun doŋ ibedo wunu i jami amalo meicel kede yomcuny i wi loba; ipitte wunu, icwe wunu doŋ giwu, aco kare me nekowu doŋ oromo!

⁶Doŋ iŋolli wunu dano a kite atir kop, en gire mom ogeŋowu.

⁷Kittono omegona, di cunywu tuno waŋ ame Rwot bino dwogo. Nen wunu kite ame apur kuro kede gin ame pire tek a cek i lobo; dio cunye tuno waŋ ame kot me cwir kede me oro ocwe.

⁸Wun daŋ di wunu cunywu, cuŋ wunu atek, pien dwogo a Rwot doŋ ceggi.

⁹Kur iŋuŋura wunu omegona, ŋat man i kom awottere, me kur ŋolliwu kop. Nen, Aŋolkop tye ocuŋ i doggola.

¹⁰Omegona, anen me kanyo can kede diyo cuny nen i kom odwarpiny a rik okobo i nyiŋ Rwot.

¹¹Jo a rik okanyo atek, wan olwoŋogi ni komgi i winyo. Ityeko wunu winyo kite a rik Yubu okanyo kede, dok ineno wunu daŋ agikki tic a Rwot i kome, kit a Rwot won kica, timo kede jo ber.

¹²Akato mere luŋ omegona, kur ikwoŋ wunu kwoŋ, kadi i nyiŋ polo, kadi i nyiŋ lobo, kadi kit kwoŋ ocele luŋ; ento yewu kede kwerowu luŋ myero bed, “Ee ta”, onyo ni, “Pe”, me kur ŋolliwu kop.

¹³Ŋattoro iyi akinawu tye kede can? Myero en kwa Obaŋa. Tye ŋattoro a tye i yomcuny? Myero en wer wer me pako Obaŋa.

¹⁴Tye ŋattoro iyi akinawu ame kome lit? Myero en lwoŋ odite a lwak jo oye Kricito, me kwa Obaŋa pire kun owire kede moo i nyiŋ Rwot.

¹⁵Kwac ame iyee tye iye bino caŋo atwo, Rwot bino tiŋe malo; ka ce onwoŋo rik otimo balloro, obino timme iye kica.

¹⁶Tuc wunu balwu, ŋat man baŋ awottere, dok daŋ ŋat acel acel myero kwa Obaŋa pi awottere, me icaŋ wunu. Kwac a dano a kite atir tek, tye kede twer adwoŋ.

¹⁷Elia rik obedo dano ame kite rom i megwa, rik obin okwao Obaŋa atek ni kot kur cwe, omio kot mom ocwe i wi lobo pi mwaka adek kede dwete abicel.

¹⁸Eka dok te kwayo, omio kot te cwe, loba te ceko cem.

¹⁹Omegona, ka ce dano moro i akinawu ogak oko i kop me ateni, eka ŋattoro te dwoggo en cen,

²⁰myero iŋe wunu ni, ka ŋattoro odwoggo abalo cen i yo mere ogom, ŋattoro-nu bino laro kwo mere oko iya i to, dok bino wumo ballere apol.