Read lango 1 Petero 2 Bible Online

1 Petero 2 - lango bible

1 Petero 2

¹Pi manno, raccuny luŋ, kede kite goba luŋ, kede edwali, nyeko kede kite ayet luŋ, wek wunu oko.

²Mit wunu cak agili me cuny, bala itino okere a pwod onywalo nyen, me idoŋ wunu naka i larre;

³pien ityeko wunu bilo ber a Rwot.

⁴Biye wunu baŋe, en kidi akwo, a yam jo okwero, cite i baŋ Obaŋa obedo kidi me wel ame oyero.

⁵Biye wunu bala kiddi akwo, me ged kedwu ite doko wunu ot Obaŋa me cuny, me ibed wunu olamdog acil, imi wunu mot oŋolo me cuny ame Obaŋa pwoo, pi Yecu Kricito;

⁶pien rik ocoo ni, “Nen, aketo i Cion kidi me wel ame ayero me gwic ot, ŋat oye en, lewic mom bino make.”

⁷Pi mano, i baŋwu wun jo ame oye en, Kricito obedo me wel; cite i baŋ jo a mom oye en, otimere acalo rik ocoo, ni, “Kidi ame ogedo okwero, en ame odoko kidi me gwic ot.”

⁸Odoko daŋ “gweŋ me twomere, lela a mio jo rette.” Gin otwomere pien okwero winyo kop Obaŋa, acalo rik oyiko pirgi con.

⁹Cite wun ibedo wunu rok ame oyero, olamdog abaka, rok acil, jo Obaŋa ame mere ikome, me wek irab wunu pi tic me kwogo a ŋat olwoŋowu iya i piny acol me idony wunu i lero mere me awura.

¹⁰Yam mom ibedo wunu jo Obaŋa, cite aman wun, doŋ idoko wunu jo mere; yam mom otimowu kica, cite aman doŋ otimowu kica.

¹¹Wun ame amaro, abako doga baŋwu, acalo wun wele, mom jo me lobo man, kwer wunu mit me kom oko ame romo kede tipowu.

¹²Bed wunu i kite abeco i akina jo a mom ŋeo Obaŋa, me wek ka ce gin oyetowu ni wun otim gin arac, gin onen ticwu aber, daŋ omi kwogo baŋ Obaŋa i nino ame en bino roto iye lobo.

¹³Pi Rwotwa, myero imiye wunu i te loc me twer ducu a tye iyi akina lwak; baŋ aloc adwoŋ, pien en ame loo jo luŋ,

¹⁴kede baŋ oloc ame en ocwalo pi keto can i kom jo a timo gin areco, kede pwoyo jo a timo gin abeco.

¹⁵Pien Obaŋa mito ni itim wunu gin aber, me imi wunu jo amiŋ a kwia piny liŋ oko.

¹⁶Kwowu bed kwo a jo a loye kengi, kun mom itio wunu kede lockenwu pi timo tim arac; cite bed wunu bala opii Obaŋa.

¹⁷Wor wunu jo luŋ. Maru omegowu. Lworu Obaŋa. Woru aloc adwoŋ.

¹⁸Wun omiro, miye wunu i te loc odoŋewu kede woro luŋ, mom ka baŋ jo okica kede amwol keken, ento baŋ ogero daŋ.

¹⁹Pien man en gin ame opwoo, ka ce dano kanyo rem pien cunye tye i kom Obaŋa, ka owune kun mom obalo.

²⁰Kara myero pwowu i ŋo, ka idio wunu cunywu ka opwodowu pi bal? Cite ka ce idiyo cunywu ka ineno wunu can pi timo gin aber, mano en Obaŋa pwoo.

²¹Pien olwoŋowu pi mannono; pien Kricito daŋ oneno can pirwu, owekkiwu anen me aluba, me iwap wunu yore.

²²Balloro mom a en otimo, lebe daŋ mom okobo goba.

²³Ka jo oyete, mom oyetogi. Ka oneno can, mom oburo jo; cite omiye kene baŋ ŋat aŋolo kop atir.

²⁴En oyeo balwa i kome kene i kom yataria, me wan oto i bal, eka ote bedo kwo i kite atir. Pi pwodo en, omio icaŋ wunu.

²⁵Pien rik irwenyo wunu oko bala rommi, cite aman doŋ idwogo wunu baŋ Akwat kede Agwok tipowu.