Read lango 1 Petero 3 Bible Online

1 Petero 3 - lango bible

1 Petero 3

¹Amannono daŋ, wun mon miye wunu i te loc a cogwu, me wek ka ce mogo i akinagi mom lubo kop Obaŋa, otwero lokere pi kite a mongi, kadi bed gin mom okobo kopporo i doggi,

²ka gin oneno kitewu acil dok me woro.

³Rukwu mom bed me oko, acalo kedo yer wic, rwako tigo jabu, ruko boŋŋi abeco,

⁴cite rukwu bed i kite me cuny a mom nen. Ruk ame mom balle en cuny amwol, ame liŋ mot; mano en ame wellere dwoŋ i nyim Obaŋa.

⁵Pien i kare acon, mon acil ame omoko gengi i kom Obaŋa yam rukere i kittono, kun daŋ omiye i te loc a coggi,

⁶acalo Cara rik winyo dog Iburaim, kun pake ni, “Adwoŋŋa.” Wun daŋ aman wun itino mere, ka itimo wunu gin aber, kun mom ginnoro miowu lworo.

⁷I kite acellono daŋ, wun co, bed i monwu i niaŋ aber, kun imio wunu kwogo baŋ dako acalo awotti a kome pe tek, pien gin daŋ onywako kedwu winyo Obaŋa ame kela kwo. Amannono ginnoro mom bino geŋo kwacwu.

⁸Me agikki mere, wun luŋ bed wunu kede tam acel kede cuny acel. Marre wunu bala omego, kun itye wunu i kica dok kede cuny amwol.

⁹Kur idwok wunu tim arac pi tim arac, onyo ayet kede ayet; ento akaka mano, kwa wunu winyo Obaŋa i komgi, pien olwoŋowu pi man, me inwoŋ wunu winyo.

¹⁰Pien rik ocoo ni, “Ŋat a mito maro kwo, kede neno nino abeco, gwok lebe i kom gin arac, kede doge i bwolo joo

¹¹Oya oko i gin arac, oti gin aber, oyeny kuc, dok olub yore,

¹²Pien waŋ Rwot neno jo a kitegi atira, yite daŋ winyo kwacgi; jo a timo gin arac Rwot gaogi agaa.”

¹³Ŋa a bino timowu rac ka iketo wunu cunywu atek i tiyo gin aber?

¹⁴Cite kadi ineno wunu can pi wapo kite atir, itye wunu kede winyo. Kur ilwor wunugi, cunywu daŋ kur poti,

¹⁵ento wor wunu Kricito i cunywu acalo Rwotwu. I kare ducu bed ame iyikere wunu oko pi dok i kop ame jo bino penyowu kede i kom gen ame itye wunu kede; cite dok wunu iye kede mwolo kede woro.

¹⁶Bed wunu ame yiwu ler, me lewic mak jo a yeto kitewu aber i Kricito, ka gin aŋalowu.

¹⁷Twara onen wunu can pi timo gin aber, ka ce Obaŋa mito amanno, kato pi timo gin arac.

¹⁸Pien Kricito daŋ rik oneno can pi bal, tyen acel ame romo atwal; en ŋat a kite atir oto pi jo a kitegi ogom, me wek ekelwa baŋ Obaŋa. Rik oneko kome, cite ocere oko i cuny.

¹⁹I cuny en rik owoto orabo kop baŋ jo a tye i buc,

²⁰ame yam con mom owinyo dog Obaŋa, ka odio cunye i komgi, i kare a Nua a kun en apayo yee, ame jo anok, aboro keken, olarre iye i pii.

²¹Gin ame rom aroma i man ame koni larowu, en batija; mom pi kwanyo cilo kom, ento obedo acalo kwac baŋ Obaŋa me idok wunu jo a yiwu ler, pi cer a Yecu Kricito,

²²ame doŋ odok oko i polo, tye i kabedo me kwogo i laŋet Obaŋa tuŋ cem, kun omalaika kede twer kede teko luŋ tye i te loccere.