Read lango 1 Petero 4 Bible Online

1 Petero 4 - lango bible

1 Petero 4

¹I kite acalo Kricito okanyo kede rem me kom, wun daŋ rukere wunu i tam acellono, me miwu teko. Pien ŋattoro ame okanyo rem me kom mom doŋ medde i bal,

²me etyek kare me kwo mere i lobo man ame pwod odoŋ kun mom dok lubo mit areco ame dano paro, cite cobo mit Obaŋa.

³Kare a rik ibedo wunu tiyo gin ame jo a mom ŋeo Obaŋa maro timo myero doŋ romwu. Yam ilubo wunu kite me tarwaŋ, kede mit me kom, mero, gat me yomcuny arac, mat kede woro cal jogi ame yic dagi.

⁴Wuro doŋ ocirogi oko, pien aman mom dok iribere wunu kedgi i orara me mit a mom jukere; man omio gin yetowu.

⁵Gin bino culo kop baŋ Obaŋa ame oyikere me ŋolo kop a jo akwo kede jo oto.

⁶Man en gin omio amut aber orabo anaka baŋ jo oto, me wek kadi oŋolligi kop i kom acalo oŋolli jo luŋ, gin obed kwo i cuny acalo Obaŋa.

⁷Agikki me jami luŋ doŋ ceggi; pi mannono, gwok wunu kitewu, kun iloo wunu mitwu kenwu, me imiye wunu i kwayo Obaŋa.

⁸Akato ducu, lid wunu marre kenwu kenwu; pien mar wumo Iwak bal apol.

⁹Bed wunu ojol wele, ŋat man kede awottere, kun mom iŋuŋura wunu.

¹⁰Kit acalo ŋat acel acel tye i mottere ame omie, ti wunu kede pi konyere kenwu kenwu, acalo ogwok-jami abeco, ame tiyo kede mot me winyo Obaŋa a kwone papat.

¹¹Ka ŋattoro rabo kop, kob acalo ŋat a rabo kop oya i baŋ Obaŋa; ŋat a mio kony, ti acalo ŋat ame tio kede tek ame Obaŋa omio; me jo ket kwogo i kom Obaŋa i yore luŋ pi Yecu Kricito. Kwogo kede twer bedo mere nakanaka. Amen.

¹²Owotena, kur iwur wunu can ame rom i mac a bino i komwu pi temowu, a kun itamo wunu ni ŋit ca ginnoro apat meicel opoto i komwu.

¹³Ento lel wunu i kop man ni, iribere wunu i can a Kricito, wek dok ilel wunu i yomcuny adwoŋ i kare ame kwogo mere bino nen.

¹⁴Ka oyetowu pi nyiŋ Kricito, itye wunu kede winyo, pien nwoŋo cuny me kwogo ame en Cuny Obaŋa bedo i komwu.

¹⁵Mom myero ket can i kom dano moro i akinawu pi nek, onyo pi kwo, onyo pi timo ginnoro arac, onyo pi reboro gi-a ŋattoro.

¹⁶Ento ka oketo can i kom ŋattoro pi bedo dano oye Kricito, lewic mom myero make, ento omi kwogo baŋ Obaŋa pi lwoŋe kede nyinŋono.

¹⁷Pien kare doŋ oromo me cako ŋolo kop, kun cakere i ot Obaŋa. Kara ka acakere i baŋwa, agikki a jo okwero winyo amut aber ame oya i baŋ Obaŋa bino bedo niŋo?

¹⁸Coc a rik ocoo kobo ni, “Ka ce bedo tek baŋ dano a kite atira illarre, abalo a mom Iworo Obaŋa bino nen ka kwene?”

¹⁹Pi mano, jo ame neno can i yore ame Obaŋa mito, ber gin miye kengi i ciŋ Acwec ame genne, kun gin tio gin aber.