Read lango 1 Petero 5 Bible Online

1 Petero 5 - lango bible

1 Petero 5

¹Abako doga baŋ odoŋe ame tye i akinawu, an adwoŋ wadwu ame bedo caden i can a Kricito, dok daŋ abino ribere kedwu i kwogo mere ame bino nen.

²Kwa wunu rommi Obaŋa ame tye baŋwu, kun ineno wunugi aber, mom pi dic, ento pi mitwu kenwu, i kite ame Obaŋa mito, mom pi lim ento pi mit me cunywu.

³Kur ilo wunu jo ame oketo i ciŋwu kede teko, ento bed wunu anen aber baŋ rommi;

⁴mio ka Akwat adwoŋ bino nen, ibino nwoŋo wunu mot, tok kwogo a mom ner.

⁵Kittono wun awobe daŋ, winy wunu loc odoŋe. Wun ducu rukere wunu kede mwolo, ŋat acel acel i nyim awottere, pien “Obaŋa pyem i jo a wakere, cite mio winyo baŋ jo a amwol.”

⁶Mwolle wunu kenwu i te twer Obaŋa, me wek ka kare oromo, en tiŋwu malo.

⁷Cibu parwu ducu i kome, pien en tamo pirwu.

⁸Gwokere wunu, kiu piny, pien akworwu Catan tye a rimo piny calo eŋato ame mor, kun yenyo dano me amwoda.

⁹Cuŋ wunu atek i nyime pi iyee kun iŋeo wunu ni, omegowu ame tye i lobo ducu tye a kanyo kit cannono.

¹⁰Ka doŋ ineno wunu can pi kare anok, Obaŋa ami winyo luŋ, ame olwoŋowu i Kricito Yecu me nywako kwogo mere a perakino odoco, en ikome bino dwokowu kakare, bino miyowu teko, dok bino miyo icato wunu atek.

¹¹Loc obed baŋe nakanaka. Amen.

¹²Acoyiwu waraga man anok kede ciŋ Silvano, ame aŋeo ni ominwa ame genne, pi cuko cunywu kun akobo acalo caden ni, man en winyo Obaŋa me ateni; Cuŋ wunu iye atek.

¹³Lwak oye Kricito a tye Babulon, ame Obaŋa oyerogi karacel kedwu, omotowu, karacel kede woda Marako.

¹⁴Motte wunu kenwu kenwu kede amot me mar. Kuc obed baŋwu ducu ame itye wunu i Kricito.