Read lango 2 Petero 1 Bible Online

2 Petero 1 - lango bible

2 Petero 1

¹Waraga man oya ibaŋ Cimon Petero, amiro dok akwena a Yecu Kricito. Baŋ wun ame inwoŋo wunu iyee a pire tek ame rom aroma i megwa pi kite atir Obaŋawa ame en Alarwa, Yecu Kricito.

²Winyo kede kuc myero medde baŋwu pi ŋeyo Obaŋa kede Rwotwa Yecu Kricito.

³Pi twer Obaŋa en omiowa jami luŋ ame kelo kwo kede cuny me lworo Obaŋa, pi ŋeyo en ame olwoŋowa i kwogo mere ikome kede dittere.

⁴Pi kwogo mere kede dittere en omiowa cikere adoŋo meicel kede me wel adwoŋ, me wek ka olimo, obwot oko i balle me kit a dano ame tye i lobo pi mit arac, eka ote ribere i kit Obaŋa.

⁵Pi kop man, cukere wunu atek me medo kit aber i kom iyeewu; eka i kom kit aber med wunu iye ŋec;

⁶i kom ŋec med wunu iye gwokere ken; i kom gwokere kenwu ite medo wunu iye diyo cuny; i kom diyo cunywu ite medo wunu iye cuny me lworo Obaŋa;

⁷i kom cuny me lworo Obaŋa ite medo wunu iye marre me omego; eka i kom marre me omego ite medo wunu iye mar.

⁸Pien ka itye wunu kede magi ducu, kun itye kede abup, bino miyo ibedo wunu jo a ŋeo Rwotwa Yecu Kricito i yo a konyo, dok ame twero ya iye ginnoro aber.

⁹Pien dano a mom i maginogo en atowaŋ, mom neno ginnoro i kannabor, dok wie doŋ owil oko ni rik olwoke oko i kom ballere acon.

¹⁰Pi mano, omegona, myero imedde wunu cukere, me imok wunu odoco lwoŋowu, kede yer ame Obaŋa oyerowu kede; pien ka itimo wunu amanno, mom ibino poto wunu kadi acel.

¹¹Mano bino miyo yo yabere baŋwu alac me donyo i loc ame perakino odoco mea Rwotwa ame en Alarwa Yecu Kricito.

¹²Mano omio kare luŋ amito poyo wiwu i kop magi, kadi bed iŋeo wunugi, dok daŋ ilido wunu atek kop ateni ame otyeko kelliwu.

¹³Atamo ni oporre meicel an icukoro cunywu kun apoyo wiwu, ame pwod atye kede kom me lobo man;

¹⁴pien aŋeo ni, kare me jalo koma doŋ ceggi, acalo Rwotwa Yecu Kricito rik onyutta.

¹⁵Dok abino keto tek, wek ibed wunu kede gin ame poyo wiwu i kop magi kare luŋ, ka an doŋ atyeko to oko.

¹⁶Pien i kare a rik wan orabbiwu pi teko a Rwotwa Yecu Kricito, kede dwogo mere, rik mom olubo icina mogo ame wan oyiko kede ryeko, ento rik wan oneno kwogo me dittere kede waŋwa.

¹⁷Wan rik oneno ka en olimo woro kede kwogo i baŋ Obaŋa Papo, i kare ame dwon oya i baŋ Won Kwogo Adwoŋ, te bino baŋe kun kobo ni, “Man en Woda ame amaro, a yia yom i kome.”

¹⁸Dwonnono wan rik owinyo kun oya i polo, pien wan rik otye karacel kede i wi kidi acil ca.

¹⁹Mannono doŋ omoko pirwa kop a rik odwarpiny okobo. Wun daŋ ber iket wunu cunywu i kopgi, pien bedo acalo tara ame lyel i kabedo moro acol, ituno ka piny oru, etop oryeny, omenyo tamwu.

²⁰Me agege, myero iniaŋ wunu man ni, mom tye kopporo ame odwarpiny ocoo ame ŋattoro twero gonyo pire kene;

²¹pien mom tye kop adwarpinnyoro a rik obino pi mit a dano, ento Cuny Acil en omio jo okobo kop ame oya i baŋ Obaŋa.