Read lango 2 Petero 2 Bible Online

2 Petero 2 - lango bible

2 Petero 2

¹Ento odwarpiny ame ogoba rik obin onen i akina lwak, dok amannono daŋ opwony ame ogoba bino nen i akinawu. Gin bino kelo pwonnyogo apat ame rwenyo jo, kun gin okwero atot Adwoŋgi ame owilogi, cite mannono bino miyo gin ikomgi obino rwenyo odoco oyotoyot.

²Jo apol bino lubo kitegi me tarwaŋ, obino miyo jo yeto yo me ateni pirgi.

³Pi worogi me lim, gin bino nwoŋo lim i baŋwu pi kopgi me goba ame gin oyiko ayika. Ento kop a rik oŋolo i komgi doŋ otye a yiko, to a myero pot i komgi mom onino.

⁴Pien Obaŋa rik mom oweko omalaika ka obalo, ento obologi piny i bur lyel, te cwayogi i bur acol, me gwokgi kuno, ituno i kare me ŋolo kop.

⁵Daŋ en rik mom oweko lobo i kare acon, ento ogwoko ka Nua, arab kop me kite atir, karacel kede jo ocele abiro, i kare a rik en ocwao abwal pii me mwony lobo a jo a mom lworo Obaŋa.

⁶Owaŋo pacci me Codoma kede Gomora luŋ odoko buru, kun oŋolo kop me tyekogi oko, te miyogi bedo anen baŋ jo a mom bino lworo Obaŋa i kare me anyim.

⁷Ento olaro Lot, ŋat ame kite atir ame rik cunye oton meicel pi kite me tarwaŋ a jo areco.

⁸Pien tim areco ame dano a kite atir-ru obedo neno kede winyo nino i nino, i kare ame en bedo baŋgi, en dano aber-ri, okelo rem adwoŋ i cunye.

⁹Amannono Rwot ŋeo laro jo a lworo Obaŋa iyi alola ame oomo kede yigi, dok en ŋeo gwoko jo a kitegi mom atir kan ame oketo iye can i komgi ituno i nino me ŋolo kop,

¹⁰akato mere jo ame wapo mitgi me kom ame lilogi, kun ocao wegi dito. Cunygi tek, ocerre gigi, daŋ gin mom olworo yeto wegi kwogo.

¹¹Ento kadi omalaika loogi kede teko kede twer, gin mom yetogi ka gin okelo kop i komgi i nyim Rwot.

¹²Ento jo-nu cal i leyi a mom ryek, dok a lubo kile ame oketogi kede, ame onywalogi me amaka kede me aneka; gin oyeto kop ame okwia. Obino nekogi bala leyi,

¹³kun otimogi rac pi rac a gin otimo. Cunygi yom gigi i gado cem dyeceŋ. Gin okelo lewic kede bal ka onotte kedwu i camo arama, pien gin mito ka gat me yomcuny arac.

¹⁴Waŋgi yenyo ka mon me acoda, mom owe i yenyo yo me bal. Gin ciko owic me mako jo a cunygi goro. Cuny a gin tye kede doŋ opwonyere oko i woro me lim. Gin doŋ jo ame oceno!

¹⁵Gin doŋ oweko yo atir, orwenyo oko ata. Gin olunyo lubo yo a Balaam wot a Beor, ame rik maro lim ame enwoŋo pi timo gin arac,

¹⁶ento rik ote juke pi turo cik. Kana ame mom kobo, rik okobo i dwon a dano, te juko apoa adwarpinnyono.

¹⁷Magi gin akoŋ a pii mom iye, ikuna ame yamo kot akolo. Otyeko gwokkigi kabedo acol icuc.

¹⁸Gin kobo koppogo aditodito me awaka ame tere moro mom, kun obito kede jo a pwod obwot abwota iya i akina jo a kitegi tye atata, ote terogi i timo tim me tarwaŋ kun olubo mit areco me kom.

¹⁹Gin ocikere me miyo jo-nono loye kengi, aco gin ikomgi obedo opii a gin a balogi; pien ka ginnoro oloo kwo a dano moro, en doŋ odoko opii a ginnoro-nono.

²⁰Ka gin doŋ otyeko bwot oko i lille me lobo pi ŋeyo Rwotwa ame en Alarwa Yecu Kricito, eka gin te dok moko i lille-nono, te loyogi atwal, bino miyo icennere gin bedo arac kato a yam con.

²¹Onwoŋo twero bedo ber ka kono onwoŋo mom gin oŋeo yo me kite atir, kato ame gin oŋeo eka dok ote weko cik acil ame omiogi.

²²Otimere i komgi bala kop ame carokop me ateni okobo ni, “Gwok dok olokere naŋo ŋokkere,” kede dok ni, “Puno olwoko kome, eka dok te ŋeŋena i coto.”