Read lango 2 Petero 3 Bible Online

2 Petero 3 - lango bible

2 Petero 3

¹Owotena, man doŋ waraga me aryo ame acoyiwu. I gin aryo luŋ acukoro cunywu me itam wunu tam a tye atir, kun apoyo wiwu,

²me ipo wunu i kom kop ame odwarpiny acil rik okobo con, kede i kom cik a Rwot ame en Alar, ame okwenawu yam okelliwu.

³Me agege, myero iniaŋ wunu man ni, i kare me agikki jo ame oŋale bino pello kede aŋalogi, kun olubo mitgi kengi,

⁴dok kun openyo ni, “Dwogo mere a rik ociko pire tye kwene? Pien cakere ame kwariwa oto oko, jami luŋ tye i kite ame yam otye kede con i ageyi keto lobo.”

⁵Gin wigi owil me akaka i kop man ni, polo onwoŋo rik obedo tye con, kede lobo daŋ ame oketo kede pii iya i pii, pi kop ame Obaŋa okobo.

⁶Pii daŋ en ame rik otyeko lobo me kare-naca ka abwal pii omwonyo oko.

⁷Pi kop Obaŋa acellono daŋ, polo kede lobo me kare man doŋ okano pi kuro mac; otye ka gwoko ituno i nino me ŋolo kop kede tyeko jo a mom lworo Obaŋa.

⁸Ento wiwu kur wil, owotena, i kop acel-li, ni, i baŋ Rwot nino acel rom aroma i mwaka tutumia, mwaka tutumia rom aroma i nino acel.

⁹Rwot mom agal agala i cobo cikere mere i kite acalo jo mogo tamo kede, ento en pwod adiyo cunye i komwu, pien en mom mito ni ŋattoro rweny odoco, ento ni jo luŋ tun i ŋut.

¹⁰Ento nino a Rwot bino tuno acalo akwo, eka polo te rwenyo oko kede mor adwoŋ, acer bino meye oko i mac, lobo kede tic luŋ a tye iye bino waŋ oko.

¹¹Kara ka jami magu luŋ bino tum oko kite-nono, myero koŋ ibed wunu jo acalladi, kun ilubo wunu kite kwo acil kede me woro Obaŋa?

¹²Myero ikur wunu nino Obaŋa, kun iketo wunu cunywu me mi tun oyotoyot. I nine-nono polo bino lyel, meye oko, acer daŋ bino meye oko i mac.

¹³Ento acalo en rik ociko, wan otye okuro polo anyen kede lobo anyen, kan ame kite atir bedo iye.

¹⁴Pi mano, owotena, ka itye wunu ka kuro man, ket wunu tek me kur nwoŋ roccoro onyo balloro i komwu, kun itye wunu kede kuc.

¹⁵Tam wunu ni, diyo cuny a Rwot en larrewa ennono. Ominwa Paulo ame omaro ocoyiwu daŋ amannono, pi ryeko ame omie,

¹⁶kun kobo pi kop man acalo en kobo pire i waraga mere luŋ. I waraga mere tye koppogo a niaŋ iye tek, ame jo a pe opwonyere, kede jo a mom ocuŋ atek, dwanyo tere oko, acalo gin otimo daŋ kede coc ocele a yam ocoo, kun omio gin ikomgi orwenyo odoco.

¹⁷Pi mano, owotena, kite a doŋ iŋeo wunu man con, gwokere wunu kur imi wunu jo a mom woro cikkoro bwolwu, dok wirwu oko i tamgi, mio ipoto wunu i kan ame icuŋ wunu iye atek.

¹⁸Medde wunu doŋo i winyo a Rwotwa, ame en Alarwa Yecu Kricito, kede i ŋeye daŋ. Kwogo bed baŋe amanni kede nakanaka. Amen.