Read lango 1 Lakana 1 Bible Online

1 Lakana 1 - lango bible

1 Lakana 1

¹Wan ocoyiwu kop i kom gin ame obedo tye ya i ageyi piny, ame wan owinyo, ame oneno daŋ i waŋwa. Wan kom onene, dok omule kede ciŋwa, en Kop me kwo.

²Kwo-nono rik onen oko kannaler, wan ote neno. Wan aman obedo cadennere, kun orabbiwu kop me kwo a perakino nakanaka ame rik obedo baŋ Papo, eka te nen oko baŋwa.

³Gin a wan oneno dok owinyo, en a wan orabbiwu daŋ, me wek inotte wunu kedwa. Doŋ i nottewa-ni, wan onotte karacel kede Papo kede Wode Yecu Kricito.

⁴Wan ocoo man wek lelowu cobere aber.

⁵Man en kwena a rik wan owinyo i baŋe, ame otye a rabo baŋwu, ni, Obaŋa en lero, dok i en mom tye kannoro acol kadi acelloro.

⁶Ka wan okobo ni onotte kede kun pwod owoto kan acol, wan ogoba, timwa daŋ ateni mom iye.

⁷Ento ka wan owoto kannaler, acalo en daŋ tye kannaler, nwoŋo wan onotte oko ŋat man kede awottere, dok remo a wode Yecu Kricito Iwoko bal ducu oko i komwa.

⁸Ka ce wan okobo ni wan omom i bal, mano nwoŋo obwolle kenwa kenwa, kop ateni nwoŋo mom i yiwa.

⁹Ka ce wan oluco balwa, en genne dok kite atira, bino weko balwa, dok bino Iwoko timwa areco oko ducu i komwa.

¹⁰Ka ce okobo ni wan giwa mom obalo, nwoŋo omio Obaŋa odoko agoba, koppere daŋ nwoŋo mom i yiwa.