Read lango 1 Lakana 2 Bible Online

1 Lakana 2 - lango bible

1 Lakana 2

¹Itinona, an acoo waraga man baŋwu me kur ipot wunu i bal; ento ka ce ŋattoro obalo, wan otye kede akony ame cuŋ pirwa baŋ Obaŋa Papo, en Yecu Kricito ame kite atir.

²Dok en ikome daŋ obedo gin ame oŋolo pi kwanyo balwa; mom megwa keken cite anaka bal a jo i wi lobo luŋ.

³Gin a niaŋowa aber ni wan oŋee en ene ni, wan ogwoko cikkere.

⁴Ŋat ame okobo ni eŋee, kun mom gwoko cikkere, en agoba, ateni daŋ mom i yie.

⁵Ento ŋat ame winyo doge, ateteni mar a dano-nono i kom Obaŋa doŋ ocwiny. Man en gin a mio wan oniaŋ ni wan otye i en:

⁶Ŋat ame kobo ni ebedo i en myero wap kite kwo acel a rik Yecu owapo.

⁷Owotena, an mom acoyiwu cikkoro anyen, ento cik acon gire ame rik itye wunu kede anaka cene. Cik aconnono en kwena ame doŋ ityeko winyo wunu oko.

⁸Kadi amanno, atye ka coyiwu cik anyen; mano tye ateni i tuŋ baŋe kede i tuŋ baŋwu, pien colpiny tye a ket oko, lero me ateni tye doŋ aryeny.

⁹Dano ame kobo ni etye i lero kun dago ominnere, nwoŋo en pwod tye kan acol.

¹⁰Ŋat ame maro ominnere bedo gire i lero, ame mom tye iye gin a mio jo poto i bal.

¹¹Ento ŋat a dag ominnere tye kan acol, dok daŋ woto kan acol; pe ŋeo kan ewot iye, pien colpiny nwoŋo owumo waŋe oko.

¹²Acoo waraga man baŋwu, wun otino a pwod tino, pien balwu doŋ oweko oko pi nyiŋe.

¹³Acoo baŋwu wun papo, pien iŋeo wunu ŋat a yam tye con ya i ageyi piny. Acoo baŋwu wun awobe, pien doŋ iloo wunu Arac oko.

¹⁴Acoo baŋwu wun itino, pien iŋeo wunu Papo. Acoo baŋwu wun papo, pien iŋeo wunu ŋat a yam tye ya i ageyi piny. Acoo baŋwu wun awobe, pien itek wunu, kop Obaŋa bedo i yiwu, dok daŋ iloo wunu Arac oko.

¹⁵Kur imar wunu lobo, kadi gin a tye i lobo. Ka ŋattoro maro lobo, mar i kom Papo nwoŋo mom i yie.

¹⁶Pien gin ducu a tye i lobo, acalo mit me komwa me anywalli, kede par areco me waŋ, kede dok awaka me jami ame otye kede, magi-nono mom oya i baŋ Papo, ento ocakere i lobo kan.

¹⁷Lobo tum oko kede mittere luŋ; ento ŋat ame tio gin ame Obaŋa mito perakino nakanaka.

¹⁸Itinona, man doŋ kare me agikki. Kite a rik iwinyo wunu ni, akwor a Kricito bino bino, aco amanni okwor a Kricito obino oko apol ata; en gin omio wan oŋeo ni, man doŋ kare me agikki.

¹⁹Gin oya oko i baŋwa, ento gin rik mom obedo jowa; pien kono rik gin obedo jowa, kono gin omedde bedo baŋwa. Ento gin oya oko i baŋwa me wek nen oko kannaler ni gin luŋ mom obedo jowa.

²⁰Ento wun giwu, ŋat Acil doŋ owirowu oko i moo me Cuny Acil, wun luŋ itye wunu kede ŋec.

²¹Mom acoyiwu waraga-ni pien ikwia wunu kop me ateni, ento pien iŋeo wunu, dok iniaŋ wunu ni, mom tye goba moro ame oya i kop ateni.

²²Ŋa kara ame agoba? En ŋat a kwero gire ni Yecu mom Kricito. Mano en akwor a Kricito, en nwoŋo okwero Papo kede Wod.

²³Mom tye ŋattoro a kwero Wod ame dok tye gin i Papo. Ŋat ame oye Wod, nwoŋo dok tye kede Papo daŋ.

²⁴Weku gin ame iwinyo wunu anaka cene bed i yiwu. Ka gin ame iwinyo wunu anaka cene bedo i yiwu, wun daŋ ibino bedo wunu iyi Wod kede iyi Papo.

²⁵Doŋ man en gin a rik en ociko me miyowa, en kwo a perakino odoco.

²⁶Man acoo baŋwu pi jo ame twero rwenyowu.

²⁷Ento wun giwu, moo me Cuny Acil a rik Kricito owirowu kede bedo doŋ i yiwu, mio mom dok mitte ŋattoro ipwonyowu; pien moo a yam owirowu kede pwonyowu kop luŋ. En gin me ateni, mom goba; acalo rik en opwonyowu, bed wunu i en.

²⁸Aman ba, itinona, bed wunu i yie, me ka en dok bino nen, wan obed i tekcuny, a mom lewic makowa I nyime ka odwogo.

²⁹Ka ce iŋeo wunu ni, en kite atir, myero iniaŋ wunu aber ni, ŋat acel acel ame tio gin a tye atir nwoŋo Obaŋa ame onywalo.