Read lango 1 Lakana 3 Bible Online

1 Lakana 3 - lango bible

1 Lakana 3

¹Koŋ inenu kite mar me awura a rik Papo omiowa, me lwoŋowa ni wan otino Obaŋa; daŋ wan otye amannono. Gin omio lobo mom ŋeowa, pien yam okwie.

²Owotena, aman doŋ wan otino Obaŋa; kite a wan obino bedo kede mom ru onen, ento wan oŋeo ni, ka en bino nen, wan obino bedo bala en, pien obino ne ne kite a en tye kede.

³Ŋat acel acel ame tye kede gen man ame omoko i kom Kricito, lonyere kene bedo acil, acalo Kricito daŋ cil.

⁴Dano acel acel ame timo bal nwoŋo aturo cik; bal gire en turo cik.

⁵Iŋeo wunu ni Kricito rik onen me ekwany balwa oko; i en ikome balloro mom iye.

⁶Ŋattoro ame bedo i en mom timo bal; ŋattoro ame timo bal nwoŋo mom oneno en, daŋ pe oŋee.

⁷Itinona, kur imi ŋattoro bwolwu. Ŋat ame timo gin a tye atir, en ame kite atir, acalo Kricito daŋ kite atir.

⁸Ŋat ame timo bal en dano a Catan; pien Catan ya i ageyi obedo ka timo bal. Gin omio Wot Obaŋa rik onen, pi turo tic a Catan.

⁹Mom tye ŋattoro ame Obaŋa onywalo ame timo bal, pien koti Obaŋa bedo i yie; en mom twero balo, pien nwoŋo Obaŋa onywale.

¹⁰Man en a bino miyo oneno jo mene obedo otino Obaŋa kede jo mene obedo otino a Catan: ŋat a mom timo gin a tye atir mom atin Obaŋa, naka ŋat a mom maro ominnere.

¹¹Pien man en kwena ame iwinyo wunu cakere i ageyi, ni myero omarre wunu kenwa kenwa.

¹²Kur obedu bala Kain ame rik obedo atin Arac, te neko ominnere oko ca, ŋo ce omio oneke? Pien en ticcere rac, ento me ominnere onwoŋo tye atira.

¹³Omegona, kur iwur wunu ka lobo dagowu.

¹⁴Wan oŋeo ni wan oya oko i to, otuno doŋ i kwo, pien omaro omegowa. Ŋat a mom tye kede mar pwod odoŋ gire i to.

¹⁵Ŋattoro ame dago ominnere en anek, daŋ iŋeo wunu ni, mom tye anekkoro ame kwo a perakino odoco bedo i yie.

¹⁶Man doŋ mio wan oniaŋ i kom mar, pien Kricito ojalo kwo mere pirwa. Wan daŋ myero ojal kwowa pi omegowa.

¹⁷Ka ŋattoro tye kede jami me lobo man a romme, ce oneno ominnere ame piny oloo, eka te kwero miye kony, kara mar Obaŋa bedo i yie niŋo?

¹⁸Itinona, kur obedu kede mar i kopwa onyo i dogwa keken, cite omar wunu jo kede mar me ateni ame nen i tic.

¹⁹Man en a bino miyo wan oŋeo ni wan ojo ame otye i ateni, eka cunywa bino kwe i nyime,

²⁰ka ce cunywa ŋolliwa kop, pien Obaŋa dwoŋ kato cunywa dok en ŋeo kop luŋ.

²¹Owotena, ka cunywa mom ŋolliwa kop, otye i tekcuny i nyim Obaŋa;

²²daŋ wan onwoŋo ginnoro keken ame okwao baŋe, pien wan ogwoko cikkere dok otio gin a yomoro yie.

²³Doŋ cikkere en ene, ni, myero wan oye nyiŋ Wode Yecu Kricito, dok omarre kenwa kenwa, acalo en rik ocikowa.

²⁴Ŋat a gwoko cikkere bedo i Obaŋa, Obaŋa daŋ bedo i yie. Gin a mio wan oŋeo ni en bedo i yiwa, pi Cuny Acil ame en omiowa.