Read lango 1 Lakana 5 Bible Online

1 Lakana 5 - lango bible

1 Lakana 5

¹Dano acel acel ame ye ni Yecu en Kricito, dano-nono atin Obaŋa, dok dano acel acel ame maro ŋat onywalo atin, myero mar atin daŋ.

²Ka wan omaro Obaŋa dok olubo cikkere, en gin a mio wan oŋeo ni omaro otino Obaŋa.

³Pien maro Obaŋa gire en gwoko cikkere. Dok cikkere mom nuowa gire,

⁴pien ŋattoro luŋ ame Obaŋa onywalo loo lobo. Gin ame oloo kede lobo en iyeewa.

⁵Kara ŋa ame loo lobo? Mom en ŋat ame ye ni, Yecu en Wot Obaŋa?

⁶Man ŋat ame rik obino kede pii kede remo, en Yecu Kricito. Mom obino i pii keken, ento i pii karacel kede remo daŋ.

⁷Cuny Acil daŋ obedo acaden, pien Cuny en ateni.

⁸Ocaden tye adek: Cuny kede pii kede remo; gin adek-ku cadengi orwatte.

⁹Ka ce wan ogamo wunu caden a dano, caden Obaŋa dwoŋ kato oko. Aco macanaca en caden Obaŋa, pien en omio caden i kom Wode.

¹⁰Ŋat ame ye Wot Obaŋa tye doŋ i caden i yie kene. Ŋat ame mom ye Obaŋa doŋ omio Obaŋa odoko agoba oko, pien nwoŋo en mom oye caden ame Obaŋa omio i kom Wode.

¹¹Cadennono en ene ni, Obaŋa otyeko miyowa kwo a perakino odoco, dok kwo-nono tye i Wode.

¹²Ŋat ame tye kede Wod, tye kede kwo daŋ; ŋat ame mom tye kede Wot Obaŋa, mom tye kede kwo.

¹³Acoo kop man baŋwu, wun jo ame oye nyiŋ Wot Obaŋa, me iŋe wunu ni, itye wunu doŋ kede kwo a perakino odoco.

¹⁴Gin a mio wan obedo i tekcuny i nyime en ene ni, ka wan okwao ginnoro kun olubo mittere, en winyowa.

¹⁵Dok ka wan oŋeo ni en winyowa i gin luŋ ame wan okwao, oŋeo ni wan otyeko nwoŋo gin ame wan okwao i baŋe.

¹⁶Ka ce ŋattoro oneno ominnere kun tye a timo balloro a mom kelo to, en bino kwayo Obaŋa, Obaŋa bino miye kwo pi jo-nu ame balgi mom kelo to. Tye bal ame kela to; kodi ballogo mom akobo ni myero kwa Obaŋa pire.

¹⁷Gin ducu arac ame dano timo en bal, ento tye ballogo a mom kelo to.

¹⁸Wan oŋeo ni mom tye ŋattoro ame Obaŋa onywalo, ame pwod dok bedo timo bal, ento Wot Obaŋa gwoke aber, mio Arac mom gude.

¹⁹Wan oŋeo ni wan otino Obaŋa, ento lobo luŋ tye i te loc Arac.

²⁰Dok wan oŋeo ni Wot Obaŋa doŋ obino, daŋ omiowa ryeko me niaŋ, wek wan oŋe ŋat a tye me ateni. Dok wan obedo iyi ŋat a tye me ateni, pien obedo iyi Wode, en Yecu Kricito. Man en Obaŋa me ateni, dok man en kwo a perakino.

²¹Itinona, gwokere wunu, kur iwor wunu cal jogi.