Read lango Oŋolkop 1 Bible Online

Oŋolkop 1 - lango bible

Oŋolkop 1

¹Kare ame Yocwa doŋ otyeko to, jo Icrael openyo Rwot ni “ŋa ce ame bino geyo twaro lweny pirwa i kom jo Kaanan?”

²Rwot te gamo ni, “Juda en ame bino geyo wot kuno; nen ba, atyeko doŋ miyo lobo-naca oko i ciŋe.”

³Juda te kobo baŋ ominnere Cimeon ni, “Biye owot kedi i lobona ame opoka kede kwir, me owot olweny i kom jo Kaanan; an daŋ abino wot kedi i lobo ame rik opokki kede kwir.” Cimeon daŋ te wot kede,

⁴Juda rik te wot kuno, eka Rwot te miyo jo Kaanan kede jo Periji i ciŋgi; gin rik te loyo jonaca tutumia tomon i Bejek.

⁵Gin orwatte kede Adoni-bejek i Bejek, ote daŋ lweny kede, ote loyo jo me Kaanan kede jo me Periji,

⁶Adoni-bejek rik te riŋo oko, ento gin te ryemo yore, ote make ŋolo twoni ciŋe kede twoni tyene oko,

⁷Adoni-bejek te kobo ni, “Rik obakki pyerabiro ame aŋolo twoni ciŋgi kede twoni tyengi bedo depo ŋid cam ame oony piny i te mejana; gin ame rik an atimo i komgi, Rwot daŋ oculo kittono i koma.” Gin rik te tere i Jerucalem, te daŋ wot to kuno.

⁸Jo me Juda rik olwenyo i kom Jerucalem te mako oko, ote neko jo iye i pala lweny, ote waŋo boma mere oko i mac.

⁹Icennere doki, jo Juda dok te wot lweny i kom jo Kaanan ame onwoŋo bedo i lobo obedo kidikidi, kede i Negeb, kede i lobo ame tye piny i te kidi.

¹⁰Jo Juda dok te wot lweny i kom jo Kaanan ame bedo i Kebron, ame nyiŋe rik con onwoo olwoŋo ni Kiriat-arba, gin te loyo Cecai, Akiman kede Talmai.

¹¹Gin oya i kuno ote wot lweny i kom jo ame bedo i Debir. (Nyiŋ Debir aconnere onwoŋo Kiriat-ceper.)

¹²Kaleb te kobo ni, “Ŋat ame bino lweny i kom Kiriat-ceper, te mayo, abino miye nyara Akeca me bedo dako mere.”

¹³Otniel wot a Kenaj, ame obedo omin a Kaleb atidi mere, en ame te mayo, eka Kaleb te miye nyare Akeca me bedo dako mere.

¹⁴Kare ame nyako-nono owoto baŋ cware, en odio cware me kwayo poto baŋ pappere; en te ya oko i wi kana mere, Kaleb te penye ni, “Imito kara ŋo ba?”

¹⁵En te gamo ni, “Mia mottoro; kite acalo yin doŋ iketa i lobo me Negeb, mia akoŋŋoro ba.” Kaleb te miye akoŋ ame tye malo kede en ame tye tuŋ piny.

¹⁶Ikwae a dano me Keni, ame onwoŋo obedo or Muca, owoto karacel i jo Juda kun ya i boma me otit naka i tim me Juda, ame tye i Negeb i ŋet Arad. Gin rik te wot bedo kuno karacel kede jo turgi.

¹⁷Juda rik owoto karacel kede ominnere Cimeon, ote wot loyo jo Kaanan ame rik onwoŋo bedo i Jepat, te jwero oko luŋ acalo gin me kwer. Mannono rik te miyo lwoŋo nyiŋ kabedo-nono ni Korma.

¹⁸Juda dok te mako Gaja kede lobo mere, Acikelon kede lobo mere, karacel kede Ekron kede lobo mere.

¹⁹Rwot rik onwoŋo obedo i jo Juda, omiogi omao lobo luŋ obedo kidikidi odoko megi, cite jo ame onwoŋo rik bedo i lobo obedo babar ryemo oloogi oko, pien onwoŋo jo-naca tye i gadigadi lweny me nyonyo.

²⁰Rik ote miyo Kebron baŋ Kaleb kite ame Muca rik ociko, kede; en rik te ryemo ikwae Anak adek i kuno.

²¹Ento jo a Benjamin rik mom oryemo jo Jebuc ame onwoŋo bedo i Jerucalem; mannono en omio jo Jebuc pwod bedo karacel kede jo Benjamin i Jerucalem naka tin.

²²Jo me ot a Yucepu daŋ rik te wot lweny i kom Betel Rwot daŋ rik te bedo kedgi.

²³Jo me ot a Yucepu rik te cwayo kwena roto Betel, (Nyiŋ bomanono rik con onwoŋo olwoŋo ni Luj.)

²⁴Orot-piny rik te neno dano moro ame bino kun ya i boma, gin te kobbe ni, “Tim ber inyuttiwa yo ame woto i boma, wan daŋ obino timmi ber.”

²⁵Dano-nono rik te nyuttigi yo ame woto i boma; gin rik te neko jo ame bedo i boma-nono oko i pala lweny, cite ote weko dano-naca kede jo me doggola mere luŋ wot.

²⁶Lo-naca rik te wot i lobo a jo Kitti, te wot gero paco mere kuno, te cako nyiŋe ni Luj; mannono pwod nyiŋ kabedo-nono naka atot tin.

²⁷Manace rik mom oryemo jo ame bedo i Bet-cean karacel kede pacci ame tye i ŋete, akadi i Taanak kede pacci ame tye i ŋete, akadi jo ame bedo i Dor kede pacci ame tye i ŋete, akadi jo ame bedo i Ibleam kede pacci ame tye i ŋete, akadi jo ame bedo i Megido kede pacci ame tye i ŋete; ento jo Kaanan ocerre acera me bedo i lobo-nono.

²⁸Cite i kare a jo Icrael dok odoko atek, gin te miyo jo Kaanan tic atek me opii opii, mom ote ryemogi luŋ.

²⁹Epraim rik mom oryemo jo Kaanan ame onwoŋo bedo i Gejer; cite jo Kaanan gire omedde bedo i akinagi i Gejer.

³⁰Jabulon rik mom oryemo jo ame onwoŋo bedo i Kitron, akadi jo ame onwoŋo bedo i Nakalol; ento jo Kaanan obedo i akinagi, ote doko opiigi kun otio tic atek me opii opii.

³¹Acer rik mom oryemo jo ame onwoŋo bedo i Akko, akadi jo ame onwoŋo bedo i Cidon, akadi jo Arab, onyo me Akjib, onyo me Kelba, onyo me Apik, onyo me Rekob.

³²Ento jo Acer obedo i akina jo Kaanan ame gin onwoŋo obedo wegi lobo-nono, pien jo Acer rik mom oryemogi.

³³Naputali rik mom oryemo jo ame onwoŋo bedo i Betcemec, akadi jo ame onwoŋo bedo i Bet-anat, ento gin obedo i akina jo Kaanan ame onwoŋo obedo wegi lobo-nono. Kadi amannono, jo ame onwoŋo bedo i Bet-cerec kede i Bet-anat odoko opiigi kun otio tic atek me opii opii.

³⁴Jo Amor rik te diyo jo a Dan atek, ote dwokogi cen i lobo obedo kidikidi; gin mom oyegi me wot i lobo obedo babar.

³⁵Jo Amor rik te cerre acera me bedo i kidi me Kerec, i Aijalon, kede i Caalbim, ento jo me ot a Yucepu rik te bedo diyogi atek, ote doko opiigi kun otio tic atek me opii opii.

³⁶War; lobo a jo Amor te ya i tur ame woto Akarabim, i Cela kun dok kede malo.