Read lango Oŋolkop 10 Bible Online

Oŋolkop 10 - lango bible

Oŋolkop 10

¹Icennere, ŋat ame dok Obaŋa te miyo ya me laro jo Icrael i ŋe Abimeriki te bedo Tola wot a Pua, ame obedo wot a Dodo, dano me Icakar. En onwoŋo rik bedo i Camir, i lobo obedo kidikidi me Epraim.

²En rik te ŋolo kop a jo Icrael pi mwakki pyeraryo wie adek. En te to oko, ote yike i Camir.

³Jair ame obedo dano me Gilead te dok lube. En rik te ŋolo kop a jo Icrael pi mwakki pyeraryo wie aryo.

⁴En onwoŋo rik tye awobe pyeradek, ame gin luŋ oriŋo i kanegi pyeradek. Gin onwoŋo daŋ tye i paccigi ame romo pyeradek, ame olwoŋo ni Kavot-jair tuno kede naka atot tin. Paccigi-nono onwoŋo tye i lobo me Gilead.

⁵Jair rik te to oko, ote yiko kome i Kamon.

⁶Jo Icrael dok te medo timo tim ame nen arac i nyim Rwot, ote cako woro Baal kede Aciterot, ame obedo obaŋe a jo Curia, jo Cidon, jo Moab, jo Ammon, kede me a jo Piriciti. Gin gigi ote weko woro Rwot oko.

⁷Mannono te miyo akemo mako Rwot i kom jo Icrael, te jalogi oko i ciŋ jo Piriciti kede jo Ammon.

⁸I mwaka-nono jo-nono rik te bedo ŋinyo jo Icrael kun owunogi atek. Jo-nono rik te bedo wuno jo Icrael pi mwakki apar wie aboro twal, jo Icrael luŋ ame onwoŋo tye loka Jordan, i lobo a jo Amor ame onwoŋo tye i Gilead.

⁹Jo Ammon rik te ŋolo Jordan me wot lweny i kom Juda, kede Benjamin, kede i kom jo me doggola Epraim; mannono rik te miyo jo Icrael bedo i twon cannoro a mom kobere.

¹⁰Jo Icrael rik dok te kok baŋ Rwot kun okobo ni, “Wan doŋ otyeko balo baŋi, pien wan oweko Obaŋawa oko, ote lunyo woro Baal.”

¹¹Rwot te kobbi jo Icrael ni, “Rik mom alarowu i ciŋ jo Miciri, kede i baŋ jo Amor, jo Ammon, kede jo Piriciti?

¹²Cidon kede jo Amalek, kede jo Moab daŋ rik owunowu, i kare ame ikok wunu baŋa, alarowu i ciŋgi.

¹³Kadi bed amannono, wun giwu iweka wunu oko, ite lunyo woro wunu obaŋe mogo ocele; pi mannono mom dok abino medde larowu kadi acel.

¹⁴Wun doŋ ter kokowu baŋ obaŋe ame rik iyero wunu-naca; gin myero larwu i kare ame itye wunu i can.”

¹⁵Jo Icrael te kobbi Rwot ni, “Wan giwa doŋ otyeko balo, yin myero itim ginnoro keken ame ineno ni ber baŋi ento myero itim ber ilarwa tin.”

¹⁶Gin rik te bolo kite obaŋe ocele luŋ ame onwoŋo rik tye baŋgi, ame obedo me orok, ote cako woro Rwot, eka Rwot yie te waŋ atek pi can a jo Icrael.

¹⁷Jo Ammon rik dok te lwoŋere, ote wot ruko jami lwenygi, ote wot guro gonygi i Gilead, jo Icrael daŋ te cokere, ote wot guro gonygi i Mijipa.

¹⁸Otel a jo Gilead te kop i akinagi kengi kengi ni, “ŋa ce ame bino cako ero lweny i kom jo Ammon? Danonono bino doko aloc ame loo jo ame bedo i Gilead luŋ.”