Read lango Oŋolkop 11 Bible Online

Oŋolkop 11 - lango bible

Oŋolkop 11

¹I kare-nono onwoŋo Jeputa ame obedo dano me Gilead, onwoŋo twon lo moro atek meicel i lweny, cite en onwoŋo obedo atin a dako ame alaya Papa a Jeputa onwoŋo i Gilead.

²Dako a Gilead daŋ te nywalle itino awobe. Kare ame awobe a dako-nono odoŋo, gin te ryemo Jeputa oko, kun okobbe ni, “Yin mom ibino leyo ginnoro i ot a papawa me bedo megi, pien yin ibedo atin a dako ocele.”

³Jeputa oriŋo te wot gire oko i lobo me Tob pi lworo omego mere. Jo mogo ame rik kitegi mom beco te cokere baŋ Jeputa, en te wot kedgi yako jami a jo ocele.

⁴Ame kare pwod okato anonokkoro keken, jo Ammon te ero lweny i kom jo Icrael oko.

⁵Kare ame jo Ammon ocako lweny i kom jo Icrael, odoŋe me Gilead te wot i lobo me Tob, me wot kela Jeputa.

⁶Gin okobbi Jeputa ni, “Bye ibed atel wi monywa me owot olweny i kom jo Ammon.”

⁷Cite Jeputa te kobbi odoŋe me Gilead ni, “Rik mom idaga wunu ite ryema wunu oko i ot a papawu? Kara piŋo tin dok ibino wunu baŋa kun itye wunu kede peko?”

⁸Odoŋe te kobo baŋ Jeputa ni, “Mannono en gin omio tin dok olokere obino baŋi, me iwot kedwa, me owot olweny i kom jo Ammon, me ibed ŋat ame loo jo ame bedo i Gilead luŋ.”

⁹Jeputa te kobbi odoŋe a me Gilead ni, “Ka ce idwoka wunu paco pi lweny i kom jo Ammon, ka ce Rwot omiogi i ciŋa, an abino bedo adwoŋ ame loowu.”

¹⁰Odoŋe me Gilead te kobbi Jeputa ni, “Rwot bino bedo acaden i akinawa; wan obino timo kite ame ikobo-nono ikome.”

¹¹Jeputa rik daŋ te cako wot kede odoŋe me Gilead, lwak te kete bedo ŋat ame loogi kede atel wi monygi. Jeputa rik te kobo koppere luŋ i nyim Rwot i Mijipa.

¹²Jeputa te cwayo kwena baŋ abaka a jo Ammon kun kobo ni, “Kara abalo ŋo baŋi ba, omio yin ibino me lweny i kom lobona nie?”

¹³Abaka a jo Ammon rik te gamo kop okwena a Jeputa ni, “Pien i kare ame jo Icrael bino i lobo me Miciri, gin rik omao lobona oko, cakere i Arnon tuno anaka i kulo me Jabok kato kede a naka i Jordan; tin doŋ myero idwokka lobona kede kuc.”

¹⁴Jeputa dok te cwayo kwena baŋ abaka a jo Ammon,

¹⁵kun kobo ni, “Jeputa okobo ni, ‘Icrael gire rik mom omao lobo a jo Moab, kadi lobo a jo Ammon,

¹⁶ento gin gigi i kare ame rik obino i Miciri, gin rik obedo i dye tim tuno naka i nam Arema, eka gin te kato i Kadec,

¹⁷Icrael rik te cwayo kwena baŋ Edom kun kobo ni, “Tim ber imiwa obe i loboni.” Cite abaka me Edom rik gire te kwero oko. Gin dok te cwayo kwena baŋ abaka me Moab, en daŋ mom te ye. Mannono rik te miyo Icrael bedo gire i Kadec.

¹⁸Gin rik te dupo doŋ beo i dye tim kun omano lobo me Edom kede Moab amana, gin te tuno tutuŋ kide me lobo Edom. Gin te wot guro kemagi loka kulo Arnon tuŋcel. Cite gin gigi rik mom odonyo i lobo me Moab.

¹⁹Jo Icrael rik dok te cwayo kwena baŋ Cikon abaka a jo Amor, ame rik paco mere tye i Kecbon, kun kobbe ni, “Tim ber imiwa obe i loboni”.

²⁰Ento Cikon rik mom te bedo kede gennoro i kom jo Icrael me miyogi beo i lobo mere, Cikon rik te coko jo mere luŋ karacel, ote wot guro kemagi i Jakaj, te lweny i kom jo Icrael.

²¹Obaŋa a jo Icrael te miyo Cikon karacel kede Lwakkere luŋ i ciŋ jo Icrael, omio ote loyogi oko. Mannono te miyo jo Icrael gamo lobo a jo Amor luŋ bedo megi, ame gin obedo jo a rik onwoŋo bedo i lobo-nono.

²²Gin te gamo lobo a jo Amor luŋ, cakere i kulo me Arnon tuno anaka i kulo Jabok kede dok cakere i tim tuno naka i Jordan.

²³Rwot Obaŋa rik te ryemo jo Amor kittono, kun ryemogi i nyim jo Icrael. Aman wun jo Ammon imito wunu gamo lobogi-nono me bedo megwu?

²⁴Wun mom ibino wunu gamo wunu lobo ame obaŋawu Kemoc omiowu me bedo megwu? Pi mannono, lobo luŋ ame Rwot Obaŋawa oryemo jo iye i nyimwa, wan obino gamo bedo megwa.

²⁵Aman wun itamo wunu ni ikato wunu Balak wot a Jipor, abaka me Moab? Rik en koŋ otubere i jo Icrael? Aŋar onyo rik olwenyo kedgi?

²⁶I kare ame rik Icrael bedo i Kecbon kede i pacci luŋ omano laŋete, karacel kede i Aroer kede pacci luŋ omano laŋete, karcael kede pacci luŋ ame onwoŋo tye i dog kulo me Arnon pi mwakki mia adek twal, piŋo kara rik mom imao wunu i kare-naca?

²⁷Pi mannono, an gira mom atimo balloro baŋi, yin en ame itimo rac me ero lweny i koma. Rwot en ame Aŋolkop, myero en tin ŋol kop ame tye i akina Icrael kede Ammon.’ ”

²⁸Cite abaka a jo Ammon mom gire te keto cunye i kwena ame Jeputa ocwaye.

²⁹Cuny a Rwot rik te bino i kom Jeputa, en te wot beo i dye Gilead kede i Manace, te kato i Mijipa me Gilead, ote ya i Mijipa me Gilead kato anaka i kom jo Ammon.

³⁰Jeputa rik te kwon baŋ Rwot kun kobo ni, “Ka ce ibino miyo jo Ammon i ciŋa,

³¹ŋat ame bino donnyo i doggola moro me oda me bino rwatte keda i kare ame adwogo a kun doŋ aloo jo Ammon, dano-nono bino bedo mea Rwot, abino miyo dano-nono me mot awaŋa.”

³²Jeputa rik dok te kato loka baŋ jo Ammon me wot lweny kedgi, Rwot daŋ te miyogi i ciŋe.

³³En rik te nekogi cakere i Aroer tuno kede i lobo ame ceggi kede Minit, pacci adito mege pyeraryo, tuno kede anaka i Abelkeramim kun nekogi atek meicel. Obaŋa rik te miyo jo Icrael loyo jo Ammon kittono.

³⁴Jeputa rik doŋ te dok cen i paco mere i Mijipa. Nen ba, i kare ame en abino, nyare obino me rwatte kede kun amyel ame ayeŋo ajaa. Nyare-nono onwoŋo tye en kene aboŋo ominnere moro, akadi aminnere.

³⁵Kare ame en oneno nyare, oyeco boŋŋi mere kenekene, kun kobo ni, “Oido, nyara! Idwoka piny meicel, man yin doŋ idoko gin ame okelo peko adwoŋ meicel i koma. Nen an onwoŋo doŋ atuco doga oko baŋ Rwot, ame mom dok atwero loko gin ame akwoŋo.”

³⁶Nyare te kobbe ni, “Apap wee, ka doŋ ityeko tuco dogi oko baŋ Rwot, myero doŋ itim i koma gin ame dogi otyeko kobo, pien Rwot doŋ otyeko cuŋ kwor i kom jo Ammon ame gin okworri.”

³⁷Dok te medo kobbi pappere ni, “Koŋ imi gin man timere pira, koŋ iweka pi dwete aryo, me koŋ awot aloloŋo wi kiddi, awot akok, akum pi tidina, an karacel kede anyira wadwa.”

³⁸Pappere te gamo ni, “Wot giri.” En te cwayo nyare wot pi dwete aryo. Nyare kede owote mere te wot kok atek i wi kiddi kun okumo pi tidi mere.

³⁹Kare ame dwete aryo doŋ otum oko, en odwogo paco baŋ pappere, pappere te time kite ame rik okwoŋo kede. Nyannono onwoŋo mom ru oŋeye kede ico moro kadi acel. Mannono doŋ te lokere doko kit gin ame otimo iyi Icrael;

⁴⁰anyira a jo Icrael doŋ woto mwaka i mwaka me wot kumo pi nyaka a Jeputa, ame obedo dano me Gilead. Gin rik kumo nino aŋwen i mwaka acel acel.