Read lango Oŋolkop 12 Bible Online

Oŋolkop 12 - lango bible

Oŋolkop 12

¹Jo Epraim rik te lwoŋere, ote wot ruko jami lwenygi, ote kato loka Jordan, naka i Japon, ote wot kobbi Jeputa ni, “Piŋo kara iwoto me wot lweny i kom jo Ammon kun mom ilwoŋowa owoto karacel kedi? Wan owaŋi oko i odi.”

²Jeputa te gamo doggi ni, “An karacel kede jona yam onwoŋo odagere atek kede jo Ammon; kare ame an alwoŋowu, wun mom ilarowa wunu i ciŋgi.

³Kare ame aneno ni mom itwero wunu lara, an rik doŋ ate jalo koma, ate kato loka ca i kom jo Ammon, eka Rwot te miyogi i ciŋa. Kara piŋo tin dok ibino wunu baŋa me romo keda?”

⁴Jeputa rik te coko jo Gilead luŋ, te lweny i kom jo Epraim; jo Gilead te loyo jo Epraim oko, pien onwoŋo jo Epraim okobo ni, “Wun jo Gilead ame ibedo wunu i akina jo Epraim kede Manace, wun ibedo wunu jo Epraim ame rik iriŋo wunu ilaro wunu komwu.”

⁵En omio jo Gilead te mako dog kulo Jordan oko, me geŋo jo Epraim. Doŋ ka ŋattoro i kom jo Epraim ame ariŋo oko okobo ni, “Weka wunu awot leka-ca”, jo Gilead penye ni, “Yin i dano me Epraim?” Ka en ogamo ni “Pe gire”,

⁶gin kobo ni, “Aco koŋ ikob ni Sibolet”, en daŋ te kobo ni “Cibolet”, pien en mom twero lwoŋo kakare. Gin omake ote neke oko i dog kulo me Jordan. Jo Epraim rik te to i nino-nono ame romo tutumia pyeraŋwen wie aryo.

⁷Jeputa obedo aŋol kop a jo Icrael pi mwakki abicel. Kare ame Jeputa ame obedo dano me Gilead oto, oyike i paco mere i Gilead.

⁸Icennere aŋol kop a jo Icrael te bedo Ibijan ame en dano me Beterekem,

⁹En rik onwoŋo tye kede awobe mere pyeradek, kede anyira mere daŋ pyeradek, ame en rikomio onyomogi luŋ iyi atekere ocele. Awobe mere daŋ te nyommigi anyira me atekere ocele. En rik oŋolo kop iyi Icrael pi mwakki abiro.

¹⁰Kare ame Ibijan oto, oyike i Beterekem.

¹¹Ŋat a rik dok te lube acalo aŋol kop a jo Icrael te bedo Elon ame obedo dano me Jabulon. En oŋolo kop a jo Icrael mwakki tomon.

¹²Kare ame Elon dano me Icrael oto, oyike i Aijalon i lobo a jo Jabulon.

¹³Icennere, aŋol kop a jo Icrael te bedo Abudon wot a Kilel ame obedo dano me Piraton.

¹⁴En rik onwoŋo tye kede awobe mere pyeraŋwen kede ikwae pyeradek, ame gin luŋ rik oriŋo kede kanegi pyerabiro. En rik te ŋolo kop a jo Icrael pi mwakki aboro,

¹⁵Abudon wot a Kilel ame obedo dano me Piraton dok te to oko, ote yike i Piraton, i lobo a jo Epraim, i lobo a jo Amalek ame obedo kidikidi.