Read lango Oŋolkop 13 Bible Online

Oŋolkop 13 - lango bible

Oŋolkop 13

¹Jo Icrael rik dok te medo timo gin anen arac i nyim Rwot, Rwot rik te miyogi i ciŋ jo Piriciti pi mwakki pyeraŋwen.

²Lo moro rik onwoŋo tye i Jora, ame en dano me atekere a Dan ame nyiŋe Manoa. Dako mere rik onwoŋo oraŋa, onwoŋo mom tye kede atinnoro.

³Amalaika a Rwot onen baŋ dakonono te kobbe ni, “Nen ba, yin ibedo oraŋa ame mom itye kede atinni moro, ento ibino yac, ibino nywalo atin awobi.

⁴Pi mannono, myero igwokere kur imat koŋo olok, akadi kit kono moro ame mero dano, kur daŋ icam ginnoro ame cik ogeŋo,

⁵pien ibino yac, ibino nywalo atin awobi. Lyedi mom biŋo gudo wie pien en bi no bedo atin akwera ame tye pi Obaŋa cakere i yic, en dok bino cako laro jo Icrael i ciŋ jo Piriciti.”

⁶Dako-nono te wot titto koppono baŋ cware ni, “Dano Obaŋa obino baŋa kun waŋe nen calo waŋ amalaika Obaŋa, iyiliyili meicel. Mom apenyo kan ame en oya iye dok daŋ mom otuca nyiŋe;

⁷cite en okobba ni, ‘Nen ba, ibino yac, ibino nywalo atin awobi, pi mannono, kur imat koŋo olok, akadi kit koŋo moro ocele ame mero dano, pien atinnono bino bedo atin akwera ame tye pi Obaŋa cakere i yic tuno kede i nino me to mere.’ ”

⁸Manoa rik te kwayo Rwot kun kobo ni, “Ama Rwot, tim ber imi dano Obaŋa ame rik icwao ca dwog baŋwa, me bin pwonywa i gin a myero oti i kom awobi ame wan obino nywalo.”

⁹Obaŋa rik daŋ te winyo kwac a Manoa, amalaika mere te dok dwogo baŋ dako a Manoa i poto, kun cware onwoŋo mom tye kede kuno.

¹⁰Dako te riŋo oyotoyot baŋ cware, te wot kobbe ni, “Dano ame rik koŋ obino baŋa ca, aman dok onen baŋa.”

¹¹Manoa te ya wot lubo dako mere, kare ame otuno baŋ dano-nono, openye ni, “Yin ibedo dano ame rik okobo kede dako man?” En te gamo ni, “An ennono.”

¹²Manoa te kobo ni, “Ka kop ame ikobo bino cobere kakare, atinnono myero bed kede kit kwo aŋo dok daŋ en myero ti tic aŋo?”

¹³Amalaika a Rwot te kobbi Manoa ni, “Myero dako gwokere i ginnoro luŋ ame doŋ atyeko kobo baŋe.

¹⁴En myero kur cam ginnoro ame oya i kom olok, kur daŋ mat koŋo olok, akadi kit koŋo moro ocele ame mero dano, onyo ginnoro ame cik ogeŋo. En myero lub ginnoro luŋ ame rik acike iye.”

¹⁵Manoa te kobbi amalaika a Rwot, ni, “Tim ber, koŋ amii igal anonok ba, anekki koŋ atin dyelloro.”

¹⁶Cite amalaika a Rwot te kobbi Manoa ni, “Kad i bed imia agal, cite mom abino camo cemwu. Aco ka ce iyiko motoro me awaŋa, myero imi baŋ Rwot.” (Pien Manoa onwoŋo rik mom ŋeo ni en obedo amalaika a Rwot.)

¹⁷Manoa te penyo amalaika a Rwot ni, “Nyiŋi kara ŋa ba, me wek ka kop ame ikobo ocobere kakare, omi kwogo baŋi?”

¹⁸Amalaika a Rwot te kobbe ni, “Pino kara ipenyo nyiŋa, aco kun nyiŋa obedo me awura meicel?”

¹⁹Manoa rik te tero atin dyel karacel kede mot me moko kwon, te wot yalo i Rwot i wi lela, baŋ Rwot ame tio gin awura.

²⁰Kare ame leb mac olyel owikino malo i polo kun ya i kom keno lam, amalaika a Rwot te yito malo i kom mac i keno lammono, kun Manoa kede dako mere tye aneno. Gin te rette piny aryeba cuny.

²¹Amalaika a Rwot mom dok te nen baŋ Manoa kede dako mere. Mannono en ame te miyo Manoa niaŋ ni en kara onwoŋo obedo amalaika a Rwot.

²²Manoa te kobo baŋ dako mere ni, “Ateni, wan gire oto oko, pien wan oneno Obaŋa.”

²³Cite dako mere te kobo ni, “Kono onwoŋo Rwot oyikere me nekowa, kono gire mom ogamo mot awaŋawa kede mot me moko kwon ame omie, dok daŋ kono mom onyuttiwa kop magi luŋ, akadi tucciwa kop acalo magi.”

²⁴Kare ame dako-nono onywalo wode, ocako nyiŋe Camcon. Awobi-nono rik te doŋo kun Rwot mie winyo.

²⁵Cuny a Rwot rik te cako tic oko i kome i Gony a Dan ame onwoŋo rik tye i akina Jora kede Ecitaol.