Read lango Oŋolkop 14 Bible Online

Oŋolkop 14 - lango bible

Oŋolkop 14

¹Camcon rik te wot naka i Timna, te wot neno nyako moro kuno ame obedo nya jo Piriciti.

²Kare ame en odwogo paco, otitto koppere baŋ pappere kede tottere ni, “Aneno nyako moro i Timna ame obedo nya jo Piriciti; nyomma wunu en me bed dakona.”

³Cite pappere kede tottere te kobbe ni, “Nyannoro doŋ mom bo i akina anyira a wattini, onyo i akina rokwa luŋ, ame mio yin dok iwoto nyomo dakoni i baŋ jo Piriciti a mom lirre-nono?” Ento Camcon te kobbi pappere ni, “Nyomma gira nyannono, pien oyomoro cunya meicel.”

⁴Pappere kede tottere onwoŋo mom oŋeo ni koppere oya i baŋ Rwot, kun onwoŋo tye ka yenyo kare moro me lweny i kom jo Piriciti, ame gin en a rik i kare-nono obedo loyo jo me Icrael.

⁵Camcon rik te wot i Timna karacel kede pappere kede tottere. Kare ame gin otuno i potti olok ame onwoŋo tye i Timna, atin eŋatu moro te mor i kome.

⁶Cuny a Rwot te bino i kome kede tek, te miyo en yeyeco atin eŋatunono oko kite ame dano yeyeco kede atin dyel, kun onwoŋo gire mom omako ginnoro i ciŋe. En rik mom te tucci pappere onyo tottere gin ame etimo.

⁷I kare ame gin tye kuno, en olato baŋ nyannaca, ame te yomoro yi Camcon meicel.

⁸I ŋe kare anonok, en te dok baŋ nyannaca me wot moko nyomgi, en koŋ te gak me wot neno kom eŋatu a rik ca, cite nen ba, kic apipim onwoŋo tye oŋinne i kom eŋatu-nono kun moo kic daŋ tye iye.

⁹En te toto moro mako i ciŋe, te wot kede kun camo. Kare ame en otuno baŋ pappere kede tottere, en omiogi daŋ moro aduno, gin daŋ te camo; cite en mom okobbigi ni etoto i kom eŋatu ame oto.

¹⁰Papa a Camcon te wot doŋ baŋ nyako-naca, Camcon te tedo arama kuno, pien mannono en gin ame rik awobe timo.

¹¹Kare ame lwak me kuno onene, gin okelo jo ocele pyeradek me bino galo waŋe.

¹²Camcon okobo baŋgi ni, “Koŋ apenywu i kocca moro ni ba; ka ce itwero gonnya wunu tere a mom ru nino abiro me arama-ni otum, kun ŋat ogonyo-nono ogonyo kakare, abino miyowu boŋŋi camanini pyeradek kede boŋŋi abeco me aruka i nino adoŋo daŋ ame romo pyeradek.

¹³Cite ka gonyo tere oloowu oko, wun ibino miya wunu boŋŋi camanini pyeradek, kede boŋŋi abeco me aruka i nino adoŋo daŋ ame romo pyeradek.” Gin te kobbe ni, “Aco koŋ doŋ i kob koccinono wan owiny.”

¹⁴En te kobbigi ni, “I kom amwod jo oya iye cam. I kom atekom oya iye twon ginnoro alim.” Gin te tyeko nino adek kun mom oromo gonyo tyen koc a Camcon.

¹⁵I nino me aŋwennere gin te kobbi nyako ame Camcon anyomo ni, “Bibito cwari me tucciwa tyen koccono, me kur owaŋ i oko kede mac, yin karacel kede ot a pappi. Ilwoŋowa wunu kan me bino yako wunu jamiwa bo?”

¹⁶Nyako ame onwoŋo Camcon anyomo te wot kok i nyim Camcon kun kobo ni, “Yin gire idaga, mom imara kadi acel; koŋ inen yin ikobbi jo me turwa koc, aco kono mom itucca tere.” En te kobbe ni, “Nen ba, an mom akobbi pappa kede totta, itamo ni atwero titti?”

¹⁷En te bedo kok i nyime pi nino kany wie aryo ame aramagi ori kede. I nino me kany wie aryo mere, en te titte tere oko, pien en onwoŋo doŋ odie meicel. Nyannono te wot kobbi jo me turgi koccono oko.

¹⁸I nino me abiro, jo me boma-nono rik doŋ te kobo baŋ Camcon kun ceŋ mom ru opoto ni, “Ŋo a dok lim kato moo kic? Ŋo a kome tek kato eŋatu?” Camcon te kobbigi ni, “Kono mom ibedo pur wunu iroana, kono mom igonyo wunu te kocca.”

¹⁹Cuny a Rwot rik te bino i kome kede tek. En te wot i Acikelon, te wot neko jo pyeradek, te yako jamigi, te miyo boŋŋigi abeco me aruka i nino adoŋo baŋ jo ame ogonyo te koccere; en te doŋ dok paco i ot a pappere kun akemo ociro oko,

²⁰Aco nyako ame Camcon rik onwoŋo anyomo ote lunyo miyo baŋ awottere ame onwoŋo olwoke.