Read lango Oŋolkop 15 Bible Online

Oŋolkop 15 - lango bible

Oŋolkop 15

¹Ame kare pwod okato anokkoro keken, kare me kayo ŋano, Camcon owoto me wot limo nyako ame enyomo kun otero daŋ atin dyel. En okobo ni, “Abino donyo baŋ dakona iyi icika.” Cite pappa a nyako mom te ye ni en dony.

²Papa a nyako te kobo ni, “An onwoŋo doŋ atamo ni yin ikwerre oko, omio an ate miye baŋ awotti oko, ame rik onwoŋo olwoki. Aminnere atidi ber kate oko, tim ber iluny doŋ tero akakare.”

³Camcon te kobbigi ni, “Man doŋ balloro gire mom bi no bedo i wia ka ce atimo ginnoro arac i kom jo Piriciti.”

⁴Camcon te wot mako ekwe mia adek, te daŋ kwanyo rao; en te bedo lolokogi kun mio yib man tikere kede me awottere, te tweyo rao i yibgi kun gin luŋ doŋ otweogi aryo aryo.

⁵Camcon te cwinyo mac i kom rao, te weko ekwe riŋo kede i potti ŋano a jo Piriciti ame mom ru okakao. Mac te wano arita luŋ ame onwoŋo otwetweo kede ŋano luŋ ame onwoŋo mom ru okao, anaka potti olok-gi kede me jeituni.

⁶Jo Piriciti te kobo ni, “Ŋa kara otimo man?” Jo te kobo ni, “Camcon, ame obedo or lo moro me Timna, pien en omio nyako ame rik onwoŋo en anyomo baŋ awottere ame onwoŋo rik olwoke.” Mannono te miyo jo Piriciti bino waŋo nyannono oko kede mac karacel kede pappere.

⁷Cite Camcon te kobbigi ni, “Ka ce gin itimo wunu ene, akwoŋo akwoŋa ni abino culo kwor i komwu, en amio cunya te cayo koppere.”

⁸En te cocobogi oko, te nekogi meicel, en te wot bedo i akina lela me Etam ame obarre.

⁹Jo Piriciti rik te bino guro kemagi i Juda, gin te cako lweny i Leki.

¹⁰Jo Juda te kobo ni, “Piŋo kara ibino wunu me lweny i komwa?” Gin te gamo ni, “Wan obino tweyo Camcon, me wek wan daŋ otime kite ame otimowa kede.”

¹¹Jo Juda tutumia adek te wot i lela me Etam ame obarre, ote kobbi Camcon ni, “Yin mom iŋeo ni jo Piriciti en ame tye ka loyowa? Kara man ŋo ame yin itimo i komwa-nie?” Camcon te gamo doggi ni, “Kite ame gin rik otima kede, en ame an daŋ atimogi kede.”

¹²Gin te kobbe ni, “Wan obino tweyi, miyi i ciŋ jo Piriciti.” Camcon te kobbigi ni, “Koŋ ige kwoŋ wunu baŋa ni mom wun en ibino neka wunu.”

¹³Gin te gamo ni, “Pe gire; wan otweyi atwea keken, owot miyi i ciŋgi.” Gin te tweye kede tol aryo anyen, ote kele oko i lela.

¹⁴Kare ame en otuno i Leki, jo Piricitite bino me bino rwatte kede kun owoo i redo. Cuny a Rwot rik te bino i kome kede tek, tol ame onwoŋo rik otweo i ciŋe te doko calo tol tworo ame mac owaŋo, te cako cocota oko i ciŋe.

¹⁵En te cop i cogo moro me itinyo kana ame mom ru operakino wok, te cwayo ciŋe kwanyo, eka te neko i jo tutumia twal.

¹⁶Camcon te kobo ni, “Cogo itinyo kana, omio kom jo oradde awu awu, cogo itinyo kana, omia aneko jo tutumia.”

¹⁷Kare ame en doŋ otyeko kobo koppere, obolo cogo itinyo kana i ciŋe piny; te cako nyiŋ kabedo-nono ni Ramat-leki.

¹⁸Oryo pii te cako cire atek meicel, en te cako bako doge baŋ Rwot kun kobo ni, “Nen, yin doŋ ityeko miyo ciŋ amironi oloo twon lweny adwoŋ kit man; doŋ myero oryo pii en amia ato, kun mia apoto i ciŋ jo ame mom oliro?”

¹⁹Obaŋa te miyo wan kan atwolo yabere i kom kidi ame tye i Leki, pii te mollo iye. Kare ame en doŋ otyeko mato, cunye doŋ te dwogo, te dok limo teko. Mannono omio ocako nyiŋ kabedo-nono ni, En-akore, pwod tye amannono naka atot tin.

²⁰Camcon obedo aŋolkop a jo Icrael pi mwakki pyeraryo, i kare a jo Piriciti.