Read lango Oŋolkop 16 Bible Online

Oŋolkop 16 - lango bible

Oŋolkop 16

¹Nino moro Camcon owoto i Gaja, en te wot neno alaya moro kuno, te wot buto baŋe.

²Kop man rik te winyere oko baŋ jo me Gaja, ni, “Camcon obino kan.” Jo Gaja te guro kabedo-nono oko, ote bedo ki ye dyewor benebene i dogcel me boma. Gin obedo liŋ aliŋa dyeworrono luŋ kun omuno amuŋa ni, “Koŋ okur wunu piny ru, ote doŋ neke.”

³Cite Camcon te buto gire kuno naka i cuny dyewor, te ya oko i kuno, te wot mako dogcel me boma-nono kede pagi mere aryo luŋ, te telo puto oko luŋ naka kede arii me cego, te yeyo i wi gwoke, tero naka i wi kidi ame tye i nyim Kebron.

⁴I ŋe man en dok te cako mito dako moro ame onwoŋo tye i luŋ me Corek, ame nyiŋe Delila.

⁵Rwode a jo Piriciti te bino baŋ dako-nono, ote kobbe ni, “Tim ber ibwolliwa lonnono, me inen kan ame teko mere adwoŋ wok-ki tye iye, kede yo aŋo a myero oloc kede, ame twero miyo wan otwee ote loye oko, Wan luŋ ŋat acel acel bi no miyi ryal tutumia acel kede mia acel.”

⁶Delila te cako kobbi Camcon ni, “Tim ber imia aŋe kan ame tekoni adwoŋ wok-ki tye iye kede yo aŋo ame otwero tweyi kede eka ote loyi oko.”

⁷Camcon te kobbe ni, “Ka ce otwea kede toli anyen kany wie aryo, ame mom ru otwo, abino doko agoro calo dano moro keken.”

⁸Rwode a jo Piriciti te kelle toli anyen me atera kany wie aryo, amom ru otwo, Delila te tweyo kede Camcon.

⁹I kare-nono onwoŋo en tye kede jo ame en omio opono iyi icika mere me kiye. En te kobbi Camcon ni, “Camcon, neno jo Piriciti obino oko i komi!” Cite en gire te codo toli oko luŋ bala uci boŋo ka mac ogudo. Mannono mom te miyo kan ame teko mere tye iye ŋeye.

¹⁰Delila te kobbi Camcon ni, “Koŋ inen doŋ kite ame ituko kede, ikobba giri kop me goba. Tim ber ikobba kite ame myero tweyi kede.”

¹¹En dok te kobbi Delila ni, “Ka ce otwea i toli anyen ame mom ru otio kedgi, abino doko goro acalo dano moro keken.”

¹²Delila dok te kwanyo tol anyen, te tweye kede, eka te kobbe ni, “Camcon, neno jo Piriciti obino oko i komi!” Jo onwoŋo tye opono icika mere me kiye. En te codo toli oko i bade bala uci.

¹³Delila dok te kobbi Camcon ni, “Koŋ inen pwod imedde giri tuko kede atuka naka aman, ikobba giri dok kop me goba. Tim ber ikobba kite ame myero twei kede.” Camcon te kobbe ni, “Ka ce imako dog yer wia abiro-ni, ikedo i kom boŋo ame it ye ka cweyonono, ite rido kede yat, abino doko goro calo dano moro keken.”

¹⁴Mannono omio i kare ame en onino, Delila omako dog yer wie abiro ca, te kedo oko i kom boŋo ame onwoŋo en tye ka cweyo. En te kobbi Camcon ni, “Camcon neno jo Piriciti tye abino i komi!” Camcon te co oko i wan nino, te putogi luŋ karacel kede yer wie ame onwoŋo okedo karacel kede i wi boŋo ame onwoŋo nyannono obedo cweyo.

¹⁵Delila dok te kobo ni, “Kara doŋ itwero kobo nino, ni, ‘Amari’, kun iyi ateni cunyi mom gire i koma? Nen aman doŋ ibedo tuko keda atuka odoko tyen adek twal kun mom ikobba kan ame twon tekoni adwoŋ wok-ki tye iye.”

¹⁶Kare ame nya-nu obedo didde nino i nino kun die atek meicel, omio cunye daŋ te mito to.

¹⁷En doŋ te yabbi Delila kop i cunye ducu, te kobbe ni, “Lyedi mom ru ogudo wia; pien an abedo dano akwera ame tye pi Obaŋa cakere iyi totta. Doŋ ka kono lyel yer wia, te kona ya oko i koma, ate doŋ doko ŋat agoro, ate doko calo dano moro keken.”

¹⁸Kare ame Delila doŋ oneno ni en otyeko yabbe kop i cunye luŋ, en ocwao kwena olwoŋo rwode a jo Piriciti kun kobbigi ni, “Koŋ dok ibin wunu tyen acel keken, pien doŋ otyeko yabba kop luŋ i cunye.” Rwode a jo Piriciti daŋ te bino i limgi i ciŋgi.

¹⁹Delila te miyo Camcon nino i tyene, te lwoŋo lo moro bino lyelo dog yer wie abiro ca oko. Delila te cako ti mo bala wuwuno en, teko mere te ya oko i kome.

²⁰Delila te kobbe ni, “Camcon, neno jo Piriciti tye abino i komi.” Camcon te co oko i wan nino kun tye atamo ni, “Abino donyo oko kite a yam abedo timo, ate tenogi oko teŋe.” En onwoŋo mom ŋeo ni Rwot doŋ otyeko we ke oko.

²¹Jo Piriciti te make, ote kokolo waŋe oko, ote tere naka i Gaja. Gin te tweye kede jegere me mola. En te bedo rego kai i buc.

²²Yer wie ame rik olyelo cate cako lot.

²³I kare-nono rwode me Piriciti te cokere karacel me miyo motgi baŋ Dagon, ame obedo obaŋagi, kede dok me bedo kade lelo i nyime. Pien gin onwoŋo okobo ni, “Obaŋawa doŋ omio akworwa Camcon i ciŋwa.”

²⁴Ka lwak jo Piriciti onene, opako obaŋagi kun kobo ni, “Obaŋawu doŋ omio akworwa Camcon i ciŋwa, lo ame onwoŋo obalo lobowa oko, oneko jowa apol meicel.”

²⁵Kare ame cunygi doŋ yom atek, gin te kobo ni, “Lwoŋ Camcon me bin tuk tuko moro i nyimwa ogal kede waŋwa.” Rik daŋ ote lwoŋo Camcon i ot buc, en te bedo tuko i nyimgi. Gin te weke cuŋ i akina pagi aryo.

²⁶Camcon te kobbi awobi ame onwoŋo apeye ni, “Koŋ iwek ciŋa me aboŋ pagi ame teko a ot ocuŋ i komgini, me koŋ ajeŋere i komgi.”

²⁷I cawanono onwoŋo jo pol atek i ot, co kede mon; rwode a jo Piriciti luŋ onwoŋo rik daŋ tye kuno, aco i wi ot malo onwoŋo tye iye co kede mon ame romo tutumia adek, ame onwoŋo tye aneno tuko ame Camcon atuko.

²⁸Camcon rik te kok baŋ Rwot kun kobo ni, “Ama Rwot Obaŋa, tim ber ipo pira, tim ber imia tekkom tyen acel-li doŋ keken, ama Obaŋa, me acul kwor i kom jo Piriciti pi waŋa acel keken.”

²⁹Camcon te mako pagi aryo ame onwoŋo tye i dye ot, ame teko me ot luŋ ocuŋ i komgi, te luŋo teko mere luŋ i komgi kun ciŋe tuŋcam omako pagi acel, eka me tuŋcem te mako pagi ocele.

³⁰Camcon te kobo ni, “Wek doŋ ato karacel kede jo Piriciti.” En doŋ te telle i teko mere luŋ, ot te rette oko piny i kom rwode luŋ kede jo luŋ ame rik tye iye. Man te miyo jo ame en oneko i kare me to mere obedo abup ame kato jo ame en oneko con i kare me kwo mere.

³¹Omego mere kede jo me doggolagi luŋ te bino kwanyo kome, ote tero wot yiko i akina Jora kede Ecitaol, i lyel a pappere Manoa. En rik obedo aŋolkop a jo Icrael pi mwakki pyeraryo nono.