Read lango Oŋolkop 17 Bible Online

Oŋolkop 17 - lango bible

Oŋolkop 17

¹Rik tye lo moro i lobo obedo kidikidi me Epraim, nyiŋe Mika.

²En rik okobbi tottere ni, “Cekel me ryal tutumia acel kede mia acel ame rik okwalo i baŋi ca, ame rik ikobo ni iceno dano pire ca kun ikobo ame an awinyo, limmono tye baŋa, an en onwoŋo akwanyo.” Tottere te kobbe ni, “Rwot omii winyo, woda,”

³En te dwoko cekel me ryal tutumia acel kede mia acel ca baŋ tottere. Tottere te kobo ni, “An doŋ atyeko jalo ryal man oko baŋ Rwot kun amie pi woda, gin ame oya i ciŋa, me tiyo cal apaa kede cal atwaka. Pi mannono ba, aman doŋ an abino dwoko oko baŋi.”

⁴Mannono omio i kare ame en odwoko limmono baŋ tottere, tottere okwanyo ryal ame romo cekel mia aryo, te miyo baŋ atet ryal, ame te tiyo kede cal apaa kede cal atwaka. Callono te bedo i ot a Mika.

⁵Mika rik onwoŋo tye kede ot me woro obaŋa, en te tiyo epod kede terapim, te daŋ keto wode acel me bedo alamdoggere.

⁶I kare-nono onwoŋo jo Icrael mom tye kede abaka moro; dano acel acel onwoŋo timo gin ame en oneno ni ber baŋe.

⁷I kare-nono onwoŋo tye atin awobi moro me Beterekem i Juda, ame en dano me atekere a Juda, ame en rik Alevi; en daŋ onwoŋo rik bedo kuno.

⁸Dano-nono rik te ya oko i Beterekem i Juda, me wot bedo kannoro ame ebino nwoŋo iye kabedo. I kare ame en owoto, otuno i lobo obedo kidkidi me Epraim, i ot a Mika.

⁹Mika te penye ni, “Kara yin iya i kwene?” En te dokke ni, “An abedo Alevi me Beterekem i Juda, doŋ an atye awot kannoro keken ame abino nwoŋo iye kabedo.”

¹⁰Mika te kobbe ni, “Yin doŋ bed keda kan, yin ibino bedo pappa kede alamdogga, an abino miyi ryal aromo cekel apar mwaka i mwaka, kede boŋŋi me arukani; dok daŋ abino gwoki.”

¹¹Dano-nono te ye bedo baŋ Mika; atin awobi-nono te doŋ doko calo ŋat acel i akina awobe mere.

¹²Mika te keto dano me atekere Alevi-nono me bedo alamdoggere, en doŋ te bedo i ode.

¹³I kare-nono Mika te kobo ni, “Aman doŋ aŋeo ni Rwot bino bedo keda aber, pien dano ame Alevi en a doŋ obedo alamdogga.”