Read lango Oŋolkop 18 Bible Online

Oŋolkop 18 - lango bible

Oŋolkop 18

¹I kare-nono onwoŋo jo Icrael mom tye kede abaka; dok daŋ i kare-nono onwoŋo atekere a jo Dan tye ka yenyo lobo me alea me bedo megi, me obedo iye, pien gin onwoŋo rik mom ru onwoŋo lobo moro me bedo megi i akina jo Icrael.

²Mannono rik te miyo jo Dan cwayo jo abic aryek i akina atekeregi luŋ, jo ame oya i Jora kede jo ame oya i Ecitaol, me wot roto lobo kede ŋiyo aber. Gin te kobbigi ni, “Wot irot wunu lobo.” Gin te wot i lo bo a jo Epraim ame obedo kidkidi i ot a Mika ote wot buto kuno.

³I kare ame gin tye i ot a Mika, gin oŋeo dwon Alevi atidi ca oko; gin olokore baŋe ote kobbe ni, “Yin kara ŋa okelli kan? Ŋo kara ame yin itimo kan? Tic aŋo ame yin itio kan?”

⁴En te kobbigi ginnoro luŋ ame Mika otimo baŋe i yore i yore, kun kobo ni, “En aye cula kun an atio baŋe acalo alamdog.”

⁵Gin te kobbe ni, “Tim ber koŋ doŋ ipeny Obaŋa, me oŋe ka wotwa-ni bino cobere aber.”

⁶Alamdog te kobbigi ni, “Wot giwu kede kuc. Rwot gire tye aciko waŋe i wotwu-nono.”

⁷Jo abiccono te ya wot oko, ote tuno i Laic, ote neno jo ame onwoŋo tye kuno, kite ame gin bedo kede mot bala jo me Cidon ame bedo gigi mot, kun wigi owil oko i ginnoro luŋ, dok daŋ mom tye ginnoro me lobo ameremogi, gin olonyo atek; gin onwoŋo tye kannabor i jo Cidon, dok mom daŋ onotte i jo moro ocele.

⁸Kare ame gin otuno baŋ omegogi i Jora kede i Ecitaol, omegogi openyogi ni, “Idwogo wunu kede amut aŋo?”

⁹Gin te dok iye ni, “Ya wunu oko me owot wunu i komgi pien wan oneno lobo ca, nen ba, lobo mere mwonya meicel. Mom ibino timo wunu ginnoro pire? Kur daŋ dok iŋiŋinya wunu me wot kuno, me iwot idony wunu iye, igam wunu bed lobowa.

¹⁰Ka iwoto wunu kuno, ibino nwoŋo wunu jo moro kuno ame bedo kun wigi owil oko i ginnoro luŋ. Lobo mere lac; Obaŋa otyeko miyo lobo-nono oko i ciŋwu, kan ame ginnoro luŋ ame tye i lobo tye iye.”

¹¹Eka jo Dan mia abicel ame orukere i jami lweny te ya oko i Jora kede i Ecitaol,

¹²ote wot, wot guro gonygi i Kiriat-jearim i Juda. Pi kop man omio nyiŋ kabedo-nono olwoŋo ni Gony a Dan naka atot tin. Nen ba, kabedonono tye i ŋet Kiriat-jearim tutuŋ to.

¹³Gin te kato oko i kuno, ote wot i lobo a jo Epraim obedo kidkidi, ote tuno i ot a Mika.

¹⁴Jo kany a rik owoto roto lobo me Laic ca te kobbi omegogi ni, “Wun iŋeo wunu ni epod, terapim, cal ame opao apaa kede ame otwako atwaka tye i udi man? Pi mannono, aman koŋ doŋ itam wunu gin ame ibino timo wunu.”

¹⁵Gin te gak wot kuno, ote tuno i ot Alevi moro ame onwoŋo tye i paco a Mika, gin te penye ka ce en tye aber.

¹⁶Jo Dan mia abicel ca ame orukere oko i jami lwenygi ca, onwoŋo tye ocuŋ i dogcel me paco a Mika;

¹⁷kun jo kany a rik owoto oroto lo bo ca okato malo, ote wot kwanyo cal ame opao apaa, epod, terapim, kede cal ame otwako atwaka. Alamdog onwoŋo tye ocuŋ i dogcel me paconono karacel kede jo mia abicel ame orukere i jami lwenygi,

¹⁸Kare ame jo-ni owoto i ot a Mika, ote wot kwanyo cal ame opao apaa, epod, terapim karacel kede cal ame otwako atwaka, alamdog openyogi ni, “Kara mannono ŋo ame itimo wunu-nono?”

¹⁹Gin te kobbe ni, “Liŋ iti, wum dogi oko kede ciŋi, me ibin iwot kedwa, me iwot ibed acalo pappawa kede alamdogwa. Itamo ni ber yin ibedo alamdog i ot a dano acel, onyo ka ibedo alamdog a doggola acel luŋ ame tye iyi atekere moro me Icrael?”

²⁰Cuny alamdog te doko ayom oko; te kwanyo epod, terapim, kede cal ame opao apaa te wot oko kedgi kun en tye i dye lwak.

²¹Gin rik olokore ote cako wotgi kittono, kun omio itinogi, kede limgi akwo karacel kede jamigi luŋ telo nyimgi,

²²Kare ame gin doŋ owoto abobor i ot a Mika, jo ame onwoŋo udigi ceggi kede me a Mika oriŋo kede duru, ote ryemo jo Dan mako oko iyo,

²³Gin te redo baŋ jo Dan, eka jo Dan te dok lokere kobbi Mika ni, “Ŋo kara atimmi, omio ibino i lwak jo arom man?”

²⁴En te gamo ni, “Nen wun ikwanyo wunu obaŋana ame atio, itero wunu daŋ alamdogga oko, ite wot wunu kedgi oko, kara an doŋ adoŋ i gin aŋo ba? Ŋo kara ame omio wun dok ipenya wunu ni, ‘Ŋo kara atimmi!’ ”

²⁵Cite jo Dan te gamo ni, “Kur be imi dwoni winyere i akinawa kan, naka mio wegi akemo mogo ŋit mukere i komwu, eka te neki oko karacel kede jo me odi luŋ.”

²⁶Jo Dan gigi te medde iwotgi anyim. Kare ame Mika oneno ni jo Dan tek meicel kate oko, en olokere odok cen i paco mere.

²⁷Jo Dan te wot oko i jami ame Mika onwoŋo otio, karacel kede alamdoggere, naka i Laic, baŋ jo ame onwoŋo bedo gigi mot, kun wigi owil oko i ginnoro luŋ, ote wot nekogi oko i pala lweny, ote waŋo daŋ bomagi oko.

²⁸Jo moro a kono riŋo me larogi te bedo mom, pien gin onwoŋo bor i jo Cidon dok daŋ onwoŋo mom onotte kede jo moro ocele. Gin onwoŋo tye i luŋ ame ceggi kede Bet-rekob. Jo Dan dok te gero boma-nono i wi en acon, ote bedo iye,

²⁹ote cako nyiŋe ni Dan, bala nyiŋ kwarogi Dan, ame rik Icrael onywalo. Cite nyiŋ boma-nono aconnere onwoŋo Laic.

³⁰Jo Dan rik te miyo cal apaa-naca bedo meggi kengi; Yonacan akwar Gercom, ame obedo wot a Muca, karacel kede ikwae, gin te bedo olamdog i atekere a Dan, tuno naka i kare ame otero iye jo me lobonono iyi opii.

³¹Cal apaa ame Mika rik otio-naca rik ote cibo bedo kuno pi kare luŋ ame onwoŋo ot Obaŋa tye i Cilo.