Read lango Oŋolkop 19 Bible Online

Oŋolkop 19 - lango bible

Oŋolkop 19

¹I kare-nono onwoŋo Icrael mom ru tye kede abaka moro. Alevi moro ame onwoŋo rik bedo kannoro a tye teŋe i lobo a jo Epraim obedo kidikidi, rik onwoŋo otiŋo nyannoro me Beterekem i Juda.

²Kare ame dako mere otubere kede, oya oko i baŋe, te dok i ot a pappere i Beterekem i Juda, te wot rik kuno pi dwete aŋwen,

³cware te wot wopo yore kuno, me ewot ekob kede mot edwoggo paco. En owoto karacel kede omiro mere kede kane aryo, ote tuno paco a papa a cege. Kare ame papa a dako onene, obino me jole kun cunye yom.

⁴Ore, ame obedo papa a dako mere, te miye bedo kuno nino adek. I kare-nono luŋ gin te bedo cam kede mat kun daŋ en buto kuno.

⁵I nino me aŋwennere, gin te dilo ibayi, ote yikere me wot, ento papa a nyako te kobbi cwar nyare ni, “Koŋ icut wunu kwonnoro aduno me medo teko, eka ite cako wotwu.”

⁶Jo aryonono te bedo cam kun daŋ omatte, papa a nyako te dok kobbi dano-nono ni, “Tim ber tin dok ibut koŋ kan me iyomoro cunyi.”

⁷Kare ame dano-nono oya malo me wot, papa a cege te bedo diye, te miyo en dok buto kuno.

⁸I nino me kannyere, en doŋ te dilo ibayi me cako wot, ento papa a cege te kobo ni, “Koŋ ibed inwoŋ teko, ikur koŋ cem kwe.” Gin aryo luŋ dok ote bedo cam.

⁹Kare ame dano man kede cege kede amiro mere oya malo me wot, ore ame obedo papa a cege te kobbe ni, “Koŋ inen piny doŋ ceggi yuto, tim ber dok ibut wunu kan. Koŋ inen piny doŋ owumere oko, but kan me iyomoro cunyi, diki doŋ ite ya ibayi me wot paco.”

¹⁰Cite wode-nono mom dok te ye buto kuno, en oya te cako wot oko, te tuno kan ame otikere kede Jebuc (ame en Jerucalem). En onwoŋo tye kede kane mere aryo ame otweo gi-bedo i wigi, dako mere daŋ onwoŋo tye baŋe.

¹¹Kare ame gin doŋ ceggi kede Jebuc, piny doŋ onwoŋo ocako wumere oko, amiro te kobbi adwoŋere ni, “Biye owirre i boma a jo Jebuc kan, me obut iye.”

¹²Cite adwoŋere te gamo ni, “Wan gire mom obino wirre i boma orok, ame gin mom obedo jo Icrael, wan obino wot atir naka i Gibea.”

¹³En te kobbi amiro mere ni, “Biye owot i kabedo moro i akina magi, me owot obut i Gibea onyo i Rama.”

¹⁴Gin rik te kato i wotgi, ceŋ te poto oko a doŋ gin ceggi i Gibea, ame obedo me a jo Benjamin,

¹⁵Gin rik te wirre kuno, ote buto i Gibea. Gin te donyo i boma-nono, ote wot bedo piny i dye boma kuno, pien ŋattoro mom oterogi i ode me wot buto iye.

¹⁶Nen ba, adwoŋoro te bino kun onwoŋo adwogo i tic i poto mere otyeno. Dano-nono onwoŋo tuŋe tye i lo bo Epraim ame obedo kidikidi; en onwoŋo bedo i Gibea, kun wegi lobonono i kome obedo jo Benjamin.

¹⁷En otino waŋe malo te neno lonnaca obedo piny i dye boma kannaler. Adwoŋŋono te penye ni, “Iwot kara kwene?”

¹⁸En te dok iye ni, “Wan oya i Beterekem i Juda, odok cen i lobo Epraim obedo kidikidi, ame tye teŋe kannabor, kan ame an onwoŋo aya iye. Rik awoto i Beterekem i Juda, aman doŋ adok tuna; doŋ mom tye ŋattoro ame otera i ode.

¹⁹Wan otye kede reŋ kal kede cam a kanewa, karacel kede ogati me koŋo ame romowa, an kede aŋecani kede atin awobi ame tye kedwa-ni, mom dok tye ginnoro ocele ame wan omito.”

²⁰Adwoŋŋaca te gamo ni, “Kuc obed kedwu, an abino miyowu gin ame imito wunu luŋ, cite myero kur ibut wunu i dye boma kan.”

²¹En doŋ te terogi i ode, te wot miyo kane cam. Gin te lwoko tyengi, ote cam, ote mat.

²²I kare ame gin tye ayomoro cunygi, nen ba, jo mogo ame gin jo areco me boma-nono, te guro ot oko romo irit; gin te cako go yo doggola kun okobbi adwoŋ ca, ame obedo won ot, ni, “Kel lo ame obino i odi-nono oko me obut kede.”

²³Won ot te kato baŋgi oko, te kobbigi ni, “Pe amannono, omegona, myero kur itim wunu tim araccono, pien dano man doŋ odonyo oko i oda, myero kur itim wunu tim araccono i kome.

²⁴Nen ba, nyara ame mom ru oŋeye kede ico en tye kan karacel keda kede aŋeca mere, wek acwaiwugi oko kan aman-ni. Wagi wunu me itimgi kite ame wun ineno wunu ni ber baŋwu, aco dano man myero kur itim wunu tim arac wok-ki i kome.”

²⁵Cite jonnono gire te kwero winyo koppere oko. Alevi te waya aŋeca mere cwayo baŋgi oko, gin te buta kede kun oloke odoko gi-tukogi naka piny oru. I kare ame piny doŋ owalakino oko, gin te weke, ote wot gigi oko.

²⁶I kare ame ceŋ doŋ amito donyo, dako-nono te wot rette i doggola adwoŋ ca, ame cware onwoŋo tye i ode, te buto kannono naka odiko.

²⁷Cware te ya odiko, te yabo doggola me ottono, kun mito cako wottere. I cawa-nono en te neno kom dako mere tye obuto piny i doggola me ottono, kun ciŋe tye opoto i doggola.

²⁸En te kobbe ni, “Ya malo, me owoti.” Cite mom te winyo kopporo ame odokke. En te tiŋe kete i wi kana, te cako wot oko me dok i paco mere,

²⁹Kare ame en odonyo i ode, en okwanyo pala, te ŋiŋido kom dako mere oto-nono, te poko i dul apar wir aryo, te cwayo i lobo a jo Icrael luŋ.

³⁰Jo luŋ ame oneno okobo ni, “Kodi gin acalo man yam mom ru otimere, dok yam mom ru onen, cakere i kare ame jo Icrael oya kede i Miciri, tuno kede naka tin; myero koŋ tam koppere, por, ote kobo ginnoro iye.”