Read lango Oŋolkop 2 Bible Online

Oŋolkop 2 - lango bible

Oŋolkop 2

¹Amalaika a Rwot rik oya i Gilgal, te wot i Bokim, te kobo ni, “Rik akwanyowu oko i Miciri, ate kelowu naka i lobo ame rik akwoŋo pire ni abino miyo baŋ kwariwu. Rik akobo ni, ‘Mom abino turo cikerena kedwu atwal,

²wun daŋ myero kur icikere wunu kede jo moro ame bedo i lobo man; myero imumuko wunu kenogi me yalo jogi oko.’ Ento wun giwu mom iwinyo wunu gin ame aciko. Man kara doŋ ŋo ame itimo wunu nie?

³Mannono omio an doŋ akobo ni, An doŋ mom abino ryemogi i nyimwu; ento gin doŋ bino doko okworwu, obaŋegi bino doko kumma me cikowu.”

⁴Kare ame amalaika a Rwot okobo koppono ducu baŋ jo Icrael, jo luŋ te belle oko i koko.

⁵Gin te cako nyiŋ kabedo-nono ni Bokim; eka gin te yalo Rwot kuno i gin oŋolo.

⁶Kare ame Yocwa rik doŋ otyeko ciko jo Icrael, ŋat acel acel rik te wot, kun ŋat man dok i lobo mere ame eleo, me wot gamo bedo mege.

⁷Jo Icrael rik otiyi Rwot i kare a Yocwa luŋ kede i kare odoŋe luŋ ame rik Yocwa oweko pwod kwo, jo ame rik onwoŋo oneno tic adoŋodoŋo luŋ ame Rwot otimo pi Icrael.

⁸Yocwa wot a Nuni, amiro a Rwot, oto ame mwaka me dittere romo mia acel kede tomon.

⁹Gin rik ote yike i lobo mere ame rikomie i Timnatkerec, i lobo me Epraim obedo kidikidi, ame tye tutuŋ anyarodi me kidi me Gaac.

¹⁰Lwagi jo-nono luŋ rik te to oko, te wot nywako kabedo kede kwarigi; eka lwagi jo ocele te dok pelo lubogi, ame mom rik oŋeo Rwot, akadi tic ame Rwot rik otio pi jo Icrael.

¹¹Jo Icrael rik dok te cako timo gin a nen arac i nyim Rwot, ote woro gigi Baal,

¹²kun oweko gigi woro Rwot ame obedo Obaŋa a kwarigi, ame rik okwanyogi i lobo me Miciri, ote lunyo woro gigi obaŋe ocele i akina obaŋe a jo ame omanogi ote ryebere piny i nyimgi; gin te bedo roko Rwot miyo akemo mako.

¹³Gin oweko Rwot oko, ote lunyo woro gigi obaŋe mogo ame olwoŋo ni Baal kede Aciterot.

¹⁴Mannono rik te miyo akemo mako Rwot i kom jo Icrael, eka te jalogi i ciŋ oyak, ame gin te bedo yako jamigi. Rwot te daŋ dok jalogi oko i te twer okworgi ame onwoŋo omanogi, ame te miyogi doko jo a mom dok romo cuŋ i nyim okworgi.

¹⁵Kannoro luŋ ame rik gin owoto iye, ciŋ Rwot mom orwenyo i komgi, me timogi rac, kite ame rik en okwenyooro kede con, kede dok kite a Rwot rik okwoŋo kede baŋgi con. Man omiogi obedo i twon lyeto moro agwa meicel.

¹⁶Rwot rik dok te cako miyogi oŋolkop ame te larogi i ciŋ jo ame onwoŋo obedo yako jamigi.

¹⁷Kadi bed amannono, gin rik mom obedo jo ame winyo kop oŋolkopgi; pien gin gigi omedde timo tim me alaya baŋ obaŋe mogo ocele kun oryebere piny i nyimgi. Gin oweko yo ame rik kwarigi obedo lubo oyotoyot, gin gigi mom obedo winyo cik a Rwot kite ame kwarigi obedo winyo kede.

¹⁸I kare luŋ ame Rwot rik miogi oŋolkop, Rwot bedo konyo oŋolkopgi-nono, eka te bedo larogi i ciŋ okworgi i kare luŋ ame oŋolkopporo-ni oloo kede jo Icrael. Pien kica onwoŋo omako Rwot i komgi pi bedo cucuragi i kom jo ame onwoŋo wunogi kun diogi atek.

¹⁹Cite i kare naca luŋ ka ce oŋolkopgi dok oto oko, gin dok olokere odok cen i timo timmogo areco ame kato me a kwarigi oko, kun olubo obaŋe mogo ocele, oryebere piny i nyimgi, oworogi. Gin rik mom oweko kodi timgi-nono moro, akadi kittoro luŋ ame gin rik obedo lubo pi nwaŋ ŋutgi.

²⁰Mannono rik te miyo akemo mako Rwot i kom jo Icrael, eka Rwot te kobo ni, “Pien jo man doŋ okalo wi cikere ame rik aciko baŋ kwarigi, dok daŋ okwero-gu winyo koppa oko,

²¹mom dok abino medde ryemo rokkoro i nyimgi, i kom rok apapat ame rik Yocwa oweko i kare ame en to,

²²me ati kedgi me temo cuny jo Icrael, anen ka ce gin bino gwokere me lubo yo a Rwot kite ame kwarigi obedo lubo kede onyo mom.”

²³Mannono rik te miyo Rwot weko rok apapattono luŋ doŋ kun mom oryemogi awaŋe acel, dok daŋ mom omiogi i ciŋ Yocwa.