Read lango Oŋolkop 20 Bible Online

Oŋolkop 20 - lango bible

Oŋolkop 20

¹Jo luŋ me Icrael te kato oko, kun oya i Dan, tuno naka i Beerceba, medo kede lobo me Gilead. Lwak luŋ te cokere i Mijipa baŋ Rwot kun otye kede cuny acel.

²Rwode a lwak luŋ me atekere luŋ ame obedo me a jo Icrael, ocuŋ i akina lwak Obaŋa ame ocokere. Jo luŋ onwoŋo romo co tutumia aŋwen, jo ame lwenyo i pala romo kun gin luŋ obedo olweny ame woto i tyengi.

³Jo Benjamin onwoŋo owinyo oko ni jo Icrael owoto i Mijipa. Jo Icrael rik te kobo ni, “Koŋ iporriwa wunu kite ame tim man arac wok-ki otimere kede.”

⁴Alevi ame onwoŋo oneko cege-nono te kobo ni, “I nino moro onwoŋo awoto i Gibea ame obedo boma a jo Benjamin, an karacel kede cega, me wot buto kuno.

⁵Jo moro ame gin obedo jo me Gibea te bino i koma, ote guro ot ame onwoŋo an atye iye dyeworrono kun onwoŋo gin mito neka oko; gin te wayo dakona tetek, naka te to i ciŋgi.

⁶An ate kela kom dakona ame oto-nono, ate ŋiŋido oko, ate cwayo dul kome-nono romo lobo luŋ ame jo Icrael oleo me bedo megi; pien gin onwoŋo otimo tim me ipyeda kede me coco iyi Icrael.

⁷Nen wunu ba, wun jo Icrael, wun luŋ mi tamwu iye dok ipor wunu koppere i kan.”

⁸Lwak luŋ te twarre a waŋe acel kun kobo ni, “Wan luŋ ŋattoro mom bi no wot i kema mere, ŋattoro daŋ mom bino dok tuŋe.

⁹Gin ame aman wan obino timo i kom jo Gibea ene: wan obino wot me lweny i komgi, kun okwanyo jo kede kwir,

¹⁰obino kwanyo jo apar i kom mia acel i kom atekere me Icrael luŋ, kede jo mia i kom jo tutumia acel acel, kede jo tutumia i kom jo tutumia apar apar, me gin wot kelli lwak cam, me gin ka obino, obin ocul kwor i kom Gibea a jo Benjamin, pi bal luŋ areco ame gin otimo i kom Icrael.”

¹¹Jo Icrael luŋ rik te cokere me lweny i kom boma-nono kittono, kun gin luŋ oribere i cunygi acel keken.

¹²Atekere luŋ me Icrael te cwayo jo romo lobo atekere a jo Benjamin luŋ kun okobo ni, “Kodi tim arac aŋo ame otimere i akinawu-nie?

¹³Aman myero wun imi wunu jonnono i ciŋwa, jo me Gibea otimo tim arac wokkono, me onekgi oko, omi gin arac ya oko i akina jo Icrael.” Cite jo Benjamin mom te winyo kop omegogi, ame gin jo Icrael.

¹⁴Jo Benjamin te ya oko i bomagi ote bino cokere i Gibea, me wot lweny i kom jo Icrael.

¹⁵I nino-nono jo Benjamin te kwano jo ame oya i bomagi, ame omako pala me romo, jo te romo tutumia pyeraryo wie abicel, kun nwoŋo mom omedo iye jo ame bedo i Gibea ikome, ame welgi okwano oromo mia abiro, ame oyero jo mere ayera.

¹⁶I kom magi luŋ onwoŋo tye iye jo mia abiro ame oyero, ame gin luŋ obedo ojaracam. Ŋat acel acel i akinagi onwoŋo ciŋe iwac meicel ame mom bao gweŋ te celo piny nono.

¹⁷Aco jo Icrael luŋ kun nwoŋo mom okwano iye jo Benjamin, welgi oromo tutumia mia aŋwen, ame omako pala lweny. Gin luŋ rik obedo jo ame onwoŋo doŋ ona oko i lweny.

¹⁸Jo Icrael rik te ya oko wot i Betel, ote wot penyo Obaŋa ni, “Ŋa i akinawa ame myero ge wot lweny i kom Benjamin?” Rwot te gamo ni, “Myero Juda en a ge wot.”

¹⁹Jo Icrael te ya idiko te wot guro kemagi i Gibea.

²⁰Jo Icrael te wot lweny i kom jo Benjamin. Jo Icrael te ryeye i tyen me lweny i komgi i Gibea.

²¹Jo Benjamin te katto oko i Gibea, i nino-nono gin te neko jo Icrael ame romo tutumia pyeraryo wie aryo.

²²Ento jo Icrael cunygi obedo tek, ote dok ryeye i tyen me lweny kakan ame rik gin koŋ oryeye iye i nino me agege ca.

²³Jo Icrael te wot malo ote wot kok i nyim Rwot naka otyeno; ote dok penyo Rwot ni, “Odok owot olweny i kom omegowa, ame gin jo Benjamin?” Rwot te kobo ni, “Wot ilweny wunu i komgi.”

²⁴Jo Icrael te noko jo Benjamin aceggi inino me aryo mere.

²⁵Jo Benjamin te katto oko i Gibea i nino me aryo mere, gin dok te neko jo tutumia apar wie aboro i kom jo Icrael, kun gin luŋ obedo jo ame lwenyo kede pala,

²⁶Mony a jo Icrael luŋ dok te wot i Betel, ote wot kok iye. Gin te bedo piny kuno i nyim Rwot. I nino-nono gin te ri kec naka otyeno ote yalo Rwot i mot awaŋa kede mot me kweyo cuny.

²⁷Jo Icrael te dok medo penyo Rwot, pien canduk me cikere a Rwot onwoŋo tye kuno i kare-nono,

²⁸kun Finekaci wot Eleajar, ame obedo wot Aron tio i nyime i kare-nono. Gin dok te penyo Rwot ni, “Dok omedde wot lweny i kom omegowa, jo Benjamin, onyo owek doŋ lweny oko?” Rwot dok te kobo ni, “Wot wunu, pien diki abino miyogi i ciŋwu.”

²⁹Jo Icrael te wot miyo jogi pono oko, kun oguro Gibea oko.

³⁰Gin dok te wot lweny i kom jo Benjamin i nino me adekkere; gin oyikere me lweny i kom Gibea kite ame gin obedo yikere kede tyen me acel kede me aryo ca.

³¹Jo Benjamin te dok katto oko i kom jo Icrael, ote wot kedgi teŋe naka i ŋe boma, kun lubere i kite acon ca; gin dok te cako neko jo mogo i waŋayo, i yo ame woto i Betel kede i en ocele ame woto i Gibea, naka i bar daŋ. Jo Icrael ame oto te romo pyeradek.

³²Jo Benjamin te kobo ni, “Gin omukere i ŋwec oko i nyimwa kite acon ca.” Ento jo Icrael te kobo ni, “Koŋ oriŋ wunu oko, me otergi kannabor i boma, i yo kuka,”

³³Jo Icrael luŋ te doŋ ya oko i kabedogi, ote ryeye oko i Baaltamar; eka jo Icrael ame onwoŋo opono mege te twarre oko i kabedogi ame onwoŋo tye i ŋet Geba tuŋ to.

³⁴Jo tutumia apar ame onwoŋo oyero ayera i kom jo Icrael luŋ te bino i kom Gibea, lweny te kur a mom kobere; cite jo Benjamin onwoŋo mom ŋeo ni twon cannoro adwoŋ meicel doŋ ceggi acega me tuno i komgi.

³⁵Rwot te mi yo Icrael loyo jo Benjamin oko I nino-nono jo Icrael te neko jo Benjamin ame romo tutumia pyeraryo wie abic kede mia acel nono, kun gin luŋ obedo jo ame lwenyo kede pala.

³⁶Jo Benjamin te neno ni doŋ otyeko loyogi gire oko. Jo Icrael rik te jer teŋe wekki jo Benjamin kabedo, pien gin onwoŋo geno jo ame onwoŋo opono, ame onwoŋo gin oketo me kuro Gibea.

³⁷Jo ame onwoŋo opono-naca te cunyere bino oko i kom Gibea. Jo ame onwoŋo opono te wot neko jo ame rik tye i boma luŋ kede pala lweny.

³⁸Jo Icrael kede jo ame onwoŋo opono, onwoŋo omoko i akinagi anyut, anyutgi-nono onwoŋo tye ni mannono, ka yito me mac oduny owikino malo i boma.

³⁹Jo Icrael myero doŋ dwog cen me bino lweny i kom jo Benjamin. Jo Benjamin te cako lweny, ote neko jo Icrael pyeradek, kun okobo ni, “Ateni, nen otye ka nekogi i nyimwa kite ame obedo timogi kede i lweny me agege.”

⁴⁰Cite i kare ame gin a rik omoko ocako nen i boma, i kare ame yito doŋ owikino malo calo pagi, jo Benjamin olokere te neno ŋegi, gin te neno yito tye owikino malo i polo i boma luŋ,

⁴¹Jo Icrael te doŋ lokere dwogo cen, kun koyo doŋ onwoŋo oonyere atek i kom jo Benjamin, pien gin oneno ni twon can a adwoŋ doŋ tye ceggi acega me tuno i komgi.

⁴²Mannono te miyogi lokki jo Icrael ŋegi oko, kun oriŋo tuŋ tim, lweny doŋ te loyogi oko, jo Icrael ame onwoŋo adwogo i bomagi te nekogi oko.

⁴³Gin te jwero Benjamin reto oko piny kun komgi oto doŋ oradde atata, cakere i Noka wot kede naka kan ame otikere i Gibea i tuŋ to.

⁴⁴Jo Benjamin tutumia apar wie aboro twal, ame gin luŋ obedo jo ame tek i lweny, gin luŋ rik ote nekogi oko.

⁴⁵Jo ame odoŋ te lokere riŋo tuŋ tim, tuno naka i kidi Rimon, jo tutumia abic i akinagi rik dok ote neko oko i waŋayo. Jo Icrael te ryemo yogi atek naka i Gidom, ote dok ne ko jo tutumia aryo.

⁴⁶Mannono te miyo jo Benjamin luŋ ame oneko i nino-nono te romo tutumia pyeraryo wie abic, ame gin jo onwoŋo lwenyo i pala i akina jo luŋ atek i lweny.

⁴⁷Cite jo mia abicel te lokere riŋo gigi tuŋ tim ata naka i wi kidi me Rimon, gin te bedo i wi kidi me Rimon pi dwete aŋwen.

⁴⁸Jo Icrael doŋ te lokere dwogo cen i kom jo Benjamin, ote nekogi i pala lweny, jo kede leyi kede jami luŋ ame onen i nyimgi. Boma luŋ ame gin onwoŋo, gin owaŋo oko kede mac.