Read lango Oŋolkop 21 Bible Online

Oŋolkop 21 - lango bible

Oŋolkop 21

¹Jo Icrael rik onwoŋo okwoŋo i Mijipa ni, “Dano moro i akinawa mom bi no miyo dano moro me Benjamin nyomo nyare.”

²Lwak rik te bino i Betel, ote bedo kuno i nyim Obaŋa naka otyeno. Gin te cwayo dwongi baŋ Obaŋa kun okok atek,

³okobo ni, “Ama Rwot Obaŋa a jo Icrael, piŋo kop man otimere iyi Icrael, ame tin omio ateke re acel orwenyo oko iyi Icrael?”

⁴Orwo mere lwak te ya ibayi, te cano keno lam kuno, ote miyo iye mot awaŋa kede mot me kweyo cuny.

⁵Lwak jo Icrael te kobo ni, “Atekere mene iyi Icrael ame rik mom owoto i kare ame wan ocokere baŋ Rwot?” Pien gin rik onwoŋo okwoŋo kwoŋ adwoŋ meicel i nyim Rwot i kom dano ame rik mom owoto i nyim Rwot, i Mijipa, kun gin okobo ni, “Obino neko dano-nono oko.”

⁶Kica rik te mako jo Icrael i kom omingi Benjamin, ote kobo ni, “Atekere acel me Icrael waŋe doŋ orwenyo oko i akina jo Icrael i kare man.

⁷Kara ŋo ame myero otim wunu me wek onwoŋ mon pi jo odoŋ, kite acalo wan doŋ yam okwoŋo oko i nyim Rwot ni, mom obino miyogi onyomo nyarwa moro-ni?”

⁸Gin te kobo ni, “Atekere mene ame rik mom owoto i nyim Rwot i Mijipa?” Pien tye dano moro ame rik onwoŋo mom owoto i cokere i gony, ame oya i Jabec-gilead.

⁹Pien i kare ame okwano jo, mom onwoŋo dano moro ame oya i baŋ jo ame bedo i Jabec-gilead.

¹⁰Mannono te miyo lwak cwayo twoni co atek i lweny tutumia apar wie aryo kuno, kun ocikogi ni, “Wot inek wunu jo ame bedo i Jabec-gilead oko kede pala romo, anaka mongi kede itinogi.

¹¹Gin ame ibino timo wunu ene: mon luŋ ame doŋ oŋeye kede co kede co luŋ oŋeye kede mon, ibino neko wunu oko acalo gin me kwer.”

¹²Gin rik te nwoŋo anyira ame romo mia aŋwen a mom ru oŋeye kede co i akina jo ame bedo i Jabec-gilead. Gin te ke lo anyira-nono i gony i Cilo, onwoŋo tye i lobo a jo Kanaan.

¹³Lwak te cwayo kwena baŋ jo Benjamin ame onwoŋo bedo i wi kidi me Rimon, ote wot rabbigi pi kop me kuc.

¹⁴Jo Benjamin te dwogo i kare-nono, ote miyogi anyira ame rik mom oneko i akina mon me Jabec-gilead; cite mannono mom te romogi ducu.

¹⁵Kica omako lwak i kom jo Benjamin, pien Rwot onwoŋo otio gin ame mio atekere acel me Icrael rwenyo oko.

¹⁶Odoŋe a lwak te kobo ni, “Gin aŋo ame myero otim wunu pi jo ame mon oremo, kite ame oneko kede mon me Benjamin oko-ni?”

¹⁷Gin te kobo ni, “Gi-alea moro myero bed tye pi jo Benjamin ame obwot, me mom jwa nyiŋ atekere moro oko iyi Icrael.

¹⁸Cite wan mom otwero miyogi anyirawa me bedo mongi.” Pien jo Icrael rik onwoŋo okwoŋo ni, “Cen myero mak ŋat ame omio nyare baŋ dano moro me Benjamin.”

¹⁹Mannono te miyogi kobo ni, “Neno wunu ba, ecuban a Rwot ame bedo mwaka i mwaka tye i Cilo, ame tye tutuŋ anyarodi me Betel, kun Cilo nwoŋo tye tutuŋ to me yo agera ame ya i Betel woto i Cekem, kede tutuŋ anyarolum me Lebona.”

²⁰Gin te ciko jo Benjamin kun okobo ni, “Wot ipon wunu i potti olok, ikur wunu kuno,

²¹dok daŋ ikio wunu piny; ka ibino neno wunu anyira me Cilo obino me wot i myel, ŋat acel acel myero ya te mako dako mere i akina anyira me Cilo, eka te wot kede i lobo Benjamin.

²²Ka ce papagi onyo omegogi okelo kokogi baŋwa, wan obino kobbigi ni, ‘Tim wunu ber, imigi wunu doŋ baŋwa, pien wan rik mom okelo mon ame romogi i kare me lweny, wun daŋ mom imiogi wunu; ame kono omio tin wun daŋ ibedo wunu kede roc.’ ”

²³Jo Benjamin rik daŋ te timo kittono, ote tero mongi ame oromogi aroma, ame gin omako i akina anyira ame onwoŋo gin omyel. Gin te wot dok cen i lobo ame obedo meggi, ote dok gegero bomagi, ote bedo iye.

²⁴Jo Icrael te doŋya oko i kuno i kare-naca, kun ŋat acel acel dok iyi atekere mere kede i doggola mere. Gin te ya oko i kuno kun ŋat acel acel dok i lobo mere.

²⁵Jo Icrael rik onwoŋo mom ru tye kede abaka moro i kare-nono, dano acel acel onwoŋo gire timo gin ame en oneno ni ber baŋe.