Read lango Oŋolkop 3 Bible Online

Oŋolkop 3 - lango bible

Oŋolkop 3

¹Magi gin rok ame Rwot oweko odoŋ me eti kedgi me temo jo Icrael, gin jo Icrael luŋ rik mom ru tye kede ŋeccoro me lwenyoro i Kaanan.

²En onwoŋo owekogi pi kop man keken, me wek lwagi jo Icrael luŋ ŋe lweny, me epwonygi kede lweny, akato mere jo luŋ ame rik onwoŋo mom ru tye kede ŋeccoro iye.

³Rokkono gin ene: rwode a jo Piriciti abic, kede jo Kaanan luŋ, kede jo me Cidon, kede jo Kivi ame rik onwoŋo bedo i wi kidi me Lebanon, cakere i kidi me Baalkermon tuno kede naka i dog yo ame woto Kamat.

⁴Gin onwoŋo tye me temo jo Icrael, me wek ŋe ka ce jo Icrael twero winyo cik a Rwot ame rik emio Muca ociko baŋ kwarigi.

⁵Mannono te miyo jo Icrael bedo i akina jo Kaanan, jo Kitti, jo Amor, jo Periji, jo Kivi, kede jo Jebuc.

⁶Jo Icrael rik te cako nyomo anyiragi me bedo mongi, kun gin daŋ omio awobe a jo-nono nyomo anyiragi. Gin te cako woro daŋ obaŋegi.

⁷Jo Icrael rik te timo gin anen arac i nyim Rwot, kun wigi wil oko i kom Rwot Obaŋagi, oworo gigi Baal kede Aciterot.

⁸Mannono rik te miyo akemo mako Rwot i kom jo Icrael, eka te jalogi oko i ciŋ Kucan-ricataim, abaka me, Mecopotamia. Jo Icrael rik te bedo i te twer a Kucan-ricataim mwakki aboro.

⁹Cite i kare ame jo Icrael okok baŋ Rwot, Rwot rik te miyo jo Icrael dano a myero largi, ame rik daŋ te larogi. Dano-nono rik en Otniel wot a Kenaj, ame obedo omin a Kaleb atidi mere.

¹⁰Cuny a Rwot rik obino i kome, en te bedo ŋolo kop a jo Icrael. En rik obin owoto olwenyo i kom Kucan-ricataim, abaka me Mecopotamia, eka Rwot te miye i ciŋe, en te loyo Kucan-ricataim.

¹¹Mannono rik te miyo lobo we pi mwakki pyeraŋwen. Icennere Otniel wot a Kenaj te to oko.

¹²Jo Icrael rik dok te timo gin anen arac i nyim Rwot, Rwot rik te miyo teko baŋ Eglon, abaka me Moab me lweny i kom Icrael, pien gin onwoŋo otimo gin anen arac i nyim Rwot.

¹³Eglon rik te coko jo Ammon, kede jo Amalek, te wot lweny i kom jo Icrael loyo oko, gin rik te mayo boma me otit oko.

¹⁴Jo Icrael rik dok te bedo i te twer a Eglon, abaka me Moab pi mwakki apar wie aboro.

¹⁵Ento i kare ame jo Icrael okok baŋ Rwot, Rwot rik te miyo jo Icrael dano a myero largi, ame en Ekud wot a Gera, ame obedo dano me atekere a Benjamin; rik en lo ame acam. Jo Icrael rikomio en otero mot baŋ Eglon abaka me Moab.

¹⁶Ekud rik te tiyo pala lwennyere ame bit ryoryo, ame borrere kato futi acel oko. Ekud rik te rwako pala mere-nono iyi boŋo mere, i eme tuŋ cem,

¹⁷en rik te wot miyo mot baŋ Eglon abaka me Moab. Eglon rik onwoŋo obedo twon lo moro ocwe meicel.

¹⁸Kare ame Ekud rik doŋ onwoŋo otyeko miyo mot oko, en rik te cwayo jo ame onwoŋo oyeo mot teŋe,

¹⁹ento en i kare ame owoto otuno i te kidi ame opao apaa ame rik onwoŋo tye ceggi i Gilgal, en olokere odok cen baŋ abaka, te kobbe ni, “Atye i kopporo me imuŋ ame ocwaa kede baŋi, abaka.” Abaka te juko jo ni “Liŋ wunu.” Odoŋe luŋ ame onwoŋo bedo baŋe te wot oko.

²⁰Ekud te bino baŋe kun abaka obedo kene iyi icika mere aŋic, ame tye malo i wi ot. Ekud te kobo ni, “An atye kede kwena ame oya i baŋ Obaŋa, ame akelo baŋi.” Abaka te ya oko malo i wi kommere.

²¹Ekud te ryeyo ciŋe me tuŋ cem, te woto pala romo mere i eme tuŋ cem, te cobo kede yie,

²²pala te donyo naka i yie, eka moo te mwono lak pala oko, pien en mom onwoŋo owoto pala lweny i yie; cet te mollo oko.

²³Ekud te ya oko i kuno kato oko, te cego doggola me icika a tye malo i wi ot, te daŋ tweyo doggola oko.

²⁴Kare ame en doŋ owoto oko, amiro abaka te bino; ka gin oneno doggola me icika ame tye malo i wi ot tye ame otweo oko, gin obedo tamo ni, “En tye akonnyere i ot atidi aŋic-ca.”

²⁵Gin te bedo kuro naka waŋ ame piny oloogi; kare ame gin oneno ni en mom oyabo doggola ot i malo, gin okwanyo agony ote gonyo kede doggola; gin te nwoŋo rwotgi obuto i dye ot kun doŋ oto oko.

²⁶I kare ame onwoŋo gin pwod tye ka gal ca, Ekud olwi, te riŋo gire oko, te kato naka i ŋe kidi ame opao apaa ca, te riŋo gire wot laro Ceira.

²⁷Kare ame en doŋ otuno kuno, en okuto apel i lobo me Epraim ame obedo kidikidi, jo Icrael rik te wot kede, kun oya i lobo obedo kidikidi, en telo wigi.

²⁸En okobbigi ni, “Lub wunu yora, pien Rwot otyeko miyo okworwu, jo Moab i ciŋwu.” Gin owoto karacel kede, ote wot mako waŋ kwaŋ me Jordan oko pi geŋo jo me Moab, mom ote ye ŋattoro ŋolo kulo.

²⁹Kare-nono gin te neko jo Moab ame buco romo tutumia tomon, ame moro mom obwot, kun gin luŋ obedo twoni jo mogo atek meicel.

³⁰I nino-nono rik jo Icrael te loyo jo Moab oko kittono, gin te bedo i te loc a jo Icrael, lobo te dok we pi mwakki pyeraboro.

³¹Gat ame dok te bino lube, rik te bedo Camgar wot Anat, ame rik oneko jo Piriciti mia abicel kun neko kede ecipet me leko twoni. En daŋ rik olaro jo Icrael.