Read lango Oŋolkop 4 Bible Online

Oŋolkop 4 - lango bible

Oŋolkop 4

¹Kare ame Ekud oto oko, jo Icrael dok te timo gin anen arac i nyim Rwot,

²Rwot rik te miyogi i ciŋ Jabin, abaka me Kaanan, ame rik oloo loccere i Kajor. Atel wi monnyere rik nyiŋe Cicera, ame rik onwoŋo bedo i Karoceta-goyim.

³Jo Icrael rik dok te kok baŋ Rwot; pien en rik onwoŋo tye kede gadigadi mia aboŋwen me nyonyo, en te bedo wuno jo Icrael meicel pi mwakki pyeraryo twal.

⁴I kare-nono dako ame obedo adwarpiny, a nyiŋe Debora ame en rik obedo dako a Lappidot, en a rik onwoŋo aŋolkop a jo Icrael.

⁵En rik onwoŋo bedo i te otit a Debora, ame onwoŋo tye i akina Rama kede Betel, i lobo obedo kidikidi me a jo Epraim; jo Icrael rik woto baŋe kuno pi ŋolligi kop.

⁶Debora rik te cwayo kwena lwoŋo Barak wot Abinoam ame rik onwoŋo bedo i Kedec i lobo a jo Naputali, eka te kobbe ni, “Rwot Obaŋa a jo Icrael ociki ni, ‘Wot icok joni i Kidi me Tabor, kun ikwanyo jo tutumia apar iyi atekere a Naputali kede iyi atekere a Jabulon.

⁷An abino miyo Cicera ame obedo atel mony a Jabin bino rwatte kedi i dog kulo me Kicon, karacel kede gadigadi mere, kede monynyere luŋ; abino miye i ciŋi.’ ”

⁸Barak rik te kobbi Debora ni, “Ka ce iwot keda, abino wot, ento ka mom iwot keda, an daŋ mom abino wot.”

⁹Debora te dok iye ni, “An abino wot kedi gire; cite myero ineni yo ame iwot iyenono mom ibino nwoŋo iye kwogo moro. Rwot bino miyo Cicera i ciŋ dako.” Debora rik te ya wot gin kede Barak naka i Kadec.

¹⁰Barak te lwoŋo jo Jabulon kede jo Naputali i Kadec; jo tutumia apar rik te lubo yore; Debora daŋ te wot kede.

¹¹I kare-nono Keber, ame en dano me Keni, onwoŋo opokere oko i jo Keni, ame rik obedo ikwae a Kobab, ame obedo or Muca. En rik onwoŋo oguro kema mere teŋe kannabor ame ceggi kede kworo ame rik tye i Jaanannim, ame ceggi i Kadec.

¹²Kare ame otitti Cicera ni Barak wot a Abinoam doŋ otyeko wot oko i kidi me Tabor,

¹³Cicera rik te cwano wegi gadigadi nyonyo mere luŋ, ame gin rik romo tutumia abonwen, kede jo luŋ ame rik onwoŋo tye baŋe, cakere i Karoceta-goyim naka i kulo Kicon.

¹⁴Debora te kobbi Barak ni, “Ya doŋ malo, pien tin en nino ame Rwot omio iye Cicera i ciŋi. Rwot en ame bino telo nyimi.” Mannono te miyo Barak cako yitto piny i wi kidi me Tabor karacel kede jo tutumia apar ame onwoŋo lubo yore.

¹⁵Rwot rik te babaŋo Cicera oko i nyim Barak, karacel kede wegi gadigadi mere luŋ, kede monynyere daŋ luŋ, te miyo nekogi oko luŋ i pala lweny; cite Cicera rik te pye oko i wi gadigadi mere, te riŋo i tyene.

¹⁶Barak te ryemo yo gadigadi kede monygi naka i Karoceta-goyim; mony a Cicera luŋ rik ote neko oko i pala lweny, ŋattoro acel i akinagi mom odoŋ.

¹⁷Ento Cicera te riŋo kede tyene naka i kema a Yayeri, ame obedo dako a Keber, dano me Keni; pien onwoŋo kuc tye i akina Jabin, abaka me Kajor kede jo me ot a Keber, ame obedo dano me Keni.

¹⁸Yayeri te kato oko me jolle, te kobbe ni, “Adwoŋ, wirre ilar baŋa kan, kur ilwor.” Cicera daŋ te wirre wot baŋe i kema mere, en te wumo kome oko kede boŋo moro.

¹⁹Cicera te kwaye ni, “Tim ber koŋ imia pii moro amati, pien oryo pii obwoa oko.” Yayeri te yabo dog ocoe me cak, te miye mato, eka te wumo kome oko.

²⁰Cicera te kobbe ni, Cuŋ i dog ke ma, Ka ce ŋattoro obino te penyi ni, “Dano moro tye kan? Yin kobbe ni, ‘Pe gire’.”

²¹Cite Yayeri, dako a Keber te kwanyo teke guro kema, te kwanyo daŋ anyul mako i ciŋe, te cedde momot wot baŋe, te wot goyo teke i nyime tuŋ cel, naka teke odonyo, piny i lobo, pien onwoŋo Cicera onino meicel pi olo. Cicera te to oko kittono.

²²Cite nen ba, i kare ame Barak onwoŋo tye aryemo yo Cicera, Yayeri odonyo oko me wot jolle, eka te kobbe ni, “Biye, me anyutti ŋat ame iyenyonono.” Barak daŋ te wot iyi kema, te nwoŋo kom Cicera tye obuto piny i kema kannono, ame oto kun teke tye ogurre i nyime.

²³Mannono kite ame Obaŋa rik oloo kede Jabin, abaka me Kanaan i nino-nono i nyim jo Icrael.

²⁴Jo Icrael rik te medde diyo Jabin, abaka me Kanaan atek ateka, tuno waŋ ame gin otyeko oko iweŋ.