Read lango Oŋolkop 6 Bible Online

Oŋolkop 6 - lango bible

Oŋolkop 6

¹Jo Icrael rik dok te cako timo gin anen arac i nyim Rwot, Rwot dok te miyogi i ciŋ jo Midian pi mwakki abiro.

²Ciŋ jo Midian rik te cirogi oko, ame te miyogi yiko ka ponogi iyi aduyi ame onwoŋo tye i akina kiddi kede gorogoro, kede i kabedo mogo ame ogeŋo atek pi lworo jo Midian.

³Pien i kare luŋ ka jo Icrael ocoo kotigi doŋ piny, jo Midian kede jo Amalek, kede jo tuŋ kide, gin luŋ omukere, obino olwenyo i komgi.

⁴Gin obino ote guro gonygi i ŋet jo Icrael, ote bedo balo cam i pottigi tuno naka i Gaja ame ceggi kedgi, kun mom oweko cammoro doŋ me konyo jo Icrael, akadi romo, onyo twon, onyo kana.

⁵Pien gin ka obino, obino kede limgi akwo, kede kemagi, kun obino apipim calo bonyo a mom romo kwanne, karacel kede inagagi; gin ka obino, obalo lobo oko.

⁶Jo Midian rik te miyo jo Icrael bedo jo moro a piny meicel kittono; jo Icrael rik te kok baŋ Rwot.

⁷I kare ame jo Icrael okok baŋ Rwot pi peko a jo Midian,

⁸Rwot rik te cwayo adwarpiny baŋ jo Icrael. Adwarpiny te kobbigi ni, “Rwot Obaŋa a jo Icrael okobo ni, yam atelowu me ya i Miciri, ate kwanyowu oko i ot me opii.

⁹Rik, alarowu i ciŋ jo Miciri, karacel kede i ciŋ rok luŋ ame obedo wunowu ate daŋ ryemogi oko i, nyimwu, ate lunyo miyowu lobogi.

¹⁰Rik ate kobbiwu ni ‘An a Rwot Obaŋawu; myero kur iwor wunu obaŋe a jo Amor, ame ibedo wunu i lobogi.’ Cite wun ikwero wunu winyo koppa oko.”

¹¹I kare-nono amalaika a Rwot rik te bino bedo i te kworo ame tye i Opra, ame onwoŋo obedo mea a Yowaci ame obedo dano a jo Abiejer, kun onwoŋo rik wode Gideon tye adino ŋano i ka biyo olok, me ekan oko pi lworo jo Midian.

¹²Amalaika a Rwot rik te nen baŋe, te kobbe ni, “Rwot tye kedi, yin twon lo atek me lweny.”

¹³Gideon te kobbe ni, “Adwoŋ, koŋ akwai ba, kara ka Rwot tye kedwa, piŋo kop magi luŋ dok opoto i komwa? Kara ticcoro me awura ame kwariwa bedo tittiwa pire-ni tye kwene? Gin okobo ni, Rwot en ame rik okwanyowa i lobo me Miciri. Ento aman doŋ Rwot obolowa oko, omiowa doŋ i ciŋ jo Midian.”

¹⁴Rwot te lokere baŋe kobbe ni, “Wot ilar jo Icrael i ciŋ jo Midian i twon teko meri adwoŋ wokkono. Mom aori bo?”

¹⁵En te kobbe ni, “Tim ber, Rwot, an atwero laro jo Icrael i yore aŋo? Nen ba, atekerena en ame doŋ goro okato kare i akina jo Manace, dok an abedo cogo i doggolawa.”

¹⁶Rwot te kobbe ni, “Ento an abino bedo kedi, ibino neko jo Midian calo ineko dano acel keken.”

¹⁷Gideon te kobo ni, “Aco ka doŋ ayomoro cunyi, koŋ inyutta doŋ ginnoro ame nyuto ni yin en ikobo kedanono,

¹⁸Tim ber kur iya i kan, tuno waŋ ame abino baŋi, akelo motta aketo i nyimi.” En te gamo ni, “Abino kuri tuno waŋ ame idwogo.”

¹⁹Gideon odok i ode, te wot tedo atin dyel, kede capat a tobi mom iye ame otedo i moko kwon a romo gwata adek. Eka te keto riŋo i dita, te onyo pige i tabo, te tero i te kworo, keto i nyime.

²⁰Amalaika Obaŋa te kobbe ni, “Kwany riŋo kede capat a tobi mom iye, me iketgi i wi lela man, ite onyo pig riŋo i komgi.” Gideon daŋ te timo kittono.

²¹Amalaika a Rwot te cwayo abiro mere ame onwoŋo tye i ciŋe, te miyo wie gudo riŋo kede capat a tobi mom iye, mac te ya i kom lela-nono, te waŋo riŋo kede capat a tobi mom iye oko. Amalaika a Rwot te doŋ rwenyo oko i baŋe,

²²Gideon te niaŋ ni mannono kara onwoŋo obedo amalaika a Rwot; en doŋ te kobo ni, “Ama Rwot Obaŋa, ato oko omayin! Pien aman doŋ aneno amalaika a Rwot waŋ i waŋ.”

²³Cite Rwot te kobbe ni, “Kuc obed baŋi, kur ilwor, mom gire ibino to.”

²⁴Gideon te cano keno lam kuno pi Rwot, te cako nyiŋe ni, Rwot en kuc, keno lammaca pwod tye ocuŋ i Opra, ame obedo me ajo Abiejer naka atot tin.

²⁵I dyeworrono Rwot rik te kobbe ni, “Kwany twon a pappi, twon me aryo mere ame mwaka me dittere doŋ oromo abiro, muk keno lam a pappi me yalo Baal oko, toŋ daŋ yat Acera oko ame tye i ŋete.

²⁶Eka i te cano keno lam a Rwot Obaŋani i ka pononi kan, kun icano i gweŋe ame ocano i yore. Kwany twon me aryo-ca ite ŋolo me mot awaŋa, kun iwaŋo i yen ame ocicibo i ka woro jok a dako ame olwoŋo ni Acera, ame ibino toŋo.”

²⁷Gideon daŋ te timo kittono, otero jo apar i akina omiro mere, te wot timo kite ame Rwot ocike kede; cite pi lworo jo turgi karacel kede jo me paco-nono, omio en mom oti mo dyeceŋ, ento otimo dyewor.

²⁸Kare ame jo me paco-nono odonyo oko odiko con, nen ba, gin onwoŋo keno lam a Baal omukere oko, kede Acera ame onwoŋo tye i ŋete daŋ otoŋo oko, dok daŋ owaŋo twon twon me aryo i keno lam ame ocano kuno.

²⁹Gin te bedo penyere kengi kengi ni, “Man ŋa kara ame otimo gin-ni?” I kare ame gin obedo yenyo kun opepenyo, gin doŋ te kobo ni, “Gideon wot a Yowaci en ame otimo gin-ni.”

³⁰Jo me paco-nono te kobbi Yowaci ni, “Kel wodi oko kan me onek oko, pien en otyeko muko keno lam a Baal oko, dok daŋ otoŋo jo a dako ame olwoŋo ni Acera ame onwoŋo tye i ŋete oko piny.”

³¹Ento Yowaci te kobo baŋ jo luŋ ame onwoŋo oryeye me lweny i kome ni, “Wun ibino wunu me lweny pi Baal bo? Wun icuŋ wunu pire? Ŋat ame bino lweny pire obino neko oko odiko-ni. Ka ce en obedo obaŋa, wek en lweny pire kene, pien keno lammere doŋ otyeko muko oko.”

³²Mannono omio ocako nyiŋ Gideon i nino-nono ni, Jerubaal, ame te koppere ni, “Wek Baal en ame lweny i kome,” pien omuko keno lammere oko.

³³Jo me Midian kede jo Amalek karacel kede jo me tuŋ kide, ote bino karacel ŋolo kulo Jordan, ote bino guro kemagi i luŋ me Jejreel.

³⁴Cuny a Rwot rik te bino i kom Gideon, en te cako kuto apel, te lwoŋo jo Abiejer bino lube.

³⁵En dok te cwayo kwena baŋ jo Manace luŋ, gin daŋ ote lwoŋogi bino lube. Dok te cwayo kwena baŋ jo Acer, kede jo Jabulon kede Naputali; gin daŋ te wot kuno me wot rwatte kede.

³⁶Gideon te kobbi Obaŋa ni, “Ka ce ibino laro jo Icrael kede ciŋa kite a rik ikobo.

³⁷Nen ba, an aketo lao romo piny i laro me dino kal; ka ce toyo bino luk ka i kom yer romo keken kun piny luŋ otwo atwoa, mannono bino miya aŋeo ni yin ibino laro jo Icrael kede ciŋa, kite a rik ikobo.”

³⁸Rik daŋ te timere kittono. Kare ame en oya ibayi, odwidwinyo toyo i kom yer romo, toyo mere te poŋ yi bakuli,

³⁹Gideon dok te kobbi Obaŋa ni, “Kur imi akemo maki i koma. Tima kica akob doŋ icel keken. Koŋ iwek dok amed temo icel i kom lao romo-ni. Tim ber dok imi yer romo keken en ame bed otwo atwoa, cite kabedo luŋ ame en tye iyeni, toyo luk iye.”

⁴⁰Obaŋa dok te timo kittono dyeworrono. Pien toyo onwoŋo oluk i kabedo luŋ ame yer romo tye iye, cite lao keken en onwoŋo otwo.