Read lango Oŋolkop 7 Bible Online

Oŋolkop 7 - lango bible

Oŋolkop 7

¹Eka Jerubaal, ame en Gideon, karacel kede jo a rik tye tye baŋe, te dilo i bayi, ote wot guro gonygi i ŋet pii me Karod. Gony a jo Midian onwoŋo tye i ŋetgi tutuŋ anyarodi, i luŋ ame tye i ŋet kidi More.

²Rwot te kobo baŋ Gideon ni, jo ame tye baŋi-ni pol meicel, ame ka abino miyo jo Midian i ciŋe kede lwak jo-ni luŋ, bino miyo jo Icrael wakere i koma, ni mannono, “Ciŋa gira en olara.”

³Pi manono, kobbi lwak ni, “Ŋat ame lwor dok ame kome amyel, myero en dok gire paco.” Gideon daŋ te temogi kittono, eka jo tutumia pyeraryo wie aryo rik te dok paco, te doŋ jo tutumia apar.

⁴Rwot te kobo baŋ Gideon ni, “Jo pol meicel; tergi i pii, me awot atemgi koŋ kuno. Ŋat ame an abino kobbi ni, ‘Dano man bino wot kedi’, bino daŋ wot kedi; cite ŋat ame abino kobbi ni, ‘Dano man mom bino wot kedi’;”

⁵En te tero lwak kan apii tye iye eka Rwot te kobbe ni, “Ŋat ame bino gamoro pii kede lebe ka amato, kite ame gwok gamoro kede ka ama to pii, dano-nono ibino poko pat; ibino daŋ timo kittono i kom dano acel acel ame bino rumo piny me mato pii.”

⁶Wel jo ame te mato pii i ciŋgi kun ogamoro kede lebgi bala gwok, te romo mia adek, cite jo ocele mege luŋ te rumo aruma me mato pii.

⁷Rwot te kobbi Gideon ni, “Abino larogi kede jo mia adek ame omato pii kun gamoro i lebgi bala gwok, ate miyo jo Midian i ciŋwu. Mi jo ocele mege-ni luŋ dok gigi pacogi.”

⁸Gideon te gamo opoko pii oko i ciŋ lwak karacel kede apelgi; eka te cwayo jo Icrael ocele mege-ni luŋ dok oko i gony kun ŋat acel acel dok i kema mere, jo mia adek keken en ame te doŋ baŋe. Gony a jo Midian onwoŋo tye piny i luŋ.

⁹I dyeworrono Rwot te kobbi Gideon ni, “Ya malo iwot ilweny i kom jo i gony, pien atyeko miyogi oko i ciŋi.

¹⁰Aco ka ilworo me wot piny baŋgi kuno, wot i gonygi wun amironi Pura.

¹¹Ibino winyo gin ame gin akobo, mannono bino miyo inwoŋo tekcuny me cobogi i gonygi.” Gideon daŋ te wot gin kede amiro mere Pura naka i dog gony a jo Midian tuncel, kan ame olwenygi buto iye.

¹²Jo Midian kede jo Amalek kede jo luŋ ame oya i tuŋ kide oryeo kemagi i luŋ kun opette calo bonyo a mom kwanne. Inagagi daŋ onwoŋo mom kwanne, calo kwoyo me dog nam.

¹³Kare ame Gideon otuno kuno, lomoro onwoŋo tye atitto lekkere baŋ awottere, kun titte ni, “Nen ba, an aleko lekkoro ni aneno aŋina ogati moro me cayiri opoto i gony me Midian eka te bedo lor bino i kema, te napo reto oko piny kun loko yie ataro.”

¹⁴Awottere te dokke iye ni, “Man gire pala lweny a Gideon wot a Yowaci, dano me Icrael; en gire ennono i kome. Obaŋa gire doŋ otyeko miyo jo Midian karacel kede monnyere luŋ i ciŋe.”

¹⁵Kare ame Gideon doŋ otyeko winyo kite ame otito kede lek, kede kite ame ogonyo kede te koppere, en oworo Obaŋa. En te lokere dwogo cen i gony ajo Icrael, te kobo ni, “Ya wunu malo, pien Rwot doŋ otyeko miyo mony a jo Midian luŋ i ciŋwu.”

¹⁶Gideon te poko jo mia adekkono i dul adek, te keto apel i ciŋgi gin luŋ karacel kede opoko pii mogo ame yigi nono, kun mac rao tye i yigi luŋ,

¹⁷En te kobbigi ni, “Nen wunu, ite timo wunu daŋ gin ame an atimo. Kare ame an doŋ atuno ceggi i ŋet gony, tim wunu gin ame an ati mo.

¹⁸Ka an akuto apel karacel kede jo ame tye baŋa, wun kut wunu apel i twok gony luŋ kun daŋ iredo wunu ni, ‘Pi Rwot kede pi Gideon.’ ”

¹⁹Gideon karacel kede jo mia a rik onwoŋo tye baŋe te wot aceggi i ŋet gony i cuny dyewor ame jo ca pwod aketo okur-piny aketa, gin te cako kuto apelgi oko kun oneneko opokki ame onwoŋo tye i ciŋgi.

²⁰Eryoŋet adek luŋ te daŋ kuto apelgi kun daŋ oneneko opokki oko, kun omako mac rao i ciŋgi tuŋcam, eka i ciŋgi tuŋcem te bedo iye apel me akuta, ote daŋ wo kun oredo ni, “Pala lweny pi Rwot kede pi Gideon!”

²¹Gin luŋ ote cuŋ oko karacel kun ŋat man cuŋ kakare i ŋe gony. Mon ame onwoŋo tye i gony te ero ŋwec kun okok.

²²Kare ame okuto apel mia adek luŋ. Rwot omio mony a jo Midian oloko pala lwenygi i kom owotegi kede i kom monygi luŋ. Mony rik te riŋo naka i Bet-cita, ame tye i yo tutuŋ Jejera, tuno kede naka i waŋ lobo me Abel-mekola, ame tye i ŋet Tabat.

²³Eka rik ote lwoŋo jo Icrael i Naputali, kede i Acer, kede i Manace luŋ, gin te bino ryemo yo jo Midian.

²⁴Gideon te cwayo kwena i lobo me Epraim luŋ obedo kidikidi kun kobo ni, “Biye wunu, me ibin ilweny wunu i kom jo Midian, ikurgi wunu i waŋ kwaŋ luŋ tuno kede naka i Bet-bara, kede i Jordan.” Rik daŋ ote lwoŋo jo luŋ me Epraim, gin te bino mako waŋ kwaŋ luŋ, tuno kede naka i Bet-bara, kede i Jordan.

²⁵Gin rik te mako rwode a jo Midian aryo, Oreb kede Jeeb. Gin te neko Oreb i kidi me Oreb, eka Jeeb gin te neko i ka biyo olok a Jeeb. Man gin otimo i kare ame gin ryemo jo Midian. Gin rik te kela wi Oreb kede wi Jeeb baŋ Gideon loka Jordan.