Read lango Oŋolkop 8 Bible Online

Oŋolkop 8 - lango bible

Oŋolkop 8

¹Jo Epraim te kobbi Gideon ni, “Itimowa kara kit man piŋo ba? Nen yin mom ilwoŋowa i kare ame iwoto i lweny i kom jo Midian.” Gin te da i wie atek meicel.

²Gideon te kobbigi ni, “Kara aman an atimo ŋo ame otwero poro kedwu? Mom rayo olok a jo Epraim obedo ber ame kato en ame Abiejer opwono oko?

³Nen, Obaŋa omio rwode me Midian i ciŋwu, Oreb kede Jeeb. Kara doŋ gin aŋo ame an atwero timo ame otwero poro kedwu?” I kare ame en okobo man, akemogi doŋ te cako kwe oko.

⁴Gideon te kato loka Jordan, en karacel kede jo mia adek ame onwoŋo tye baŋe, kun onwoŋo gin ool meicel, cite onwoŋo pwod otye oryemo yo jo Midian.

⁵Omio en te kobbi jo Cukot ni, “Tim wunu ber imi wunu ogati baŋ jona-nie, pien gin ool meicel, dok atye aryemo yo Jeba kede Jalmuna, ame gin rwode me Midian.”

⁶Rwode me Cukot te gamo ni, “Jeba kede Jalmuna doŋ imako oko bo, ame miowa omio ogati baŋ monnyi-nie?”

⁷Gideon te gamo ni, “Aco doŋ do, cite ka Rwot bino miyo Jeba kede Jalmuna i ciŋa, abino pwopwodo komwu kede okuto alal me tim kede okuto laŋo.”

⁸En rik te kato oko i kuno te kato naka i Panuel, te daŋ kwayogi kite acellono. Jo me Panuel daŋ te kobbe kite ame jo me Cukot onwoŋo okobbe.

⁹En te kobbi jo Panuel ni, “Inino ame abino dwogo kan i kuc, abino muko twon gedo moro ocuŋ kan i guŋ-ŋi oko.”

¹⁰I kare-nono onwoŋo Jeba kede Jalmuna tye i Karkor, karacel kede monygi ame welgi romo tutumia apar wie abic. Man jo ame onwoŋo odoŋ i kom mony luŋ ame onwoŋo oya i tutuŋ kide; pien jogi onwoŋo doŋ oneko oko ame romo tutumia acel kede pyeraryo, ame rik gin onwoŋo jo me lweny.

¹¹Gideon te wot lubo yo ame jo a bedo i kema lubo ame tye tutuŋ kide me Noba kede Jogbeka, en te wot lweny i monygi, pien monygi onwoŋo obedo otworo tokgi ata aboŋo jo moro ame kuro piny.

¹²Jeba kede Jalmuna rik te riŋo oko, eka en te ryemo yorgi, te mako rwode aryo me Midiannono oko, Jeba kede Jalmuna, te miyo monygi luŋ bedo ame komgi doŋ oto oko.

¹³Gideon wot a Yowaci te doŋ dwogo i lweny kun lubo yo i tutuŋ malo ame woto i Kerec.

¹⁴En te mako atin awobi moro me Cukot, te pepenyo en, awobi-nono te coye nyiŋ rwode kede odoŋe luŋ me Cukot, ame gin luŋ oromo pyerabiro wie abiro.

¹⁵Gideon te wot baŋ jo Cukot, te kobbigi ni, “Neno wunu doŋ Jeba kede Jalmuna ame rik iŋala wunu pirgi-nie, kun ikobo wunu ni, ‘Jeba kede Jalmuna doŋ imako oko bo, ame miowa omio ogati baŋ joni ame ool wokkono?’ ”

¹⁶Gideon te mako odoŋe me bomanono, te jako okuto alal kede me laŋo, te bedo pwodo kede jo me Cukot.

¹⁷Dok te muko daŋ twon gedogi ame onwoŋo ocuŋ i guŋ i Penuel, te daŋ neko jo me boma-nono oko.

¹⁸Gideon te kobbi Jeba kede Jalmuna ni, “Ane kara jo ame rik ineko wunu i Tabor?” Gin te gamo ni, “Kite ame yin ibedo kede-nono, en kite ame gin daŋ rik otye kede; rik ocalli itino abaka moro.”

¹⁹Gideon te dok iye ni, “Jonnaca rik obedo omegona ame onywako kedgi toto; daŋ kite a Rwot tye kede kwo-ni, kono rik mom inekogi, kono an daŋ mom anekowu.”

²⁰Gideon te kobbi Jeter wode me kao ni, “Ya malo inekgi oko.” Ento atin awobi ca mom gire te woto pala mere; pien en onwoŋo alworo, kite acalo rik en pwod atin awobi.

²¹Jeba kede Jalmuna te kobbi Gideon ni, “Yin doŋ ya ikomi inekwa oko, pien kite ame ico tye kede, teko me kome daŋ tye kittono.” Gideon te ya neko Jeba kede Jalmuna oko, te gonyo mola me cal dwe ame rik onwoŋo tye i ŋut inagagi.

²²Jo Icrael doŋ te kobbi Gideon ni, “Yin doŋ bed alocwa, yin karacel kede wodi kede ikwai, pien yin ilarowa i ciŋ jo me Midian.”

²³Gideon te kobbigi ni, “An gira mom abino bedo alocwu, woda daŋ mom bino bedo alocwu; Rwot en ame bino bedo alocwu.”

²⁴Gideon te kobbigi ni, “Koŋ akwawu ba, ŋat acel acel myero otim ber omia mola yit ame eyako.” (Pien okworgi ame gin olwenyo i komgi onwoŋo rik tye kede jabu ame gin oruko i yitgi, pien gin rik obedo jo Icmael.)

²⁵Gin te gamo ni, “Wan oye miyi gire.” Gin te peto boŋo piny, ŋat acel acel te bolo iye mola me yit ame eyako.

²⁶Pek a jabu me yit ame ekwao-naca te romo cekel tutumia acel kede mia abiro-nono kun nwoŋo mom oribo iye mola me cal dwe, kede mola aruka ame ryeny aryenya kede boŋŋi ame obedo amaramar ame rik onwoŋo rwode me Midian ruko, dok daŋ mom oribo iye mola ame onwoŋo gin tweo i nut inagagi.

²⁷Gideon rik te twakogi me epod, te keto i paco mere i Opra; jo Icrael rik te bedo timo tim me alaya kuno, eka te lokere doko kumma me ciko Gideon kede ode luŋ.

²⁸Obaŋa rik te loyo jo Midian kittono i nyim jo Icrael, naka mom dok ote medde tiŋo wigi atwal. Lobo rik dok te we pi mwakki pyeraŋwen i kare a Gideon.

²⁹Jerubaal wot a Yowaci rik te wot bedo i ode.

³⁰Gideon rik onwoŋo tye kede itino awobe pyerabiro, ame obedo itino mere ikokome, pien monne rik pol.

³¹En daŋ onwoŋo tye kede dako ame obedo aŋeca, ame rik bedo i Cekem; dako-naca rik te nywalle atin awobi, ame en te cako nyiŋe ni Abimeriki.

³²Gideon wot a Yowaci rik doŋ te to oko ame doŋ onwoŋo oteggo aber abera, eka ote yike i lyel a pappere Yowaci, ame onwoŋo tye i Opra, me a jo Abiejer.

³³Kare ame Gideon doŋ oto, jo Icrael rik dok te lokere oko i timo tim me alaya baŋ Baal, ote miyo Baal-berit bedo obaŋagi.

³⁴Jo Icrael mom dok te po i kom Rwot Obaŋagi ame rik olarogi i ciŋ okworgi tuŋŋi i tuŋŋi.

³⁵Gin daŋ mom ote nyuto cunnyoro me mar i kom otino a Jerubaal (ame en Gideon) pi ginnoro luŋ aber ame en rik otimo i kom jo Icrael.