Read lango Oŋolkop 9 Bible Online

Oŋolkop 9 - lango bible

Oŋolkop 9

¹I kare-nono Abimeriki wot a Jerubaal rik te wot i Cekem baŋ ŋeo mere, te wot kobbigi luŋ karacel kede jo luŋ me doggola a tottere, ni,

²“Kob wunu kop kun jo Cekem luŋ awinyo, ni, ‘Mene ame ber i tuŋ baŋwu, ka itino a Jerubaal luŋ en ame oloowu onyo ŋat acel en ame oloowu?’ Myero daŋ ipo wunu ni an abedo atin meremowu ikome.”

³Neo mere te kobo kop magi luŋ pire kun jo me Cekem luŋ awinyo. Cuny jonnaca rik te lokere oko me lubo Abimeriki pien gin okobo ni, “En obedo ominwa.”

⁴Gin te miyo Abimeriki lim me ryal a romo pyerabiro-nono, ame okwanyo i ot Baal-berit; en te bedo wilo i jo a konygi pe, ame kitegi obedo atata, me wek gin bed jo a lube.

⁵En rik te dok paco i ot a pappere ame tye i Opra, te neko omego mere oko, ame obedo itino a Jerubaal, oneko gin pyerabiro luŋ i kom gweŋ acel keken; ento awobi a Jerubaal atidi mere Yocam, rik te bwot, pien en onwoŋo opono gire oko.

⁶Jo luŋ me Cekem rik te wot cokere karacel, kede jo me Bet-millo luŋ, ote wot keto Abemiriki me bedo abaka i Cekem i ŋet kworo ame kidi ocibo me awora tye i ŋete.

⁷I kare ame okobbi Yocam kop man, en owoto, te wot cuŋ malo i wi kidi me Gerijim, te redo atek kun kobbigi ni, “Wun jo me Cekem, koŋ iwinya wunu, me Obaŋa winy kwacwu.

⁸I nino moro yen ociro me wot wiro ŋattoro i akinagi me bedo abakagi. Gin rik te kobo baŋ jeituni ni, ‘Lowa ba.’

⁹Cite jeituni rik te gamo ni, ‘Abino weko twon moo i koma-ni oko, ame oworo kede obaŋe kede dano, eka ate wot yeŋere i wi yen malo?’

¹⁰Yen dok te kobbi oduro ni, ‘Yin giri bin ilowa.’

¹¹Cite oduro te kobbigi ni, ‘Kite ame alim kede wok-ki awek oko, kede nyigga abeco wok-ki, ate wot bedo yeŋere i wi yen malo kuca?’

¹²Yen dok te kobbi olok ni, ‘Yin giri bin ilowa.’

¹³Cite olok te kobbigi ni, ‘Awek piga ame yomoro cuny Obaŋa kede dano-ni oko, eka ate wot bedo yeŋere i wi yen malo kuca?’

¹⁴Yen luŋ te doŋ kobbi abelwinyo ni, ‘Yin giri bin ilowa.’

¹⁵Abelwinyo te kobbigi ni, ‘Ka ce iwira wunu i moo me loc, me wek abed abakawu i cuny me ateni, bye inwoŋ wunu ka larre i tipona; aco ka ce mom amannono, mac myero ya i kom abelwinyo owan yen cedar luŋ me Lebanon.’

¹⁶“Doŋ pi mannono ba, ka rik itimo wunu kede cuny me gen cunywu daŋ cil i kare ame iketo wunu Abimeriki me bedo abakawu, dok daŋ ka rik itimo wunu tim aber i kom Jerubaal karacel kede ode, ame itio wunu gin ame romo tic a rik en otio ca,

¹⁷pien pappa rik olwenyo pirwu, ojalo kwo mere te larowu i ciŋ jo Midian,

¹⁸nen, am an tin wun itwarre wunu me lweny i kom ot a pappa, ineko wunu itino mere pyerabiro i wi gweŋ acel, eka ite keto wunu Abimeriki ame obedo atin a dako aŋeca, me bedo abaka ame loo jo i Cekem, pien en obedo okeowu,

¹⁹ka ce tin wun iŋeo wunu ni rik itimo wunu kede cuny me gen kun cunywu daŋ cil i kom Jerubaal karacel kede jo me ode, myero ibed wunu kede lelo i kom Abimeriki, en daŋ bed kede lelo i komwu.

²⁰Aco ka ce mom amannono, myero mac ya i kom jo Cekem kede jo me Bet-millo me wan Abimeriki oko.”

²¹Yocam rik te ŋwec gire oko, laro kome, te wot naka i Beer, te wot bedo kuno pi lworo ominnere Abimeriki.

²²Abimeriki te loyo jo Icrael mwakki adek.

²³Icennere Obaŋa te cwayo cuny arac i akina Abimeriki kede jo Cekem, te cako timo timmogo me apala i kom Abimeriki,

²⁴me wek tim me gero ame en rik otimo i kom itino a Jerubaal pyerabiro ca obed i wi Abimeriki, me tim me romo omego mere odok gire i wie pi nekogi, kede i wi jo Cekem, pien gin en ame omeddi Abimeriki teko me neko omego mere.

²⁵Jo Cekem rik te keto jo mogo buto i yo me kure i wi kidi. Jo-nono rik te yako jo ame bedo i yo-nono, rik ote kobbi Abimeriki koppere oko.

²⁶I kare-nono Gaal wot Ebed rik te dak i Cekem karacel i wati mere; jo me Cekem rik dok te cako keto gengi i kome.

²⁷I nino moro gin rik te wot i poto, ote wot pwono nyig olokgi i poto, ote nyono, biyo, ote yiko ecuban. Gin ote wot i ot obaŋagi, ote cem, ote mate daŋ kun oyeto Abimeriki.

²⁸Gaal wot Ebed te kobo ni, “Abimeriki en ŋa? Wan jo Cekem kono wan obedo jo aŋo, ame mio wan obedo tic pire? Wot a Jerubaal kede Jebul ame rik obedo awaŋe mom gin obedo tic baŋ jo Kamor ame obedo kwaro it jo Cekem? Ŋo ame mio wan dok obedo tiye?

²⁹Kono ce jo man onwoŋo tye i ciŋa, kono akwanyo Abimeriki oko. Kono onwoŋo akobbe ni, ‘Med monnyi me obin onenne kedi.’ ”

³⁰I kare ame Jebul, ame rik en obedo rwot me boma-nono owinyo kop a Gaal wot Ebed, akemo omako meicel.

³¹En te cwayo kwena baŋ Abimeriki i Aruma kun kobbe ni, “Nen ba, Gaal wot Ebed karacel kede wati mere obino kan i Cekem; aman gin ocako tugo lwak me kan me lweny i komi.

³²Pi mannono ba, yin karacel kede jo ame tye baŋi, myero iwot wunu dyewor, iwot ibut wunu, ikur wunugi i yo poto.

³³Eka odiko con ame ceŋ pwod adonnyo adonya yin myero iya con, me iwot ilweny i kom boma-nono. Kare ame en karacel kede jo ame tye baŋe obino me lweny kedi, yin doŋ itwero timogi kite ame ineno.”

³⁴Abimeriki te ya dyewor karacel kede jo ame onwoŋo tye baŋe, gin te wot buto kuro jo me Cekem kun opoko monygi aŋwen.

³⁵Gaal wot Ebed rik te wot cuŋ i dogcel me boma-nono, Abimeriki karacel kede jo ame onwoŋo tye baŋe, te ya i kan ame rik gin opono iye.

³⁶Kare ame Gaal onenogi, okobbi Jebul ni, “Neno koŋ jo ka aciro i wi kiddi malo!” Jebul te gamo ni, “Yin dok iloko tipo me kiddi doko jo.”

³⁷Gaal dok te medo kobo ni, “Koŋ inen, koŋ inen jo tye aciro i dyere me lobo i malo ca, kun mony ocele ciro bino i tutuŋ yo me te kworo Atyet ca.”

³⁸Jebul te daŋ kobbe ni, “Kara dogi ame iduro-nono tin tye kwene? Yin ame ikobo ni, ‘Abimeriki odoko ŋanono omiowa obedo tiye? Mannono mom jo ame yin icao-ni?’ Aco koŋ doŋ iwot ilweny kedgi.”

³⁹Gaal rik te wot kun otelo wi mony me Cekem, te wot lweny i kom Abimeriki.

⁴⁰Abimeriki te cako ryeme, en te riŋo oko laro kome. Jo apol te bedo rereta kun owawano jo apol ata naka i dogcel me donyo i boma.

⁴¹Abimeriki te bedo i Aruma, Jebul te ryemo Gaal kede wati mere oko, mom dok te miyogi bedo i Cekem.

⁴²Orwo mere ocele jo te wot i poto, ote daŋ bino titto koppere baŋ Abimeriki,

⁴³Abimeriki te tero jo mere, te pokogi i dul adek, gin te wot buto kuro jo i potti. En te neno jo tye abino adonyo i boma, en te ya lweny i komgi, te nekogi oko.

⁴⁴Abimeriki karacel kede dul mony ame rik onwoŋo tye baŋe, te mwomere anyim i ŋwec naka i dogcel me donyo i boma-naca kun dul mony aryo ocele mwomere i megi dok kede i kom jo ame onwoŋo tye i potti, eka ote nekogi oko.

⁴⁵I nino-nono luŋ Abimeriki te bedo lweny i kom jo i boma, en te mayo boma-nono oko, te neko jo iye oko, te daŋ mumuko udi iye oko luŋ, te onyo kado iye.

⁴⁶Kare ame jo ame bedo i gedo me Cekem ocuŋ iguŋ malo owinyo koppere, gin te donyo iyi icika ame ogolle i te ot jok El-berit.

⁴⁷Eka rik ote titti Abimeriki ni jo luŋ ame bedo i gedo me Cekem ame ocuŋ iguŋ malo, tye ocokere karacel.

⁴⁸Abimeriki rik te wot i wi kidi me Jalmon, karacel kede jo luŋ ame onwoŋo tye baŋe. Abimeriki te mako lee me toŋo yen i ciŋe, te cako totoŋo rido ryoŋo i wi gwoke, te wot kobbi jo ame rik tye baŋe ni, “Gin ame ineno wunu an atio, wun daŋ ru timo wunu kittono.”

⁴⁹Mannono te miyo ŋat acel acel i akinagi lwero riddo mere lubo kede yo Abimeriki. Gin te wot yido riddogi-nono i wi icika ame onwoŋo ogolo ite ot jok El-berit, ote waŋo i cika-nono oko kede mac; mannono te miyo jo luŋ ame onwoŋo bedo i gedo me Cekem ocuŋ iguŋ cato oko, co kede mon ame ceggi romo tutumia acel.

⁵⁰Abimeriki dok te wot lweny i kom Tebej, te guro gonnyere kun otiko kede Tebej, ote daŋ mako oko,

⁵¹Twon gedo moro atek, ame ocuŋ malo iguŋ rik onwoŋo tye i dye boma-nono, co kede mon rik te riŋo laro kuno, ote cegere gigi oko i yie. Gin te wot naka malo i wi gedo-nono.

⁵²Abimeriki te wot i gedo ocuŋ mali i gunnono, te wot lweny iye.

⁵³Dako moro te boyo twon anya-kidi rego, te napo i wi Abimeriki tuco cogo me adammere oko.

⁵⁴Abimeriki te ru lwoŋo awobi ame onwoŋo otiŋo jami lwennyere ni, “Kom dako keken en oneke.” A wobi mere te cobbe pelo apela, te to oko.

⁵⁵Kare ame jo Icrael oneno ni Abimeriki doŋ oto oko, gin daŋ te ket oko, kun ŋat acel acel dok i paco mere.

⁵⁶Obaŋa te culo bal ame Abimeriki otimo i kom pappere kittono, pi neko omego mere pyerabiro.

⁵⁷Obaŋa te daŋ dwoko tim a jo Cekem areco luŋ i wigi, koppa a Yocam wot a Jerubaal ame rik ocenogi kede te cobere kakare i komgi.