Read lango 3 Lakana 1 Bible Online

3 Lakana 1 - lango bible

3 Lakana 1

¹Waraga man oya i baŋ adwoŋ. Baŋ awotta Gayo ame amaro i ateni.

²Awotta ame amaro, akwao Obaŋa me mi ibed aber i gin luŋ dok mi komi bed ayot. Aŋeo ni itye aber i cunyi.

³Abin alelo meicel i kare ame omego mogo obino kan, te miyo caden i kom kitti me ateni, kite acalo yin giri ilubo kop ateni.

⁴Mom tye ginnoro ame dok mia alelo atek akato winyo ni itinona tye alubo kop ateni.

⁵Dyerra ame amaro, yin agen meicel i ticci ame itiyo pi omegowa, akato mere baŋ wele ame mom iŋeo,

⁶ame gin omio caden i kom mar meri i nyim lwak jo oye Kricito. Tim ber ikonygi i kite a myero, i wotgi i tic Obaŋa.

⁷Pien gin ocako wotgi pi nyiŋ Kricito, mom ogamo ginnoro i baŋ jo a mom oye en.

⁸Pi mano, myero wan okony kodi Jo-nono, me wan obed otic wadgi i rabo kop me ateni.

⁹Doŋ atyeko coyo koppogo baŋ lwak jo oye Kricito, ento Dioturepe ame mito kette kene ibedo me agege i akinagi, mom oye twerra.

¹⁰Man omio ka abino, abino poyo wigi i gin ame en obedo tiyo, kun coko kop areco i koma, Mom mano keken, en kwero daŋ jolo omegowa, kun geŋo daŋ jo ame mito jologi, dok ryemogi oko i akina lwak jo oye Kricito.

¹¹Dyerra ame amaro, kur ipotto gin arac, potto gin aber, ŋat ame timo gin aber, en dano Obaŋa; ŋat ame timo gin arac, mom ru oneno Obaŋa.

¹²Jo luŋ omio caden aber i kom Demetrio, anaka kop ateni obedo caden pire; an daŋ amio amanno, yin daŋ iŋeo ni caden ame amio ateni.

¹³Onwoŋo atye i kop apol ame myero acoyi pire, ento mom amito coyo alam kede vino.

¹⁴Atye i gen me neni oyot, eka ote bino kop waŋ i waŋ.

¹⁵Kuc obed baŋi, Owoteni omoti, Mot owotewa, ŋat acel acel i nyiŋe.