Read lango Juda 1 Bible Online

Juda 1 - lango bible

Juda 1

¹Waraga man oya i baŋ Juda ame amiro a Yecu Kricito dok omin a Yakobo. Baŋ jo ame olwoŋo ame bedo i mar Obaŋa Papo kede i gwok a Yecu Kricito.

²Kica, kuc kede mar myero medde baŋwu.

³Owotena, onwoŋo atemo i tekona luŋ me coyiwu waraga pi kop i kom larre ame wan luŋ onotte iye, eka ate neno ni, myero aco acuk kede cunywu me irom wunu atek pi iyee ame rik doŋ omio oko baŋ jo Obaŋa tyen acel ame oromo meicel.

⁴Pien jo mogo a mom lworo Obaŋa olibere aliba me donyo i akinawa, jo ame kop ame oŋolligi rik onyuto con i coc a yam ocoo, Gin oloko winyo ame Obaŋa imiowa odoko tim me tarwaŋ, okwero Adwoŋwa acel keken ame en Rwotwa Yecu Kricito.

⁵Wun jo ame rik doŋ omio iŋeo wunu man luŋ odoco, amito koŋ dok apoyo wiwu ni, Rwot ame rik olaro jo Icrael i lobo me Miciri, icennere dok obin otyeko jo a mom oye oko.

⁶Omalaika a rik mom ogwoko ka locgi ame omiogi, ento oweko kabedogi oko, daŋ en obin ogwokogi kan acol kede jegere a ri nakanaka, ituno i kare me ŋolo kop i nino adwoŋ;

⁷bala rik Codoma kede Gomora kede paco adoŋo ame omanogi ote donyo i tim me coco kede par areco a mom me anywalli, ote ŋolligi can me mac a mom to, gin obedo calo anen baŋ jo luŋ.

⁸Nen kadi amanno, jo-ni daŋ i kite acellono, i lek ame gin leko, olilo komgi, okwero loc Obaŋa daŋ oko, dok ote yeto wegi kwogo-gu.

⁹Ento i kare ame Mikael, amalaika adwoŋ, rik romo kede Catan kun opyem kede pi kom Muca, en rik mom obin otiŋere pi ŋolle kopporo me ayet, ento okobo ni, “Rwot myero juki.”

¹⁰Jo man yeto gin ame gin mom oniaŋ iye, cite kodi gin a gin oŋeo pi lubo kite ame oketogi kede, acalo leyi a mom ryek, tye a tyekogi oko.

¹¹Gin obino neno can be! Pien gin wopo yo a Kain, oonyakino i tammogo a mom tye kakare pi mito lim bala rik Balaam, dok dan oto oko pi pyem bala rik Kora.

¹²Gin okelo lewic iyi aramawu me mar ka ogado cam aboŋo lworo, kun oparo ka pi komgi kengi. Gin ocalli pol ame pii mom iye ame yamo okolo; orom i yen ame nyiggi mom nen i kare me cekgi, ame oputo lwitgi oko, yam oto iryo.

¹³Ocal dan i nam ame atagere ager, ame wowota atata, ame Obaŋa otyeko yiko kakargi oko i kabedo acol icuc pi kare a mom gik.

¹⁴Magi-nono en gin a rik Enoka, ame obedo dano me abiro iya i kom Adam, rik okobo pire acalo adwarpiny ni, “Nen wunu, Rwot bino tuno kede lwak jo mere acil apol ata,

¹⁵me ŋolo kop i kom jo luŋ, kede miyo kop loyo jo luŋ a mom lworo Obaŋa pi timgi a mom olworo kede Obaŋa, kede pi kop luŋ me gero ame abalo ame mom lworo Obaŋa okobo i kome.”

¹⁶Mano gin jo aŋuŋura, jo a pyepyema, kun olubo mitgi kengi, doggi opoŋ i olakino me awaka, odworo jo pi nwoŋo ka gin, ame yigi mito.

¹⁷Ento wun owotena, myero ipoyo wunu kop a yam okwena a Rwotwa Yecu Kricito otito pire con.

¹⁸Gin rik okobbiwu ni, “I kare me agikki oŋale bino bedo tye, ame bino lubo mit megi kengi, ame mom olworo Obaŋa.”

¹⁹Jo-nu gin okel apokapoka, gin jo me lobo man, Cuny Obaŋa mom baŋgi.

²⁰Ento wun owotena, doŋ wunu atek i kom iyeewu acil wok-ki, kun ikwao wunu Obaŋa i Cuny Acil;

²¹gwokere wunu kenwu i mar Obaŋa, kur wunu kica a Rwotwa Yecu Kricito naka i kwo a perakino nakanaka.

²²Bed wunu i kica i kom jo mogo ame cacapa acacap;

²³lar wunu mogo kun iceo wunugi i kom mac; bed wunu i kica i kom jo mogo kun ilwor wunu, kun ikwero wunu ruk ame bal me kom tye iye.

²⁴Kwogo bed baŋ ŋat a twero gwokowu aboŋo rette, dok twero miyo icuŋ wunu aboŋo roccoro i nyim kwogo mere ilelo.

²⁵Kwogo, dit, loc kede twer obed baŋ Obaŋa acel keken Alarwa pi Yecu Kricito Rwotwa, geye a mom ru oketo lobo, aman, kede waŋ i wan. Amen.