Read lango Nyut a Lakana 1 Bible Online

Nyut a Lakana 1 - lango bible

Nyut a Lakana 1

¹Man en gin ame Obaŋa onyutti Yecu Kricito, me en daŋ niaŋ omiro mere i kom gin a myero timere oyotoyot i kare me i nyim. En rik ocwalo amalaika baŋ amiro mere Lakana pi miye ŋeyo,

²eka Lakana dok te bedo caden me kop ame Obaŋa okobo, kede me caden ame Yecu Kricito omio, kun otito pi gin ame eneno.

³Tye kede winyo ŋat ame kwano kop ame orabo i buk man i nyim lwak, jo a winyo daŋ tye kede winyo, kede jo ame lubo gin ame ocoo iye, pien kare doŋ ceggi.

⁴Kop man oya i baŋ Lakana kun cwalli lwak jo oye Kricito i kabedo abiro apapat a tye i Acia. Winyo bed baŋwu kede kuc a ya i baŋ ŋat ame tye, ame yam tye con, dok ame bino bino, kede ame a ya i baŋ cuny abiro ame tye i nyim kom me loccere,

⁵kede a ya daŋ i baŋ Yecu Kricito, acaden a genne, atin kao i akina jo oto, kede aloc obakki me wi lobo luŋ. Kwogo bed baŋ ŋat a marowa, dok daŋ ogonyowa i twec me balwa kede remo mere,

⁶eka te lokowa doko lwak ame en aloo, kun obedo olamdog ame tiyi Obaŋa mere ame en Pappere daŋ. Kwogo kede twer obed baŋe nakanaka. Amen.

⁷Nen, en abino kede pol, jo luŋ bino nene i waŋgi, anaka jo a nwaŋ ocobe; atekere luŋ me wi podo bino kumo pire. Amannono kom. Amen.

⁸“An Alufa kede Omega,” man kop a Rwot Obaŋa, en ame tye, ame yam tye con, dok ame bino bino, en Won Twer Ducu.

⁹An Lakana, ominwu ame onotte kedwu i canwa, i locwa kede i kanyakinowa i Yecu. Rik onwoŋo atye i icula nam ame olwoŋo ni Pati mo, pi kop ame Obaŋa okobo kede caden ame Yecu omio.

¹⁰Rik onwoŋo Cuny Acil oyuto tamma oko i nino a Rwot, eka ate winyo dwon aloŋo i ŋea bala apel

¹¹ame okobba ni, “Co gin ame ineno i buk, eka ite cwayo baŋ lwak jo oye Kricito i kabedo abiro apapat, i Epeco, i Cumurna, i Pergamo, i Tuatira, i Caradic, i Piladelpia kede i Laodikia.”

¹²Eka ate lokere me neno dwon a kop keda, A doŋ alokere ate neno gicibo tara me jabu abiro,

¹³eka i dyere me gi-cibo tara abiro-ni, aneno ŋattoro ame cal i wot a dano. Orukere kede jor abor, kede del me Jabu ame omano kore.

¹⁴Yer wie tar bala yer romo, onyo ba pee, eka waŋe te cal i leb mac,

¹⁵tyene te cal i mola ame olio i keno, eka ote rudo acil, kun dwone mor winyere bala acucur pii.

¹⁶I ciŋe tuŋ cem onwoŋo omako acer abiro, pala lweny ame bit ryoryo opello i doge, kun nyime ryeny calo ceŋ a ryeny atek.

¹⁷Ka anane, arette piny i tyene, adoŋ acalo ŋat oto. Ento en oketo ciŋe tuŋ cem i koma kun kobo ni, “Kur ilwori; an ŋat me agege kede en me agikki mere,

¹⁸an ŋat akwo ca. Rik ata oko, ento nen, doŋ atye kwo, abino bedo kwo atwal. Dok atye daŋ kede agony me To kede me Kadec.

¹⁹Aman doŋ, co gin ame ineno, gin a tye, kede gin a bino timere icennere.

²⁰Koŋ agonnyi muŋ me acer abiro ame ineno i ciŋa tuŋ cem kede gi-cibo tara abiro me jabu. Acer abiro obedo omalaika a lwak oye Kricito ame tye i kabedo abiro apapat, eka gi-cibo tara abiro obedo lwak oye Kricito ame tye i kabedo apapat abiro.