Read lango Nyut a Lakana 10 Bible Online

Nyut a Lakana 10 - lango bible

Nyut a Lakana 10

¹Dok ate neno amalaika ocele atek meicel kun bino piny iya i polo. Orukere kede pol, kun etaloka tye i wie, waŋe cal i ceŋ, tyene cal i pagi mac.

²Rik en tye kede atin bukkoro oyabere i ciŋe. Oketo tyene me tuŋ cem i nam kede tyene me tuŋ cam i wi lobo.

³Oredo i dwon aloŋo bala eŋato ka omor; ka oredo, mor a kot te mwomwoca tyen abiro.

⁴Ka doŋ kot omwomwoca tyen abiro, ate yikere i coc, cite ate winyo dwon a ya i polo ame kobo ni, “Kop ame kot omwomwoca tyen abiro okobo, twe oko, kur ico,”

⁵Eka amalaika ame onwoŋo aneno ocuŋ i nam kede i lobo ca, te tiŋo ciŋe tuŋ cem malo i polo,

⁶eka te kwoŋ i nyiŋ ŋat a perakino odoco, ame oketo polo kede jami luŋ a tye iye, kede lobo i jami luŋ a tye iye karacel kede nam i jami luŋ a tye iye, kun kobo ni, “Agalagala moro doŋ pe,

⁷ento ka kare oromo me amalaika me abiro bino kuto apellere, Obaŋa bino cobo tammere me i muŋ acalo rik otito baŋ omiro mere odwarpiny.”

⁸Dwon ame onwoŋo awinyo kun oya i polo te dok kop keda tyen me aryo ni, “Wot igam buk ame tye oyabere i ciŋ amalaika ame ocuŋ i nam kede i lobo.”

⁹An daŋ ate wot baŋ amalaika, ate kobbe ni mia atin buk ca. En te kobba ni, “Gam, iwot imwod oko. Bino bedo akec iyii, ento bino bedo alim i dogi bala moo kic.”

¹⁰Eka ate gamo atin buk ca i ciŋ amalaika, ate camo oko. Obedo alim i doga bala moo kic, ento i kare a doŋ acamo, yia te doko akec oko.

¹¹Eka ote kobba ni, “Yin myero irab kop Obaŋa doki acalo adwarpiny, i kom jo apapat kede rok kede leb kede oloc apol.”