Read lango Nyut a Lakana 11 Bible Online

Nyut a Lakana 11 - lango bible

Nyut a Lakana 11

¹Eka ote miya ogada me pimo kede, acalo abiro, ote kobba ni, “Ya iwot ipim ot Obaŋa, kede keno me lam, kede jo a woro Obaŋa i ode.

²Ento pe ipim dyekal me ot Obaŋa a tye oko, wek mano bedi, pien doŋ otyeko miyo oko baŋ jo a mom ŋeo Obaŋa, gin bino nyono boma acil pi dwete pyeraŋwen wie aryo.

³Dok abino miyo ocadenna aryo twer me rabo koppa acalo odwarpiny pi nino tutumia acel i mia aryo kede pyerabicel nono, kun gin orukere i boŋo cola.”

⁴Ocaden aryo-ni gin yen jeituni aryo ca kede gi-cibo tara aryo ame ocuŋ i nyim Rwot me lobo.

⁵Ka ŋattoro mito timogi rac, mac ya i doggi, waŋo okworgi oko; doŋ ka ŋattoro bino mito timogi rac, mannono en kite ame obino neke kede.

⁶Gin tye i twer me cego polo oko me kot kur cwe i kare a gin tye a rabo kop acalo odwarpiny. Otye daŋ i twer me loko pi i doko remo, dok me pwodo lobo i kit cannoro luŋ, tyen apol acalo yigi mito.

⁷Ka gin doŋ otyeko miyo cadengi, lee-naca ame yitto iyi bur ame agikki tere mom bino ero lweny i komgi, te loyogi, daŋ te nekogi oko.

⁸Eka komgi ame oto bino buto i dye yo me boma adwoŋ, ame i carokop olwoŋo nyiŋe ni, Codoma kede dok, Miciri, en daŋ kan a rik oguro iye Rwotgi i kom yataria.

⁹Jo ame oya i akina lwak kede atekere kede leb kede rok apapat bino neno komgi oto-nono pi nino adek i nucu, kun mom oye ni yikgi i lyel.

¹⁰Jo ame bedo i lobo bino ŋatte i komgi, obino lelo kede cwayo mot i akinagi kengi, pien odwarpiny aryo-nono rik onwoŋo owuno jo ame bedo i lobo atek.

¹¹Cite a doŋ nino adek i nucu okato, weo me kwo oya i baŋ Obaŋa te dok donyo i komgi, eka gin ote ya malo, ocuŋ i tyengi, lworo iyiliyili meicel te mako jo onenogi.

¹²Eka gin ote winyo dwon aloŋo ame oya i polo kun kobo ni, “Yitto wunu malo kan!” Eka gin ote yito i polo i pol, kun okworgi anenno.

¹³I caa-nono cuto rik te bedo oyeŋo adit meicel, eka dul acel me apar me boma-nono te rwacere oko. Oyeŋo-nono oneko jo tutumia mia abiro, jo odoŋ lworo omakogi atek, ote miyo kwogo baŋ Obaŋa me polo.

¹⁴Can me aryo doŋ okato; nen, can me adek doŋ ceggi poto.

¹⁵Amalaika me abiro te kuto apellere, eka dwonnogo aloŋo te winyere i polo ame kobo ni, “Loc me lobo doŋ oketo i ciŋ Rwotwa kede Kricito mere, en doŋ bino loc gire waŋ i waŋ.”

¹⁶Eka odoŋe pyeraryo wie aŋwen ame obedo i kom locgi i nyim Obaŋa te onyere piny aryeba cuny, te woro Obaŋa

¹⁷kun okobo ni, “Wan omii pwocwa, Rwot Obaŋa Won Twer Ducu, yin ame itye dok yam itye giri con, pien doŋ imako tekoni adwoŋ, icako doŋ Ioc,

¹⁸Orok rik obedo i akemo, ento akemo meri te bino, kede kare me ŋolo kop a jo oto, kare me miyo omironi, odwarpiny kede joni acil, motgi me pwoc, baŋ jo luŋ a lworo nyiŋi, jo atino i jo adoŋo, kede kare me nyoto jo a tye a nyoto lobo.”

¹⁹Eka ote yabo ot Obaŋa ame i polo, canduk me cikere te nen oko iyi ot Obaŋa. Kot te ero memenya, mor adwoŋ te winyere, kede mwomwoca me kot, oyeŋo te yeŋo piny oko, pee te corre adwoŋ meicel.