Read lango Nyut a Lakana 13 Bible Online

Nyut a Lakana 13 - lango bible

Nyut a Lakana 13

¹Dok ate neno lee moro ame adonnyo iyi nam, ame tye i tuŋe apar kede wie abiro, kun tok kwogo apar me loc tye i tuŋe-nogo luŋ; i wie acel acel daŋ tye iye nyinnoro ame nyuto acae i kom Obaŋa.

²Lee ame anenonu rik cal i kwac, tyene cal i tyen dubu, doge cal i dog eŋato. Twon twol iyiliyili ca te miyo baŋe teko mere, kede kom loccere, kede twer adwoŋ.

³Wie acel iloki ogoo oneko oko, ento kan ame owano a romo neke onwoŋo doŋ ocaŋ oko. Lobo luŋ te wapo lee-nono kun owuro awura.

⁴Jo oworo twon twol iyiliyili ca, pien en omio twerrere baŋ lee-nono, dok daŋ ote woro lee kun okobo ni, “Ŋa kara a cal i Iee-ni, dok ŋa a twero lweny kede?”

⁵Lee-nu omie twer me kobo koppogo me awaka kede me yeto Obaŋa, dok daŋ omie twer me tiyo gin ame emito pi dwete pyeraŋwen wie aryo.

⁶En te yabo doge me yeto Obaŋa, kun yeto nyiŋe, kede kan a en bedo iye, anaka jo ame bedo i polo.

⁷Oye daŋ ni erom i jo Obaŋa, elogi, omie daŋ twer i kom atekere kede jo kede leb kede rok apapat luŋ,

⁸lo luŋ ame bedo i lobo bino woro lee-nono, ŋat acel acel ame nyiŋe mom obin ocoo i buk me kwo Atin romo ame oneko, geye i acakki piny.

⁹Ka ŋattoro tye kede yit myero owiny.

¹⁰Ka onwoŋo oyiko ni mak ŋattoro me bedo opii, obino tere i opii; ka ŋattoro neko jo i pala lweny, en daŋ myero neke i pala lweny, Mannono en kan ame jo Obaŋa myero nyut iye kanyakinogi kede iyeegi.

¹¹Dok ate neno lee ocele donnyo iyi lobo, kun tye i tuŋe aryo bala atin romo, kun loko bala twon twol iyiliyili.

¹²En otio kede twer a lee me agege ca luŋ ame lee ca tye; kun mio lobo kede jo luŋ a bedo iye woro lee me agege ame kan owano a romo neke doŋ ocaŋ oko.

¹³En otio ticcogo me awura adoŋo meicel, anaka omio mac oya i polo, bino piny i lobo i nyim lwak.

¹⁴Pi ticcogo me awura ame oye ni etim i nyim lee me agege-naca, obwolo jo ame bedo i lobo, okobbijo ame bedo i lobo ni gin otim cal me woro lee ame rik owano kede pala romo, ento tye kwo.

¹⁵Dok ote yeye miyo weo baŋ cal lee ca, me cal lee dok kob kopporo, dok daŋ me mi nek jo luŋ ame pe woro cal lee.

¹⁶En dok omio oketo poo i kom jo luŋ, jo atino kede jo adoŋo, olonyo kede ocan, jo a loye kengi kede opii, i ciŋgi luŋ cem onyo i tur nyimgi.

¹⁷Mom tye ŋattoro a twero wi lo jami, onyo cato, ka mom etye kede poo-nono i kome, ame en nyiŋ lee ca, onyo namba me nyiŋe.

¹⁸Man mito ryeko ba, ŋattoro ame wie tio twero kwano namba me lee-nono, pien namba a dano moro; namba mere mia abicel i pyerabicel wie abicel.