Read lango Nyut a Lakana 14 Bible Online

Nyut a Lakana 14 - lango bible

Nyut a Lakana 14

¹Rik dok ate neno Atin romo kun ocuŋ i wi kidi me Cion, dok karacel kede onwoŋo tye jo tutumia mia acel kede pyeraŋwen wie aŋwen, ame doŋ ocoo nyiŋe kede nyiŋ Pappere i tur nyimgi.

²Eka ate winyo dwonnoro ame oya i polo ame mor winyere bala acucur pii, kede bala kot a mor atek. Dwon ame awinyo-naca rik cal i dwon ogo tum ame agoyo tumegi.

³Onwoŋo gin awero wer anyen i nyim kom loc, kede i nyim leyi akwo aŋwen ca, kede odoŋe. Mom tye ŋattoro a twero pwonyo werrono, kono ka jo tutumia mia acel kede pyeraŋwen wie aŋwen ca ame doŋ olakorogi oko i lobo.

⁴Mano gin jo ame mom olille kede mon, pien gin jo ame ogwokere obedo acil; daŋ gin jo ame lubo Atin romo kan a en woto iye luŋ. Jo-ni gin jo ame olakorogi oko i akina jo luŋ, me gin bed bala cam ame ogeo cek ame oyakki Obaŋa kede Atin romo.

⁵Goba moro mom owinyere doggi; gin obedo aboŋo roccoro.

⁶Eka ate neno amalaika ocele ame atwarre i dye polo, kun tye kede amut aber ame perakino me araba baŋ jo a bedo i lobo, baŋ rok kede atekere kede leb kede jo apapat luŋ.

⁷Okobo i dwon aloŋo ni, “Lwor wunu Obaŋa, imie wunu kwogo, pien kare mere me ŋolo kop doŋ oromo. Wor wunu ŋat ame oketo polo kede lobo kede nam kede akoŋ.”

⁸Amalaika ocele, me aryo mere, te dok lubo kun kobo ni, “Babulon adwoŋ orwobere oko, orwobere oko, en a rik omio rok luŋ mato vino me akemo me timmere me coco.”

⁹Amalaika ocele te dok lubo yore, en me adekkere, kun kobo i dwon aloŋo ni, “Ka ce ŋattoro oworo lee, kede callere, ame oketo poo i tur nyime onyo i ciŋe,

¹⁰danonono daŋ bino mato vino agili me akemo Obaŋa ame oonyo iyi ikopo me kiniga mere, dok daŋ obino wune kede mac kede gweŋ calufa i nyim omalaika acil kede i nyim Atin romo.

¹¹Yito mac ame owunogi kede bedo wikino malo nakanaka, kun gin mom owe dyeceŋ kede iwor, gin jo-nu ame oworo lee kede callere, kadi ŋattoro ame oketo poo me nyiŋ lee-nono i kome.”

¹²Man kan ame kanyakino mitte i baŋ jo Obaŋa, jo ame gwoko cik Obaŋa kede iyee i kom Yecu Kricito.

¹³Dok ate winyo dwon ame oya i polo ame kobo ni, “Co kop man ni, Cakere amanni gin tye kede winyo, jo ame oto kun otye i Rwot.” Cuny Acil daŋ te moko kun okobo ni, “Gin doŋ bino we i kom lollegi atek, pien tic a gin otio tye a wopo yorgi?”

¹⁴Rik dok ate neno pol atar, kede ŋattoro ame obedo i wi pol ame cal i wot a dano. Tok kwogo me jabu tye i wie kede pala kac abit i ciŋe.

¹⁵Eka amalaika ocele te donnyo iyi ot Obaŋa, te redo i dwon aloŋo baŋ ŋat ame obedo i wi pol ni, “Cwa ciŋi, ika kac i pala kacci, pien kare me kac doŋ oromo, gin ame okao i wi lobo doŋ ocek oko.”

¹⁶Eka ŋat ame obedo i wi pol ca te ryeyo ciŋe i wi lobo kede pala kac, te kayo gin ocek i lobo oko.

¹⁷Amalaika ocele te dok donnyo iyi ot Obaŋa ame tye i polo, en daŋ onwoŋo omako pala kac abit.

¹⁸Amalaika ocele doki te bino kun oya i ŋet keno me lam, en ame onwoŋo tye i twer i kom mac. Oredo i dwon aloŋo baŋ won pala kac abit ca ni, “Cwa ciŋi kede pala kacci abit-ti, icok etak olok me lobo, pien nyige doŋ ocek oko.”

¹⁹Eka amalaika ca te ryeyo ciŋe i wi lobo kede pala kac, te coko olok ducu me lobo, te onyo i bur adwoŋ me biyo olok me akemo Obaŋa.

²⁰Ote nyono bur biyo olokkono teŋe i ŋe boma, remo te mol iyi bur ame borrere romo mairo mia aryo, tuttere mito romo bala futi abic.