Read lango Nyut a Lakana 15 Bible Online

Nyut a Lakana 15 - lango bible

Nyut a Lakana 15

¹Dok ate neno anyuttoro ocele i polo, en adittere kede me awura daŋ, omalaika abiro ame tye kede pwodo abiro. Mago doŋ pwodo me agikki mere, pien gin en a mio akemo Obaŋa cobere kakare.

²Eka ate neno gin ame nen bala nam me aryeny acil ame orubo iye mac, kede dok jo a rik oloo lee ca kede callere, kede namba me nyine; gin onwoŋo ocuŋ i ŋet nam me araŋ, kun omako tum Obaŋa i ciŋgi.

³Gin onwoŋo otye a wero wer a Muca amiro Obaŋa, kede wer Atin romo, ame kobo ni, “Tic luŋ ame itio me awura, dok dito, Rwot Obaŋa Won Twer! Kitti ducu tye atir kede me ateni, yin Abaka ame loo rok luŋ!

⁴Ŋa ce a mom bino lwori Rwot? Ŋa a mom bino pako nyiŋi? Pien yin keni giri icil. Rok luŋ bino tuno i nyimi, gin ducu obino miyi woro, pien doŋ onen oko kannaler ni timmi ducu tye atira.”

⁵Icennere ate neno ot Obaŋa, ame en kema me caden a tye i polo, oyabere oko,

⁶eka omalaika abiro te donnyo iyi kabedo acil kun okelo pwodo abiro. Gin orukere i boŋŋi camanini acil ityaŋ, kun daŋ otweo korgi kede del jabu.

⁷Lee acel i akina leyi akwo aŋwen te miyo baŋ omalaika abiro tabbi abiro me jabu ame akemo Obaŋa ame perakino waŋ i waŋ opoŋ i yigi.

⁸Yito ame oya i kwogo Obaŋa kede teko mere te mwono ot Obaŋa oko; ŋattoro mom twero donyo iye, ituno ka pwodo ducu abiro ame omalaika abiro ca okelo doŋ otum oko.