Read lango Nyut a Lakana 16 Bible Online

Nyut a Lakana 16 - lango bible

Nyut a Lakana 16

¹Eka ate winyo dwon aloŋo ame oya i ot Obaŋa, ame kobo omalaika abiro ni, “Wot iony wunu akemo Obaŋa a tye i tabbi abiro ca i wi lobo.”

²Amalaika me agege te wot onyo gin i tabo mere i wi lobo. Two etoko areco ame rem atek te mako jo ame poo me lee ca tye i komgi, kede ame oworo callere.

³Amalaika me aryo te onyo gin a tabo mere iyi nam, eka te lokere doko bala remo a dano oto, gin akwo luŋ a tye i nam te to oko.

⁴Amalaika me adek te onyo gin i tabo mere i kulli kede i akoŋ ducu, gin luŋ te lokere doko remo.

⁵Eka ate winyo amalaika ame loo pii kun kobo ni, “Kop ame iŋolo-ni iŋolo giri atira, yin ame itye dok yam itye con, yin ŋat Acil;

⁶pien jo oonyo remo a jo meri acil, kede me odwarpiny, yin daŋ imiogi remo me amatagi. Kakare gire, cannono oporogi.”

⁷Ate dok winyo keno me lam kun akobo ni, “Kakare, Rwot Obaŋa Won Twer, kop ame iŋolo ducu tye ateni kede atira!”

⁸Amalaika me aŋwen te onyo gin i tabo mere i kom cen, eka ote ye ni waŋ jo kede mac.

⁹Lyeto ager meicel owaŋo jo, jo te yeto nyiŋ Obaŋa ame tye kede twer i kom pwodo magi, mom daŋ ote ŋut kede miye kwogo.

¹⁰Amalaika me abic te onyo gin i tabo mere i kom kom loc a lee ca, eka ka loccere te doko acol oko icuc; rem te miyo jo tojo lebgi i kac,

¹¹ote yeto Obaŋa me polo pi rem komgi kede etokogi, mom daŋ ote ŋut i timgi.

¹²Amalaika me abicel te onyo gin i tabo mere i kulo adwoŋ me Efurate, pii mere te dwono oko, me yiko yo pi obakki ame ya i tuŋ kide.

¹³Eka ate neno cen areco adek a calli ogwalogwal ame oya i dog twon twol iyiliyili, kede i dok lee, kede i dog adwarpiny ame agoba,

¹⁴pien gin obedo cuny jok ame tio ticcogo me awura. Gin daŋ woto baŋ oloc me wi lobo luŋ me cokogi karacel pi mony i nino adwoŋ mea Obaŋa Won Twer Ducu.

¹⁵(Nen, abino bala akwo. Tye kede winyo ŋat ame kio piny, kun gwoko boŋŋi mere, me kur wowota onoro, kun jo neno kome ame pe owumo!)

¹⁶Gin ocoko obakki karacel i kan ame olwoŋo i leb jo Eburania ni, Armagedon.

¹⁷Amalaika me abiro te doŋ onyo gin iyi tabo mere i dye yamo, eka dwonnoro te ya iyi ot Obaŋa, ame pello i kom me loc, kun kobo ni, “Don otimere oko!”

¹⁸Kot te ero memenya, mor adwoŋ te winyere, kede mwomwoca me kot, oyeŋo adwoŋ te yeŋo piny. Kodi oyeŋo moro yam mom ru onen anaka cene jo bed i wi lobo, ame arac a rom i mano.

¹⁹Yi boma adwoŋ ca te barre oko dul adek, boma orok luŋ te rwacere piny. Obaŋa opo pi Babulon adwoŋ me miye mato vino i ikopo me akemo mere ager.

²⁰Icula nam luŋ oŋweŋweca oko, kidi moro mom dok te nen.

²¹Pee apek meicel te corre i polo te ruruta i kom jo, kun nyig pee acel acel pekkere buco romo ratili mia acel, jo te yeto Obaŋa pi pwodo man me pee, pien pwodo-nono obedo rac ame okato kare.