Read lango Nyut a Lakana 17 Bible Online

Nyut a Lakana 17 - lango bible

Nyut a Lakana 17

¹Eka amalaika acel i kin omalaika abiro a rik omako tabbi abiro ca te bino baŋa, te kobba ni, “Biye me anyutti kop ame oŋolo i kom twon min acoco, ame obedo i kommere i ŋet pie i kulli apol.

²Obakki me wi lobo luŋ otimo kede tim me coco, anaka jo ame bedo i lobo omer i vino me timmere me coco.”

³Amalaika otina otera i tim, kun onwoŋo Cuny Acil oyuto tamma oko, eka ate neno dako moro ame obedo i wi lee arema ame ocoo i kome nyiŋŋogo ame nyuto acae i kom Obaŋa, oromo ko me luŋ, tye daŋ i wie abiro kede tuŋe apar.

⁴Dako-nono onwoŋo oruko boŋŋi amaramar kede arema, okwogere kede jabu, kede gweŋ alilia a welgi malo, anaka tiggi atar me wel, kun tye kede ikopo me jabu i ciŋe ame opoŋ iye gin ame okwero, kede cilo me timmere me coco.

⁵I tur nyime ocoo iye nyiŋ ame tere obedo muŋ, ni “Babulon adwoŋ, tota a mon luŋ ame ococo, kede jo luŋ i wi lobo ame timo tim me kwer.”

⁶Ate neno ni dako ca omer oko i remo a jo Obaŋa, kede remo ocaden a Yecu. Ka anene abedo i twon wurroro meicel.

⁷Ento amalaika te kobba ni, “lwuro piŋo? An abino titti te kop a dan-nu, kede lee a tye i wie abiro kede tuŋe apar-ru ame otiŋo dako.

⁸Lee ame ineno-naca rik tye, aman doŋ pe tye, bino yitto iyi bur ame agikki tere mom, eka te wot oko, rwenyo odoco. Jo ame bedo i lobo ame nyingi mom ocoo i buk me kwo geye i acakki piny bino wuro me neno lee, pien rik tye, aman doŋ pe, cite bino dwogo.

⁹Man mito tam kede ryeko. Wie abiro obedo kiddi abiro ame dako ca obedo iye.

¹⁰Gin daŋ obedo obakki abiro, ame abic i akinagi doŋ opoto oko, acel tye, en ocele mom ru obino, dok daŋ ka obino, en myero ri pi kare anonok keken.

¹¹Aco lee ame rik tye, aman doŋ pe, en abaka me aboro, cite en ŋat acel i akina jo abiro ca, dok bino wot oko, rwenyo odoco.

¹²Tuŋ lee apar ame ineno ca gin obakki apar ame mom ru ocako loc, cite obino miyogi twer me loc acalo obakki pi caa acel, karacel i lee daŋ.

¹³Magi luŋ tye i cuny acel, daŋ gin omio tekogi kede twergi baŋ lee.

¹⁴Gin obino ero mony i kom Atin romo, ento Atin romo bino loyogi, pien en Rwot a rwode, kede Abaka obakki, dok jo ame tye baŋe gin jo ame olwoŋo, ame oyero, jo a genne.”

¹⁵Dok te kobba ni, “Pie i kulli apol ca ame ineno, kan ame dako acoco ca obedo iye, man jo kede lwak kede rok kede leb apol apapat.

¹⁶Aco tuŋ lee apar ame ineno, gin karacel kede lee obino dago dako ame acoco; gin obino weke ata kun tye onoro, obino camo riŋo kome, ote waŋo oko i mac.

¹⁷Pien Obaŋa en ame oketo mit man i cunygi, me gin ocob tammere kun obedo i cuny acel, eka ote miyo twergi me loc baŋ lee, tuno waŋ ame kop ame Obaŋa okobo doŋ ocobere.

¹⁸Dako ame ineno en boma adwoŋ ame tye aloyo obakki me wi lobo luŋ.”