Read lango Nyut a Lakana 18 Bible Online

Nyut a Lakana 18 - lango bible

Nyut a Lakana 18

¹Icennere ate dok neno amalaika ocele ame bino piny iya i polo kun tye kede twer adwoŋ; kwogo mere ocaro lobo luŋ.

²En te redo kede dwon atek meicel ni, “Babulon adwoŋ orwobere oko, orwobere oko! Odoko doŋ kabedo a jogi, ka-pono a cen areco ducu kede me winyi areco luŋ ame yi jo kwero.

³Rok luŋ omato vino me akemo me timmere me coco, obakki me lobo luŋ otimo kede tim me coco, ocat-wil me lobo odoko wegi abar adoŋo pi bedo mere me caro okato kare.”

⁴Ate dok winyo dwon ocele ame oya i polo kun kobo ni, “Ya wunu oko i baŋe, wun jona, me kur inotte wunu i ballere, ite nywako wunu pwodo a poto i kome!

⁵Pien ballere doŋ oyido malo, otuno i polo, Obaŋa doŋ opoyo tim areco mere,

⁶Cul wunu dako man acalo rik omiowu kede, cule wunu iryo pi tic a en otio, rub wunu mattere apek meicel ikopo mere ikome a rik en orubbiwu iye.

⁷Dok imiye wunu rem kede kumo a rom i kite ame owakere kede, kede timmere me caro caro, Pien en kobo i cunye ni, ‘An abaka, abedo i kom, mom a rom i dako a cware oto, mom abino bilo kumo kadi acel,’

⁸pi mano pwodo mere luŋ bino poto i nino acel, too edeke, kumo kede kec. Obino daŋ wane kom i mac, pien Rwot Obaŋa ame ŋolle kop tekkere dwoŋ.”

⁹Obakki me lobo ame rik otimo kede tim me coco, kede ame olubo kite mere me caro caro obino koke kun okuko i kome ka gin oneno tye awan kun yito mere aduny.

¹⁰Gin obino cuŋ kun onyedde i teŋe pi lworo can ame owune kede, kun oko bo ni, “Ai do, ineno can nadi, yin Babulon, yin boma atek! Kop ame oŋolli opoto i komi i caa acel keken.”

¹¹Ocat-wil me lobo daŋ tye a koko kede kumo pire, pien ŋattoro mom dok wilo gin ame opoŋ i melgi,

¹²ame gin okelo i oko, jabu, ryal, gweŋ alilia a welgi malo, tiggi atar me wel, camanini aberrere, boŋŋi amaramar, boŋŋi aliri aliri kede en arema mege, kwone bao luŋ a nwece kur, jami luŋ otio i lak Lyec, jami luŋ otio i bao a welgi malo meicel, mola, nyonyo, kiddi me gedo alilia meicel,

¹³cinamon kede gigi mogo ocele a ŋwecgi kur, odok akur me awaŋa, murra, lubaŋ, vino, moo jeituni, moko apwot, ŋano, dok, rommi, aguragura, gadigadi ame olorre kede, opii, anaka kwo a dano ikome.

¹⁴“Nyig yen ame cunyi gomo doŋ okwanyo oko i baŋi, cemmogo amit a mom nen ata kede jami ame opwoo i waŋ, orwenyo oko i baŋi, mom dok ibino nwoŋogi atwal!”

¹⁵Ocat jami magi luŋ, ame odoko olonyo pi boma-no no, obino cuŋ kun onyedde i teŋe pi lworo awuna ame owune kede, kun okoke dok okumo,

¹⁶ni “Ai do, oneno can nadi, en boma adwoŋ, a yam rukere i bono camanini aber, kede boŋŋi amaramar kede arema, kun okwogere kede jabu kede gweŋ alilia a welgi malo, anaka tiggi atar me wei!

¹⁷Lonyo adwoŋ a rom man obin oketo oko i caa acel keken.” Odoŋe me mel, kede jo a wot i nam, okwaŋ mel kede jo luŋ ame ticgi tye i nam, ocuŋ kun onyedde i teŋe,

¹⁸te wo ka gin oneno tye awan kun yito mere aduny, kun okobo ni, “Boma me ne a rik cal i boma man adwoŋ-ŋi?”

¹⁹Eka ote coro kwoo i wigi, ote kok kun oku mo ame odelle kede ni, “Ai do, oneno can nadi, en boma adwoŋ, kan ame jo luŋ a rik ocwalo melegi i nam onwoŋo iye abargi pi lonyo mere adwoŋ! Oyako oko, odoŋ nono, i caa acel keken,

²⁰Lel pi rwobere mere, yin polo, wun jo Obaŋa, wun okwena kede odwarpiny mere, lel wunu ba, pien Obaŋa doŋ oŋolle kop a rik en oŋolo i komwu!”

²¹Eka amalaika moro atek meicel te ceyo twon gweŋŋoro a rom i min kidi rego, te dwiro i dye nam, kun ko bo ni, “Babulon, en paco adwoŋ-ŋi, obino canyo piny atek acalo man, mom dok bino nen atwal!

²² Dwon ogo-tum kede ogo wer luŋ, dwon okut nyamulere kede okut apel, mom dok bino winyere baŋi. Ati-tic me kwone diro moro mom dok bino nwoŋere baŋi. Ŋur a min kidi me rego mom dok awinyere baŋi,

²³Tara moro mom dok bino Iyel me menyi, anaka dwon anyom kede atera mere mom dok bino winyere; pien ocat-willi rik jo a pirgi dito i lobo, yin daŋ rik ibwolo rok luŋ kede timmi me jojok.

²⁴Remo odwarpiny kede jo Obaŋa ocele, anaka remo a jo luŋ a yam oneko i lobo, onwoŋere i Babulon.”