Read lango Nyut a Lakana 2 Bible Online

Nyut a Lakana 2 - lango bible

Nyut a Lakana 2

¹“Baŋ amalaika a lwak oye an ame tye i Epeco co ni mano: “Man kop a ŋat ame omako acer abiro i ciŋe tuŋ cem, ame tye ka loŋo dyere me gi-cibo tara me jabu abiro.

²“ ‘An aŋeo ticci ducu, kede kite ame ilolle kede, kede kite ame idio kede cunyi. Aŋeo kite acalo mom itwero kanyo kede jo areco, ento itemo jo ame lwoŋere kengi ni okwena, aco nono, eka daŋ ite moko ni gin ogoba.

³Iŋeo diyo cunyi, itye ka kanyakino pi nyiŋa, daŋ mom ru iol gire.

⁴Ento atye i kop man i komi, yin ityeko weko mar a rik itye kede i agege.

⁵Koŋ ipoyo, inen kit ame ipoto kede, eka ite ŋut, ite tiyo kit a rik itio me agege ca. Aco ka pe iŋut, abino bino baŋi, eka ate kwanyo gi-cibo tarani oko i kakare, ka mom iŋut.

⁶Ginnoro aber ame onen baŋi en ene ni, yin idag tic a jo Nikolaiti ame an daŋ adagi.

⁷Ŋat a tye kede yit, myero owiny kop ame Cuny Acil okobo baŋ lwak oye an ducu. Ŋat ame oloo abino miye camo yat me kwo ame tye i Poto Obaŋa.’

⁸“Baŋ amalaika a lwak oye an ame tye i Cumurna co ni mano: “Man kop a ŋat ame obedo me agege kede me agikki mere, ŋat a rik oto eka dok te kwo.

⁹“ ‘An aŋeo kite ame owuni kede, kede can lim ame itye kede (ento yin alonyo). Aŋeo daŋ ayet a jo ame miye ni gin Ojudaya, aco kun nono; gin kara obedo eryoŋet a Catan.

¹⁰Kur ilwor can a bino poto i komi. Nen ba, Catan bino bolo jo mogo i akinawu i buc me om yiwu. Obino wunowu pi nino apar. Bed ŋat a genne naka i to, eka ate miyi tok kwogo me kwo.

¹¹Ŋat a tye kede yit, myero owiny kop ame Cuny Acil okobo baŋ lwak oye an ducu, Ŋat ame oloo, to me aryo mom bino wune.’

¹²“Baŋ amalaika a lwak oye an ame tye i Pergamo co ni mano: “Man kop a ŋat ame tye i pala lweny ame bit ryoryo.

¹³“ ‘An aŋeo kan ame ibedo iye, kan ame kom loc a Catan tye iye. Yin giri ilido nyiŋa, mom ikwero iyee meri i koma, akadi i kare a cadenna Antipa, daŋ ona ame agen ame rik oneko i akinowu, kan a Catan bedo iye.

¹⁴Ento atye i koppogo anonok i komi, pien itye kede jo mogo kuno ame gin omako pwony a Balaam, ame rik opwonyo Balak kite me miyo jo Icrael poto i bal, kun obitogi me camo riŋo ame oyalli cal jogi, kede me timo tim me coco.

¹⁵Yin daŋ amanno itye i jo mogo ame omako pwony a jo Nikolaiti.

¹⁶Aco ka mom iŋut, abino bino baŋi oyot, eka ate romo kedgi i pala lweny me doga.

¹⁷Ŋat a tye kede yit, myero owiny kop ame Cuny Acil okobo baŋ lwak oye an ducu, Ŋat ame oloo, abino miye manna ame okano oko, dok daŋ abino miye gweŋ alilia atar, kede nyiŋ anyen ame ocoo i kom gweŋ alilianono, ame ŋattoro mom ŋeo, kono ka ŋat ame omio baŋe.’

¹⁸“Baŋ amalaika a lwak oye an ame tye i Tuatira co ni mano: “Man kop a Wot Obaŋa, ame waŋe cal i leb mac, kede tyene daŋ cal i mola ame orudo acil.

¹⁹“ ‘An aŋeo ticci ducu, marri, iyeeni, ticci me konyo jo, kede kite ame idio kede cunyi. Aŋeo ni ticci aman ber kato me agege oko.

²⁰Ento atye i kop man i komi, pwod iweko dako ca, Jejebel, ame lwoŋere kene ni en adwarpiny, kun tye apwonyo omirona kede miyogi gak oko i timo tim me coco kede camo riŋo ame oyalli cal jogi.

²¹Amie kare me ŋut i kom kodi tim me coco mere-nono, ento en okwero ŋut oko.

²²Nen ba, abino rete i wi tanda, coge-nono daŋ abino bologi i can adwoŋ meicel, ka gin mom oŋut, okwero lubo kodi tim a dako-nono.

²³Itino mere daŋ abino neko oko, me wek lwak jo oye an i kabedo ducu oneni, an ame aŋio cuny jo kede tamgi, dok abino culo ŋat acel acel i kinwu acalo ticcere tye.

²⁴“Cite wun jo ocele mere a tye i Tuatira, ame mom olubo kodi pwonynyi daŋ mom ipwonyo giwu gin ame jo ocele lwoŋo ni ‘muŋ a Catan atut,’ an akobbiwu ni, mom dok ameddiwu yeccoro ocele.

²⁵Lid wunu ka en ame itye wunu kede, tuno wan ame abino.

²⁶Ŋat ame oloo, dok daŋ ogwoko ticca naka i agikki, abino miye twer i kom orok.

²⁷En bino loyogi kede abiro nyonyo, acalo ŋat a goo gulli, ŋido atitino.

²⁸Acalo an daŋ Pappa omia twer. Abino daŋ miye acer ame olwoŋo ni etop.

²⁹Ŋat a tye kede yit, myero owiny kop ame Cuny Acil okobo baŋ lwak oye an ducu.