Read lango Nyut a Lakana 20 Bible Online

Nyut a Lakana 20 - lango bible

Nyut a Lakana 20

¹Eka ate neno amalaika ame ayitto piny iya i polo, kun omako agony me bur ame agikki tere mom, kede jegere apek i ciŋe.

²Omako twon twol iyiliyili, ame en daŋ obedo twol acon ca, Won Adote kede Catan, te tweye oko pi mwakki tutumia acel,

³te bolo iyi bur ame agikki tere mom, te cego doge oko, te mwono daŋ oko kun oketo anen i wie, me kur dok med bwolo rok luŋ, ituno ka mwakki tutumia okato. I ŋe mano, myero dok gonye oko pi kare anokkoro.

⁴Dok ate neno kome me loc; jo ame obedo iye obedo jo ame omiogi twer me ŋolo kop. Aneno daŋ tipo a jo a rik otono wigi pi miyo cadengi i kom Yecu kede kop Obaŋa, jo a rik mom oworo lee, onyo callere, dok daŋ a mom oketo poo mere i tur nyimgi onyo i ciŋgi. Gin dok ote bedo kwo, obedo ka loc karacel i Kricito pi mwakki tutumia.

⁵Jo oto ocele luŋ mom dok ote kwo, ituno ka mwakki tutumia okato. Man en cer me agege.

⁶Tye kede winyo ŋat ame bino bedo i cer man me agege, dok daŋ en dano Obaŋa ikome. Jo acalo man, to me aryo mom tye i twerroro i komgi, ento gin bino bedo olamdog Obaŋa kede mea Kricito, dok daŋ gin obino loc karacel kede pi mwakki tutumia.

⁷Ka mwaka tutumia doŋ okato, obino doŋ gonyo Catan i buccere.

⁸En bino donnyo oko me wot bwolo anaka rok luŋ ame tye i but lobo aŋwen luŋ, en Gog kede Magog, kede me cokogi pi mony, jo a polgi rom i kwoo me dog nam.

⁹Gin omol, oyarre i dye lobo, oguro gony a jo Obaŋa, kede boma ame en maro; ento mac te ya i polo, te tyekogi oko.

¹⁰Catan a rik obwologi daŋ ote bolo i nam me mac kede gweŋ calufa kan ame lee kede adwarpiny ame agoba daŋ tye iye ca; gin obino rem dyeceŋ kede iwor nakanaka.

¹¹Ate dok neno kommoro me loc, atar, adwoŋ, kede ŋat obedo iye. Lobo kede polo te riŋo oko i nyime, kabedogi mom dok te nen.

¹²Eka ate neno jo oto, jo adoŋo kede en atino mege, kun ocuŋ i nyim kom loc, kun daŋ tye buke mogo ame oyabo. Oyabo daŋ bukkoro ocele, ame en buk me kwo. Jo oto onolligi kop kun olubo gin a nwaŋ gin otio, acalo ocoo i buke.

¹³Nam dan odwoggo jo a rik oto iye, To kede Kadec daŋ te miyo jo oto a tye iye; oŋolo kop a ŋat acel acel kun luba gin a rik gin otio.

¹⁴Eka To kede Kadec ote bolo oko i nam me mac. Nam me mac en to me aryo.

¹⁵Ŋattoro a rik nyine mom onwoŋo ocoo i buk me kwo obolo oko i nam me mac.