Read lango Nyut a Lakana 22 Bible Online

Nyut a Lakana 22 - lango bible

Nyut a Lakana 22

¹Amalaika dok te nyutta kulo pii me kwo, ame mimila bala gweŋ a mimila, kun mol iya i kom loc Obaŋa kede me Atin romo,

²wowola i dye yo iyi bomanono. I dog kulo ryoryo onwoŋo tye iye yat me kwo, ame tye i kit nyige apapat apar wie aryo, kun nyak dwe i dwe. Po te obedo yat me caŋo two orok.

³Ginnoro ame oceno mom dok bino nen, ento kom loc Obaŋa kede me Atin romo bino bedo iye; omiro mere bino wore.

⁴Gin bino neno wane, nyiŋe daŋ bino bedo i tur nyimgi.

⁵Dyewor mom dok bino bedo tye, jo i kuno mom dok bino mito lero a tara onyo mea cen, pien Rwot Obaŋa bino menyogi, gin daŋ bino perakino i loc waŋ i waŋ.

⁶Te dok kobba ni, “Kop man en kop ame genne, dok me ateni, Rwot ame en Obaŋa ame loo cuny odwarpiny doŋ ocwalo amalaika mere me nyutti omiro mere gin ame bino timere a ceggi-ni.

⁷Nen, an a ceggi bino.” Tye kede winyo ŋat ame keto cunye i kop ame orabo i buk man.

⁸An a Lakana ame owinyo dok oneno man ducu. A doŋ atyeko winyo kede neno, rik aryebere piny i tyen amalaika ame onyutta mannono luŋ, pi wore;

⁹ento en okobba ni, “Kur itim amannono! An amiro wadwu, arom kede omegoni ame gin odwarpiny, kede jo ame keto cunygi i kop ame ocoo i bukki. Wor giri Obaŋa.”

¹⁰Dok en te kobba ni, “Kur imun kop ame orabo i buk man, pien kare doŋ ceggi.

¹¹Wek ŋattoro a timo tim areco medde timo tim areco, ŋat a kittere oballe med doŋ balo kite mere, ŋat a kite mere atir med doŋ timo gin a tye atir, ŋat acil med doŋ bedo acil.”

¹²“Nen, an doŋ a ceggi bino, kun aketa daŋ motta me pwoc, me ami ŋat acel acel ame oporo tic a en otio.

¹³An Alufa kede Omega, ŋat me agege kede me agikki mere, ageyi kede agikki.”

¹⁴Jo ame lwoko rukgi oko me gin obed i twer me camo yat me kwo, kede me donyo i boma kun obeo i dog cel, jo-nono tye kede winyo.

¹⁵Oko i ne boma tye iye otim tim gwogwok, otim tim jojok, ococo, onek jo, owor cal jogi kede jo luŋ ame maro gin me goba, dok tio.

¹⁶“An Yecu atyeko cwayo amalaikana me rab kop man me caden baŋwu pi lwak jo oye an i kabedo luŋ. An Lwit-yat a Daudi, me doggola mere ikome, an Etop a mimila acil meicel.”

¹⁷Cuny Acil kede Atera tye akobbo ni, “Biye!” Ŋat a winyo daŋ myero gam ni, “Biye!” Ŋat ame oryo ociro daŋ bin, ŋattoro a mito, bin mat pii me kwo aboŋo culloro.

¹⁸Akwenyoro jo luŋ a winyo kop ame orabo i buk man, ni mano, ka ŋattoro dok omedo kopporo iye, Obaŋa bino medo i kome kodi pwodo ame ocoo pirgi i buk man.

¹⁹Dok ka ce ŋattoro okwanyo ginnoro i kom kop ame orabo i buk man, Obaŋa bino kwanyo i baŋe twerrere me nywako camo yat me kwo, kede donyo i boma acil, ame ocoo pirgi i buk man.

²⁰Ŋat ame mio caden i kom kop magi, okobo daŋ ni, “Ateteni, binona doŋ ceggi.” Amen. Biye, Rwot Yecu!

²¹Winyo a Rwotwa Yecu Kricito bed kedwu ducu. Amen.